To hosọ he wayi mẹ, mí dọhodo ohia he Jesu na lẹ ji. Ohia lọ lẹ yin kunnudenu dọ Ahọluduta Jiwheyẹwhe tọn ko yin didoai to olọn mẹ bọ Jesu Klisti wẹ Ahọlu lọ.

Biblu dohia dọ tlolo he Jesu hẹ gánzinpo ji, e yàn Satani po aovi lẹ po sọn olọn mẹ. Enẹwutu, aigba ji wẹ huhlọn yetọn pẹ̀n do todin, abajọ nulẹ fọ́n bo to yinylan sọn 1914.—Osọhia 12:7, 9.

Dile etlẹ yindọ nulẹ fọ́n bo to gbigble to aihọn mẹ, Jesu he yin Ahọlu Ahọluduta lọ tọn ko wà nususu nado gọalọna gbẹtọvi lẹ to aigba ji. Sọgbe hẹ nuhe Jesu ko dọ wayi, mẹsusu wẹ to Biblu plọn bo nọ yí nuhe e dọ lẹ do yizan mẹ egbesọegbesọ. (Isaia 2:2-4) Gbẹtọ livi susu wẹ ko plọn ma nado yin kanlinmọ na azọ́n, nado do ayajẹ to whẹndo mẹ, bo ze akuẹ po nutindo lẹ po do otẹn yetọn mẹ. Nuplọnmẹ dagbe enẹlẹ zọ́n bọ gbẹzan yetọn pọnte podọ to osọ yé na yin dopo to mẹhe na nọ gandudu Jiwheyẹwhe tọn glọ lẹ mẹ.

Nugbo wẹ dọ Jesu ko to gandu to olọn mẹ, amọ́ gbẹtọvi lẹ gbẹ́ to gandu to aigba ji. Ṣigba, Jiwheyẹwhe ko degbena Jesu dọ: “Yì bo to awhàngba to kẹntọ towe lẹ ṣẹnṣẹn.” (Salmu lẹ 110:2) To madẹnmẹ, Jesu na và kẹntọ lẹpo bọ gbẹtọvi tonusetọ lẹ na vò.

Zande din, Ahọluduta lọ na

• De sinsẹ̀n lalo lẹpo sẹ̀. Sinsẹ̀n he ko dolalo na mẹlẹ bo hẹn ogbẹ̀ vẹawuna yé lẹ na busẹ. Biblu yí sinsẹ̀n lalo jlẹdo yọnnu galọtọ de go. Vasudo etọn na paṣa mẹsusu.—Osọhia 17:15, 16.

• De gandudu gbẹtọvi tọn lẹpo sẹ̀. Ahọluduta Jiwheyẹwhe tọn na hẹn gandudu gbẹtọvi tọn lẹpo wá opodo.—Osọhia 19:15, 17, 18.

• Sukúndona mẹylankan lẹ. Etẹwẹ Jiwheyẹwhe na wà na mẹylankan he ma jlo na lẹnvọjọ lẹ? “Ṣigba, na mẹylankan lẹ tọn, yé na yin sinsánsẹ sọn aigba ji.”—Howhinwhẹn lẹ 2:22.

• Và Satani po aovi lẹ po sudo. Satani po aovi lẹ po ma nasọ “klọ akọta lẹ ba.”—Osọhia 20:3, 10.

Dagbe tẹlẹ wẹ mẹhe nọgodona Ahọluduta Jiwheyẹwhe tọn lẹ na mọyi sọn diọdo voovo ehelẹ mẹ?

Na Jesu yin Ahọlu to olọn mẹ wutu, dona he e na hẹnwa lẹ na sù taun hú nuhe gandudu gbẹtọvi tọn depope gán wà. Omẹ 144 000 sọn gbẹtọvi lẹ mẹ wẹ na nọpọ́ hẹ ẹ do dugán. (Osọhia 5:9, 10; 14:1, 3) Jesu na hẹn diun dọ ojlo Jiwheyẹwhe tọn yin wiwà to aigba ji. Dona tẹlẹ wẹ Ahọluduta lọ na hẹnwa na gbẹtọvi lẹ?

• Azọ̀n po okú po na busẹ. “Depope to mẹhe nọ nọ̀ aigba lọ ji lẹ mẹ ma na dọmọ: ‘N’to azọ̀njẹ,’” podọ “okú ma nasọ tin ba.”—Isaia 33:24; Osọhia 21:4.

• Jijọho nujọnu tọn po hihọ́ po na tin. “Jijọho visunnu towe lẹ tọn nasọ gọfla,” bọ “mẹdopodopo na nọ sinai to vẹntin etọn glọ podọ to ovòtin etọn glọ, bọ mẹde ma na nọ dobuna yé.”—Isaia 54:13; Mika 4:4.

• Mẹlẹpo wẹ na mọ azọ́n dagbe. “Mẹdide ṣie lẹ na nọ duvivi azọ́n alọ yetọn lẹ tọn to gigọ́ mẹ. Yé ma na jẹtukla to ovọ́ mẹ.”—Isaia 65:22, 23.

• Aigba na gọwá ninọmẹ dagbe mẹ. “Danfafa po aigba-klo po na jẹaglin, bọ dankló na jaya bo na gbàsẹ́ di vounvoun gbémẹ tọn.”—Isaia 35:1.

• Gbẹtọvi lẹ na plọn nuhe yé dona wà nado nọgbẹ̀. “Ehe wẹ ogbẹ̀ madopodo, dọ yé ni wá yọ́n hiẹ Jiwheyẹwhe nugbo dopo kẹdẹ lọ, podọ mẹhe hiẹ dohlan, yèdọ Jesu Klisti.”—Johanu 17:3.

Dona he Jiwheyẹwhe to dindin na we lẹ niyẹn. (Isaia 48:18) Hosọ he bọdego na dọ nuhe a dona wà nado mọ dona lọ lẹ.