Luku 6:1-49
-
“Oklunọ Gbọjẹzan tọn” (1-5)
-
Dawe he alọ etọn kúsẹ́ de yin azọ̀nhẹngbọna (6-11)
-
Apọsteli 12 lẹ (12-16)
-
Jesu plọnmẹ bo hẹnazọ̀ngbọ (17-19)
-
Ayajẹ po nuhe nọ hẹn dindọn wá po (20-26)
-
Owanyi na kẹntọ lẹ (27-36)
-
Mì sọ dawhẹnamẹ ba blo (37-42)
-
Yè na yí sinsẹ́n etọn do yọ́n ẹn (43-45)
-
Ohọ̀ he yin gbigbá ganji; ohọ̀ he dodonu etọn ma lodo (46-49)
6 Todin, to gbọjẹzan de gbè, e gbọn likun-gle lẹ mẹ wá jei, devi etọn lẹ sọ jẹ ota likun tọn lẹ wẹ́n ji+ bo to fiflé yé po alọ yetọn lẹ po bosọ to dùdù.+
2 Enẹwutu, delẹ to Falesi lẹ mẹ dọmọ: “Naegbọn mìwlẹ do to nuhe ma sọgbe hẹ osẹ́n wà to Gbọjẹzangbe?”+
3 Ṣigba, Jesu gblọnna yé dọmọ: “Be mìwlẹ ma ko hia gbede, nuhe Davidi wà to whenue huvẹ hù ewọ po mẹhe tin to e dè lẹ po ya?+
4 Lehe e biọ ohọ̀ Jiwheyẹwhe tọn mẹ do bọ akla didetọn* lẹ yin nina ẹn bọ e sọ dù bo na delẹ mẹhe tin to e dè lẹ, ehe ma sọgbe hẹ osẹ́n na mẹdepope nado dù, adavo yẹwhenọ lẹ kẹdẹ?”+
5 Whenẹnu, e dọna yé dọmọ: “Visunnu gbẹtọ tọn wẹ Oklunọ Gbọjẹzan tọn.”+
6 To gbọjẹzan devo gbè,+ e biọ sinagọgu mẹ bo jẹ mẹplọn ji. Podọ dawe de he adusilọ etọn kúsẹ́ tin to finẹ.+
7 Todin, wekantọ lẹ po Falesi lẹ po to ṣiṣọ́ Jesu sinsinyẹn nado pọ́n eyin e na hẹnazọ̀ngbọnamẹ to Gbọjẹzangbe, na yé nido sọgan mọ nuhe yé na yí do sawhẹdokọna ẹn.
8 Ṣigba, ewọ yọ́n linlẹn yetọn,+ enẹwutu e dọna dawe he alọ etọn kúsẹ́ lọ dọmọ: “Fọnṣite bo nọte to ṣẹnṣẹn.” Ewọ sọ fọ́n bo ṣite to finẹ.
9 To whenẹnu, Jesu dọna yé dọmọ: “Yẹn na kàn nude sè mì, Be e sọgbe hẹ osẹ́n nado wà dagbe kavi nado wà oylan, nado whlẹn ogbẹ̀* kavi nado hù i to Gbọjẹzangbe ya?”+
10 Whenue e pọ́n yemẹpo hlan lẹdo pé godo, e dọna dawe lọ dọmọ: “Dlẹnalọ towe.” Ewọ sọ wàmọ, bọ alọ etọn yin hinhẹn gọ̀ jẹgangan.
11 Ṣigba, yé gọ́ na adi sinsinyẹn, yé sọ jẹ hodọ ji hẹ ode awetọ yetọn gando nuhe yé sọgan wà na Jesu go.
12 To gbèdopo, e yì osó ji nado hodẹ̀,+ e sọ yí ozán lọ blebu do hodẹ̀ hlan Jiwheyẹwhe.+
13 Whenue ai ko họ́n, e ylọ devi etọn lẹ bo de omẹ 12 he e sọ ylọdọ apọsteli lẹ sọn yé mẹ:+
14 Simọni, mẹhe e sọ ylọdọ Pita, Andle nọvisunnu etọn, Jakọbu, Johanu, Filipi,+ Batelemi,
15 Matiu, Tọmasi,+ Jakọbu visunnu Alfe tọn, Simọni mẹhe nọ yin “zohunhunnọ lọ,”
16 Juda visunnu Jakọbu tọn, podọ Juda Iskaliọti, mẹhe lẹzun pàdutọ.
17 E sọ jẹte po yé po bo ṣite to fihe to flala de, podọ devi etọn susugege to finẹ, gọna gbẹtọgun daho de sọn Jude lẹpo, po Jelusalẹm po, gọna lẹdo Tile po Sidoni po tọn he to huto lẹ, yèdọ mẹhe wá nado sè ohó etọn bo yin azọ̀nhẹngbọna lẹ.
18 Mẹhe gbigbọ mawé lẹ to tuklado lẹ lọsu yin azọ̀nhẹngbọna.
19 Podọ gbẹtọgun lọ lẹpo wẹ to dindin nado doalọ e go, na huhlọn to tintọ́njẹgbonu sọn ewọ mẹ+ bo to azọ̀nhẹngbọna yemẹpo.
20 Ewọ sọ pọ́n devi etọn lẹ hlan bo jẹ didọ ji dọmọ:
“Ayajẹnọ wẹ mì wamọnọ lẹ, na mìtọn wẹ Ahọluduta Jiwheyẹwhe tọn.+
21 “Ayajẹnọ wẹ mì mẹhe huvẹ to hùhù todin lẹ, na mì na gọ́ho.+
“Ayajẹnọ wẹ mì mẹhe to avivi todin lẹ, na mì na konu.+
22 “Ayajẹnọ wẹ mìwlẹ to whedepopenu he gbẹtọ lẹ gbẹwanna mì,+ podọ whenue yé de mì sọn ogbẹ́ yetọn mẹ+ bo vlẹ mì kò bosọ kọnmasin do* oyín mìtọn go taidi mẹylankan, na Visunnu gbẹtọ tọn wutu.
23 Mì jaya to azán enẹ gbè bo lọ́n na ayajẹ, na, pọ́n! daho wẹ ale mìtọn to olọn mẹ, podọ na nudopolọ lẹ wẹ tọgbo yetọn lẹ ko nọ wà na yẹwhegán lẹ.+
24 “Ṣigba, dindọn hlan mì adọkunnọ lẹ,+ na mì ko mọ homẹmiọnnamẹ mìtọn yí to gigọ́ mẹ.+
25 “Dindọn hlan mì mẹhe gọ́ho todin lẹ, na huvẹ na hù mì.
“Dindọn hlan mì mẹhe to nuko todin lẹ, na mì na nọ aluẹmẹ bo viavi.+
26 “Dindọn hlan mì to whedepopenu he gbẹtọ lẹpo to ohó mìtọn dagbe dọ,+ na nuhe tọgbo yetọn lẹ wà na yẹwhegán lalo lẹ niyẹn.
27 “Ṣigba, yẹn dọna mì mẹhe to todoai lẹ dọ: Mì zindonukọn nado nọ yiwanna kẹntọ mìtọn lẹ, nado nọ wà dagbe na mẹhe gbẹwanna mì lẹ,+
28 nado nọ dona mẹhe to dẹ̀hodo mì lẹ, bo nọ hodẹ̀ na mẹhe to zunzun mì lẹ.+
29 Mẹhe hò alaka dopo na we, lẹ́ awetọ na ẹn ga; podọ mẹhe yí awugbó towe, a whlẹn awù odò tọn towe lọsu sọn e si blo.+
30 Nọ nanú mẹdepope he to nubiọ we,+ podọ mẹhe yí onú towe lẹ, a kàn yé biọ sọn e si blo.
31 “Humọ, kẹdẹdile mìwlẹ jlo dọ gbẹtọ lẹ ni nọ wà na mì do, mọ wẹ mì ni nọ wà na yé do.+
32 “Eyin mì nọ yiwanna mẹhe yiwanna mì lẹ, ale tẹwẹ to e mẹ na mì? Na ylandonọ lẹ lọsu nọ yiwanna mẹhe yiwanna yé lẹ.+
33 Podọ eyin mì nọ wà dagbe na mẹhe to dagbe wà na mì lẹ, ale tẹwẹ to e mẹ na mì? Ylandonọ lẹ lọsu nọ wà nudopolọ.
34 Humọ, eyin mì nọ yàn* na mẹhe mì donukun dọ yé na sú mì lẹ, ale tẹwẹ to e mẹ na mì?+ Ylandonọ lẹ lọsu nọ yàn na ylandonọ lẹ, na yé nido sọgan mọ ẹn yí lẹkọ.
35 To vogbingbọn mẹ, mì zindonukọn nado nọ yiwanna kẹntọ mìtọn lẹ podọ nado nọ wà dagbe bo nọ yàn namẹ matin todido nado mọ nudepope yí lẹkọ;+ podọ ale mìtọn na yin daho, bọ mì na yin visunnu Gigogán lọ tọn lẹ, na ewọ nọ yin homẹdagbenọ hlan mayọndagbenọ lẹ po mẹylankan lẹ po.+
36 Mì zindonukọn nado to lẹblanunọ yin, kẹdẹdile Otọ́ mìtọn yin lẹblanunọ do.+
37 “Humọ, mì sọ dawhẹnamẹ ba blo, mì ma nasọ yin whẹdana to aliho depope mẹ,+ podọ mì sọ gblewhẹdomẹ ba blo, mì ma nasọ yin whẹgbledo to aliho depope mẹ. Mì zindonukọn nado nọ jonamẹ,* podọ mì na yin jijona.*+
38 Mì nọ namẹ, gbẹtọ lẹ nasọ na mì.+ Yé na kọ̀n nuhe yin jijlẹ ganji, he yè zíndo odò, bo whàn dopọ bosọ gọfla do akọ̀n na mì. Na nujlẹnu he mì to yíyí do jlẹ namẹ wẹ yé na yí do jlẹ na mì ga.”
39 Enẹgodo, e sọ na apajlẹ de yé ga dọmọ: “Nukuntọ́nnọ ma sọgan do ali hia nukuntọ́nnọ, kavi e sọgan wàmọ wẹ? Yé omẹ awe lẹ na jai do odò mẹ, kavi e ma yin mọ wẹ?+
40 Nuplọntọ* de ma nọ hú mẹplọntọ etọn, ṣigba mẹdepope he yin pinplọn ganji nọ taidi mẹplọntọ etọn.
41 To whelọnu lo, naegbọn hiẹ do to núyọ he tin to nukun mẹmẹsunnu towe tọn ji pọ́n, ṣigba bo ma doayi atinpo he tin to nukun towe titi ji go?+
42 Nawẹ hiẹ sọgan dọna mẹmẹsunnu towe do dọ, ‘Mẹmẹsunnu, dike ma de núyọ he tin to nukun towe ji sẹ̀,’ to whenuena hiẹ lọsu ma to atinpo he tin to nukun towe titi ji lọ mọ? Yẹnuwatọ! De atinpo sẹ̀ sọn nukun towe titi ji whẹ́, podọ to enẹgodo hiẹ na mọnú gblegede nado de núyọ he tin to nukun mẹmẹsunnu towe tọn ji lọ sẹ̀.
43 “Na atin dagbe de ma nọ de sinsẹ́n ylankan tọ́n, podọ atin ylankan de ma nọ de sinsẹ́n dagbe tọ́n.+
44 Na atin dopodopo wẹ nọ yin yinyọnẹn gbọn sinsẹ́n etọn titi dali.+ Di apajlẹ, gbẹtọ lẹ ma nọ gbẹ̀n ovò sinsẹ́n lẹ to owùn lẹ ji gba, mọdopolọ yé ma nọ gbẹ̀n ovẹn sinsẹ́n to wùnkan mẹ.
45 Mẹdagbe nọ de nudagbe tọ́n sọn adọkunnu dagbe he to ahun etọn mẹ lẹ mẹ, ṣigba mẹylankan nọ de nuylankan tọ́n sọn adọkunnu ylankan etọn lẹ mẹ; na sọn susugege nuhe tin to ahun mẹ lẹ tọn mẹ wẹ onù nọ dọtọ́n.+
46 “To whelọnu lo, naegbọn mìwlẹ do nọ ylọ mi dọ ‘Oklunọ! Oklunọ!’ ṣigba bo ma nọ wà nuhe yẹn dọ lẹ?+
47 Mẹdepope he wá dè e bo sè ohó ṣie lẹ bosọ basi yé, yẹn na do mẹhe nkọ ewọ yin hia mì:+
48 Ewọ taidi dawe de he to ohọ̀ gbá bo kùn odò he yìdo taun bosọ do dodonu do osé ji. Enẹwutu, to whenue singigọ wá, tọ̀sisa lọ hò jẹ ohọ̀ lọ go, ṣigba e ma sinyẹn sọmọ nado whàn ẹn, na e yin gbigbá ganji wutu.+
49 To alọ devo mẹ, mẹdepope he sè bo ma basi i,+ tin taidi dawe he gbá ohọ̀ do aigba ji matin dodonu de. Tọ̀sisa hò jẹ e go, podọ to afọdopolọji, e họ́, gbakija ohọ̀ enẹ tọn sọ yin daho.”
Nudọnamẹ Odò Tọn
^ Kavi “akla sọhia tọn.”
^ Kavi “alindọn.”
^ Kavi “gbẹkọ.”
^ Enẹ wẹ, matin akuẹvi.
^ Kavi “tuntundote.”
^ Kavi “tundote.”
^ Kavi “Devi.”
