Be Nuhahun Akuẹ Ma Mọ Zan Tọn Na Wá Pọnte Ya?
To otò susu lẹ mẹ, gbẹtọ lẹ nọ fọngu gbọn ali lẹ ji, na yé nọ mọdọ lehe akuẹzinzan to yìyì do to otò lọ mẹ ma yọ́n wutu. Azọ̀nylankan COVID-19 tọn tlẹ sọ wá hẹn nulẹ vantan, na mẹlẹ yin ginglọndo whégbè, podọ núdùdù whèdomẹ po nukunpedomẹgo dotowhé tọn he mẹlẹ ma to mimọ ganji po ko hẹn vogbingbọn he to akuẹnọ po hẹntọnọ lẹ po ṣẹnṣẹn họnwun hezeheze.
Be nuhahun akuẹ ma mọ zan tọn he zọ́n bọ gbẹtọ lẹ to yaji badabada na wá doalọte gbede ya? Gbau. Biblu dọhodo nuhe Jiwheyẹwhe na wà nado didẹ nuhahun he mí to pipehẹ lẹ ji.
Nuhahun akuẹ ma mọ zan tọn he Jiwheyẹwhe na didẹ lẹ
Nuhahun: Gbẹtọvi lẹ ma ko ze tito akuẹzinzan tọn dagbe de dai he na hẹn pekọ wá na gbẹtọ lẹpo.
Pọngbọ: Jiwheyẹwhe na yí gandudu etọn do diọtẹnna gandudu gbẹtọvi tọn lẹ, yè nọ ylọ gandudu enẹ dọ Ahọluduta Jiwheyẹwhe tọn. E na dugán sọn olọn mẹ do aigba blebu ji.—Daniẹli 2:44; Matiu 6:10.
Ale he e na hẹnwa: Na Ahọluduta Jiwheyẹwhe tọn na dugán do aigba blebu ji wutu, e na penukundo nulẹ go to aliho pipé mẹ. Gbẹtọ lẹ ma nasọ jẹhẹ́n gbede ba mọ nude ma nasọ whèdo yé. (Salmu lẹ 9:7-9, 18) Kakatimọ, yé na duvivi ale azọ́n yetọn lẹ tọn bo nasọ tindo pekọ nujọnu tọn po whẹndo yetọn lẹ po. Biblu dopà dọ: “Yé na gbá ohọ̀ lẹ bo nasọ nọ nọ̀ yé mẹ, yé na do vẹngle lẹ bo nasọ nọ dù sinsẹ́n yetọn. Yé ma na gbá bọ mẹdevo na wá nọ e mẹ, mọ yé ma na do bọ mẹdevo na wá dù.”—Isaia 65:21, 22.
Nuhahun: Gbẹtọ lẹ ma gán họ̀ngán sọn nujijọ he nọ hẹn yajiji po hudo wá lẹ po si.
Pọngbọ: Jiwheyẹwhe na yí Ahọluduta etọn zan nado de obu po nuhe nọ hẹn sijọsijọ wá lẹ po sẹ̀.
Ale he e na hẹnwa: To anademẹ gandudu Jiwheyẹwhe tọn glọ, gbẹtọvi lẹ ma nasọ jiya ba mọ whẹndo yetọn ma na hẹn nuhe sin hudo yé do nado nọgbẹ̀ lẹ bu. Di apajlẹ, awhàn, núdùdù whèdomẹ po azọ̀nylankan lẹ po na lẹzun otàn. (Salmu lẹ 46:9; 72:16; Isaia 33:24) Jiwheyẹwhe dọ dọ: “Omẹ ṣie lẹ na nọ nọ̀ lẹdo jijọho tọn de mẹ, to fininọ he tindo hihọ́ lẹ podọ to gbọjẹtẹn he vò fẹẹ lẹ mẹ.”—Isaia 32:18.
Nuhahun: Ṣejannabinọ lẹ po nukunkẹnnọ lẹ po nọ saba yinuwa hẹ gbẹtọ lẹ to aliho agọ̀ mẹ.
Pọngbọ: Mẹhe na nọ Ahọluduta Jiwheyẹwhe tọn glọ lẹ na plọn nado nọ do owanyi nujọnu tọn hia mẹdevo lẹ bo ma na yin ṣejannabinọ.—Matiu 22:37-39.
Ale he e na hẹnwa: Whenue Ahọluduta Jiwheyẹwhe tọn na to gandu, mẹlẹpo na nọ do owanyi Jiwheyẹwhe tọn nkọ he “ma nọ dín ale edetiti tọn lẹ” hia. (1 Kọlintinu lẹ 13:4, 5) Biblu dọ dọ: “Yé ma na nọ gbleawunamẹ paali kavi hẹn husudo depope wá to osó wiwe ṣie pete ji, na e họnwun dọ aigba na gọ́ na oyọnẹn Jehovah a tọn dile osin ṣinyọ́n ohù ji do.”—Isaia 11:9.
Biblu dohia dọ mí to gbẹ̀nọ to azán godo tọn titonu ehe tọn lẹ mẹ, podọ Jiwheyẹwhe na hẹn opagbe etọn lẹ di bo na hẹn opodo wá na nuhahun akuẹ ma mọ zan tọn lẹpo. b (Salmu lẹ 12:5) Amọ́ todin whẹ́, ayinamẹ Biblu tọn lẹ gán gọalọna we nado duto nuhahun akuẹ ma mọ zan tọn he pehẹ a te lẹ ji. Di apajlẹ, hia hosọ ehelẹ nado mọ ayinamẹ delẹ: “Lehe A Gán Dowéna Akuẹ Do” po “L’argent et vous” po.
a Jehovah wẹ yinkọ Jiwheyẹwhe tọn dile Biblu dohia do.—Salmu lẹ 83:18.
b Eyin a jlo na yọ́n nuhewutu a gán dejido Biblu go, pọ́n hosọ lọ “Biblu—Owe He Nọ Dọ Nugbo.”
A Gán Sọ Pọ́n Hosọ Ehelẹ
ATỌ̀HỌ̀-NUHIHỌ́ LỌ TỌN
Dagbe Tẹwẹ Ahọluduta Jiwheyẹwhe Tọn Na Wà?
Jesu yọnẹn dọ Ahọluduta Jiwheyẹwhe tọn kẹdẹ wẹ gán didẹ nuhahun gbẹtọvi lẹ tọn. Etẹwẹ Ahọluduta lọ ko wà nado hẹn mí deji dọ e na jla nulẹ do?
ZẸẸMẸ WEFỌ BIBLU TỌN LẸ TỌN
Zẹẹmẹ Matiu 6:34 Tọn—“Mì Hanú Na Osọ He Ja Blo”
Jesu ma to didọ dọ mí ni ma basi tito lẹ hlan sọgodo blo.
ATỌ̀HỌ̀-NUHIHỌ́ LỌ TỌN
Be E Na Wá Yọnbasi bọ Ohẹ́n Ma Na Tin to Aihọn mẹ Ya?
Mẹnu wẹ sọgan doalọtena ohẹ́n?
