Zefania 1:1-18
1 Ohó Jehovah tọn he wá Zefania* visunnu Kuuṣi tọn, visunnu Gedalia tọn, visunnu Amalia he yin visunnu Hẹzekia tọn dè to azán Josia+ visunnu Amọni,+ ahọlu Juda tọn lẹ gbè dọmọ:
2 “Yẹn na zà nulẹpo sẹ̀ mlẹnmlẹn sọn nukunmẹ aigba tọn ji,” wẹ Jehovah dọ.+
3 “Yẹn na zà gbẹtọ po kanlin po sẹ̀.
Yẹn na zà ohẹ̀ agahomẹ tọn lẹ po whèvi hùmẹ tọn po sẹ̀,+Gọna zannu ahlida tọn*+ lẹ po mẹylankan lẹ po;Yẹn nasọ de gbẹtọvi sẹ̀ sọn nukunmẹ aigba tọn ji,” wẹ Jehovah dọ.
4 “Yẹn na dlẹnalọ ṣie sọta JudaPodọ sọta mẹhe nọ nọ̀ Jelusalẹm lẹpo,Bo na súnsún ohia* Baali tọn lẹpo sẹ̀ sọn fi,+Yèdọ oyín yẹwhenọ yẹwhe jonọ lẹ tọn lẹ po yẹwhenọ lẹ po,+
5 Gọna mẹhe nọ dẹ́ do odò to họta hlan awhànpa olọn tọn lẹ,+Podọ yé mẹhe nọ dẹ́ do odò bo nọ dopà nugbonọ-yinyin tọn hlan Jehovah+To whenue yé sọ to opà nugbonọ-yinyin tọn do hlan Malkami;+
6 Podọ mẹhe nọ lẹkọ sọn Jehovah hihodo mẹ+Bo ma nọ dín Jehovah kavi kannubiọ sọn e dè lẹ.”+
7 Mì nabọẹ to Oklunọ Nupojipetọ Jehovah nukọn, na azán Jehovah tọn ko sẹpọ.+
Jehovah ko wleawuna avọ́sinsan de; e ko klan mẹhe e basi oylọna lẹ do wiwe.
8 “To azán he gbè Jehovah na sanvọ́, yẹn na hẹn ahọvi lẹ nado dogbè,Yèdọ visunnu ahọlu tọn lẹ+ gọna mẹhe do avọ̀ jonọ tọn lẹpo.
9 Yẹn na hẹn mẹhe nọ hẹ oplò* ji lẹpo nado dogbè to azán enẹ gbè,Yèdọ yé mẹhe nọ yí danuwiwa po oklọ po do gọ́ owhé ogán yetọn tọn gbè.
10 To azán enẹ gbè,” wẹ Jehovah dọ,“Avigbè na yin sisè sọn Họngbo Whèvi tọn lọ kọ̀n,+Bọ avihàn na yin sisè sọn adà awetọ tòdaho lọ tọn mẹ,+Podọ núgbigbà daho de sọn okọ́ta lẹ ji.
11 Mì doavihàn, mì mẹhe nọ nọ̀ Maktẹṣi* lẹ,Na ajọtọ* lẹpo wẹ ko yin hùhù;*Mẹhe nọ jlẹ fataka namẹ lẹpo wẹ ko yin huhusudo.
12 To ojlẹ enẹ mẹ, yẹn na yí miyọ́ngbán lẹ do keje Jelusalẹm po sọwhiwhe po,Bo na hẹn mẹhe yin vọdonanutọ lẹ* nado dogbè, yèdọ mẹhe nọ dọ to ahun yetọn mẹ dọ,‘Jehovah ma na wà dagbe, mọ e ma na wà oylan.’+
13 Adọkunnu yetọn na yin bibẹ yì di ogblànnu bọ owhé yetọn lẹ na yin gbigbakija.+
Yé na gbá ohọ̀ lẹ, ṣigba yé ma na nọ yé mẹ;Yé nasọ do vẹngle lẹ, ṣigba yé ma na nù ovẹn sọn yé mẹ.+
14 Azán daho Jehovah tọn ko sẹpọ!+
E ko sẹpọ podọ e to dindọnsẹpọ po awuyiya daho po!*+
Nudidọ azán Jehovah tọn tọn dobu.+
Awhànfuntọ na dawhá to azán enẹ gbè.+
15 Azán adi tọn de wẹ azán enẹ,+Azán ayimajai po awufiẹsa po tọn,+Azán yujẹhọn po vọjijẹ po tọn,Azán zinvlu po zinvlu gọ́ngọ́n po tọn,+Azán aslọ lẹ po zinvlu titli po tọn,+
16 Yèdọ azán azò kúnkún po awhágbe awhàn tọn de po tọn wẹ,+Sọta tòdaho gángán lẹ podọ sọta atọ̀họ̀ yiaga agosu mẹ tọn lẹ.+
17 Yẹn na hẹn ayimajai wá gbẹtọvi lẹ ji,Bọ yé na nọ zinzọnlin taidi nukuntọ́nnọ lẹ,+Na Jehovah wẹ yé ko waylando sọta.+
Ohùn yetọn na yin kinkọnyinai taidi kọ́gudu,Podọ agbasalan* yetọn taidi omí.+
18 Fataka kavi sika yetọn ma na penugo nado whlẹn yé to azán adi Jehovah tọn gbè;+Na aigba pete na yin fifiọ gbọn miyọ́n zohunhun etọn tọn dali,+Na ewọ na hẹn vasudo de wá, yèdọ vasudo sinsinyẹn de wá mẹhe nọ nọ̀ aigba ji lẹpo ji.”+
Nudọnamẹ Odò Tọn
^ Zẹẹmẹdo “Jehovah Ko Whlá (Wlebòna).”
^ E họnwun dọ, núzinzan kavi nuwiwa he tindo kanṣiṣa hẹ boṣiọ-sinsẹ̀n lẹ wẹ.
^ Kavi “pipotọ.”
^ Kavi “pèkán.” Vlavo oplò he ji ofìn ahọlu tọn tin te.
^ To paa mẹ, “nùbọdo na.”
^ Ehe na ko to alọdlẹndo awà Jelusalẹm tọn he sẹpọ Họngbo Whèvi tọn kọ̀n.
^ Kavi “ajọwatọ.”
^ To paa mẹ, “mẹhe nọ siọ yìdo to whàwhá yetọn ji lẹ,” taidi to ovẹn-dò de mẹ.
^ Kavi “to unklẹn ja po wezun po!”
^ To paa mẹ, “adọ̀vi.”
