Zekalia 13:1-9
13 “To azán enẹ gbè, dotọ̀ de na yin kùnkùn na owhé Davidi tọn podọ na mẹhe nọ nọ̀ Jelusalẹm lẹ nado klọ́ yede sọn ylando po mawé po mẹ.+
2 “To azán enẹ gbè,” wẹ Jehovah awhànpa lẹ tọn dọ, “yẹn na súnsún yinkọ boṣiọ lẹ tọn sẹ̀ sọn aigba lọ ji,+ yé ma nasọ yin finflin gbede ba; yẹn nasọ de yẹwhegán lẹ po gbigbọ mawé tọn po sẹ̀ sọn aigba lọ ji.+
3 Podọ eyin mẹde sọ vọ́ dọ dọdai janwẹ, otọ́ po onọ̀ etọn he ji i po na dọna ẹn dọ, ‘Hiẹ ma na nọgbẹ̀, na a ko dolalo to oyín Jehovah tọn mẹ.’ Otọ́ po onọ̀ etọn he ji i po nasọ sọnú in luntọ́n, na e dọ dọdai wutu.+
4 “To azán enẹ gbè, numimọ yẹwhegán he to dọdai dọ lẹ tọn na nọ huwinyan na dopodopo yetọn; yé ma nasọ nọ do awugbó vonọtaun ofúnnọ+ nado klọmẹ ba.
5 Ewọ nasọ nọ dọ dọ, ‘Yẹn ma yin yẹwhegán de. Glesi de wẹ yẹn, na dawe de wẹ họ̀ mi sọn ovu whenu ṣie.’
6 Eyin mẹde sọ kanse e dọ, ‘Apà tẹwẹ yin ehelẹ to agbasa towe go?’* ewọ na gblọn dọ, ‘Apà he yè do go e to ohọ̀ họntọn ṣie* lẹ tọn mẹ lẹ wẹ.’”
7 “Ohí E, fọ́n do lẹngbọhọtọ ṣie ji,+Yèdọ do sunnu lọ he yin gbẹdohẹmẹtọ ṣie ji,” wẹ Jehovah awhànpa lẹ tọn dọ.
“Linú lẹngbọhọtọ lọ+ bo gbọ lẹngbọpa lọ* ni gbàdo;+Yẹn nasọ lilẹ́ alọ ṣie do dehe yin gbẹ́gọ́nu lẹ ji.”
8 “Podọ to aigba lọ pete ji,” wẹ Jehovah dọ,“Adà awe na yin sinsánsẹ sọn e mẹ bo na dọ̀n;*Adà atọ̀ntọ nasọ yin jijodo to e mẹ.
9 Yẹn nasọ hẹn adà atọ̀ntọ lọ jugbọn miyọ́n mẹ;Podọ n’na klọ́ yé wé dile yè nọ klọ́ fataka wé do,Bo na gbeje yé pọ́n dile yè nọ gbeje sika pọ́n do.+
Yé na dawhá ylọ oyín ṣie,Yẹn nasọ siọ yé.
Yẹn na dọ dọ, ‘Omẹ ṣie lẹ wẹ yé,’+
Bọ yewlẹ na dọ dọ, ‘Jehovah wẹ Jiwheyẹwhe mítọn.’”
Nudọnamẹ Odò Tọn
^ To paa mẹ, “to awà towe lẹ ṣẹnṣẹn?” Enẹ wẹ, to akọ́nnu kavi to nẹgbé.”
^ Kavi “mẹhe yiwanna mi.”
^ Kavi “lẹngbọ lẹ.”
^ Kavi “kú.”
