Matiu 3:1-17
3 To azán enẹlẹ gbè, Johanu+ Baptizitọ wá bo to yẹwhehodọ+ to danfafa Jude tọn ji,
2 bo to didọmọ: “Mì lẹnvọjọ, na Ahọluduta olọn tọn ko dọnsẹpọ.”+
3 Na nugbo tọn, ewọ wẹ mẹlọ he yè ko dọho etọn gbọn yẹwhegán Isaia gblamẹ+ to hogbe ehelẹ mẹ dọmọ: “Mẹde to awhádo jẹgbonu to danfafa ji dọ: ‘Mì jla aliho Jehovah* tọn lọ do! Mì jlọ omọ́ji etọn lẹ.’”+
4 Todin, Johanu do avọ̀ he yè yí ofún kanklosọ́ tọn do basi bo yí gbànnú ayú tọn do blá alinkàn.+ Núdùdù etọn sọ wẹ owẹ̀n lẹ po owín akú po.+
5 Whenẹnu, mẹhe tin to Jelusalẹm podọ to Jude lẹpo gọna otò he lẹdo Jọdani pé lẹpo nọ tọ́n wá e dè,+
6 bo nọ yin bibaptizi to* Tọ̀sisa Jọdani mẹ gbọn ewọ dali,+ bosọ nọ yigbena ylando yetọn lẹ to gbangba.
7 To whenue e mọ susu Falesi lẹ po Sadusi lẹ po+ tọn to dindọnsẹpọ baptẹm lọ tẹnmẹ, e dọhlan yé dọmọ: “Mì ovi amàpoe tọn lẹ emi,+ mẹnu wẹ ko na mì avase nado họ̀n sọn homẹgble he ja lọ mẹ?+
8 Enẹwutu, mì de sinsẹ́n he jẹna lẹnvọjọ tọ́n.
9 Mì lẹn to mìde homẹ dọ, ‘Míwlẹ tindo Ablaham taidi otọ́’ blo.+ Na yẹn dọna mì dọ Jiwheyẹwhe penugo nado de ovi lẹ tọ́n na Ablaham sọn zannu ehelẹ mẹ.
10 Asiọvi lọ ko tin to adọ̀ atin lẹ tọn go. Enẹwutu, atin depope he ma sẹ́n sinsẹ́n dagbe na yin sinsánliai bo yin zizedlan miyọ́n mẹ.+
11 Na yẹn tọn, yẹn yí osin do baptizi mì, na lẹnvọjọ mìtọn wutu,+ ṣigba mẹhe ja to godo ṣie dohuhlọn hú mi, afọpa mẹhe tọn yẹn ma jẹ nado de.+ Omẹ enẹ wẹ na yí gbigbọ wiwe+ po miyọ́n po do baptizi mì.+
12 Fẹli núfúfú tọn etọn tin to alọ etọn mẹ, podọ e na zà likun-flétẹn etọn wé-ṣeke bo na bẹ likun etọn pli do agbànhọ mẹ, ṣigba ofló lẹ wẹ e na yí miyọ́n he ma sọgan yin ṣíṣí do fiọ.”+
13 Whenẹnu wẹ Jesu wá sọn Galili bo yì Johanu dè to Jọdani, nado sọgan yin bibaptizi gbọn ewọ dali.+
14 Ṣigba, Johanu tẹnpọn nado glọnalina ẹn, bo dọmọ: “Yẹn wẹ tindo nuhudo nado yin bibaptizi gbọn hiẹ dali, bọ hiẹ ka to dè e wá?”
15 Jesu gblọnna ẹn dọmọ: “Gbọ e ni yì domọ todin, na mọ wẹ e jẹna mí do nado wà nuhe yin dodo lẹpo.” Enẹgodo, e masọ glọnalina ẹn ba.
16 To whenuena Jesu ko yin bibaptizi godo, e tọ́n sọn osin lọ mẹ to afọdopolọji; podọ pọ́n! olọn hùndonuvo,+ bọ e* mọ gbigbọ Jiwheyẹwhe tọn to tejẹ ja e ji taidi apoe de.+
17 Pọ́n! Ogbè de sọ wá sọn olọn+ bo dọmọ: “Ehe wẹ Visunnu ṣie,+ mẹyiwanna lọ, mẹhe yẹn ko kẹalọyi.”+
