To 23 mai 2023, ahọluzọnwatọ nukundeji États-Unis tọn de he yin dide do whẹho agbasalilo tọn lẹ ji, na avase to gbangba dọ gbẹdido to Intẹnẹt ji to awugble sinsinyẹn hẹnwa na jọja susu.

•    “Dile etlẹ yindọ ovi lẹ po jọja aflanmẹ delẹ po nọ mọaleyi sọn nọtẹn gbẹdido Intẹnẹt ji tọn lẹ yiyizan mẹ, nususu wẹ dohia dọ nọtẹn mọnkọ lẹ sọgan sọ yinuwado apọ̀n po dagbemẹninọ ovi gọna jọja aflanmẹ lẹ tọn po ji to aliho he ylan taun mẹ.”—Sọn linlin avase tọn Social Media and Youth Mental Health: The U.S. Surgeon General’s Advisory, 2023 tọn mẹ.

 Linlin avase tọn lọ slẹ dodinnanu he yin bibasi delẹ di kunnudenu nado dohia dọ yè dona na ayidonugo whẹho ehe.

•    Jọja aflanmẹ he to gblagbla owhe 12 jẹ 15 tọn mẹ “bo nọ zan hugan gànhiho 3 egbesọegbesọ nado dogbẹ́ to Intẹnẹt ji lẹ sọgan yawu bẹ apọ̀nmẹ-zọ̀n, bọ ohia apọṣimẹ po lẹnpọn po tọn lẹ gán jẹ didedo yé ji.”

•    Ovi he do owhe 14 “bo nọ yí whenu zan zẹjlẹgo nado dogbẹ́ to Intẹnẹt ji lẹ nọ jiya amlọnmamọdọ po nukunvandomẹ to Intẹnẹt ji po tọn, nọ mọdọ nude jẹdò to awusọhia yetọn go, nọ mọ ovọ́ mẹ na yede, podọ ohia apọṣimẹ tọn sinsinyẹn lẹ sọ nọ dedo yé, ehe nọ gando jọja yọnnu lẹ go taun hú jọja sunnu lẹ.”

 Nawẹ mẹjitọ lẹ gán whlẹn ovi yetọn lẹ sọn owù enẹlẹ mẹ gbọn? Biblu bẹ ayinamẹ delẹ hẹn he nọ gọalọ taun.

 Mì nọ do ojlo to nuhe wà yé te mẹ. Taidi mẹjitọ, mì dona lẹnnupọndo owù he to e mẹ lẹ ji bo basi nudide eyin vlavo ovi mìtọn sọgan dogbẹ́ hẹ mẹdevo lẹ to Intẹnẹt ji kavi lala.

•    Ayinamẹ Biblu tọn: “Plọn ovi do aliho he ewọ dona gbọn ji.”—Howhinwhẹn lẹ 22:6, po nudọnamẹ odò tọn po.

•    Eyin a jlo na yọ́n nususu dogọ, hia hosọ lọ “Be E Jẹ Dọ Ovi Ṣie Ni Zan Nọtẹn Gbẹdido Intẹnẹt Ji Tọn lẹ Ya?”

 Eyin a basi dide nado dike ovi towe ni nọ dogbẹ́ hẹ mẹlẹ to Intẹnẹt ji, a dona to aṣeji taun gando owù he enẹ gán hẹn plá ẹ lẹ go bo nọ tẹnpọn nado yọ́n nue ovi towe nọ wà to Intẹnẹt ji lẹ. Gbọnna?

 Basi hihọ́na ovi towe sọn nue gán gbleawuna ẹn to Intẹnẹt ji lẹ si. Plọn ovi towe nado nọ doayi nuhe bẹ owù hẹn to Intẹnẹt ji lẹ go po lehe e na nọ dapana yé do po.

•    Ayinamẹ Biblu tọn: “Mì gbọ fẹnnuwiwa zanhẹmẹ tọn po mawé wunmẹ lẹpo po kavi nukunkẹn ni ma tlẹ yin nùdego to ṣẹnṣẹn mìtọn blo, . . . mọdopolọ, walọ he huwinyan kavi hodidọ nulú tọn kavi aslan gblewa tọn.”—Efesunu lẹ 5:3, 4.

•    Nado mọ ayinamẹ he na gọalọna we lẹ, hia hosọ lọ “Protégez votre adolescent des dangers des réseaux sociaux,” ehe tin to Flansegbe mẹ.

 Nọ ze dogbó lẹ dai. Di apajlẹ, nọ dosẹ́n lẹ gando ojlẹ he mẹ ovi towe na nọ yì nọtẹn Intẹnẹt tọn enẹlẹ ji te gọna whenu nẹmu he e na yizan to e ji go.

•    Ayinamẹ Biblu tọn: “Mì nọ payi tlala dọ lehe mì to zọnlinzin do ni [yin] taidi nuyọnẹntọ lẹ, mì nọ yí whenu mìtọn zan to aliho dagbe hugan mẹ.”—Efesunu lẹ 5:15, 16.

•    Yí video yẹdide ṣiṣavi tọn lọ Nọ Aṣeji Gando Họntọnjiji to Intẹnẹt Ji Go zan do gọalọna ovi towe nado yọ́n nuhewutu e yin dandan nado ze dogbó lẹ dai.