Ayinamẹ susu lẹ wẹ tin gando whẹho ehe go. Ṣigba, e ma yin yemẹpo wẹ nọ gọalọ. Di apajlẹ, mẹdelẹ sọgan dọna we dọ a ni ma viavi kavi do numọtolanmẹ towe hia to aliho depope mẹ blo. To alọ devo mẹ, mẹdevo lẹ sọgan na tuli we nado viavi bo do numọtolanmẹ towe lẹpo hia. Biblu do pọndohlan jlẹkaji tọn de hia gando whẹho ehe go, ehe dodinnanutọ agọe tọn lẹ nọgodona.

To aṣa delẹ mẹ, yè nọ mọdọ madogán wẹ e yin na sunnu de nado viavi. Ṣigba, be winyannu wẹ e yin nugbo nado viavi, etlẹ yin to gbangba ya? Doto he nọ penukundo apọ̀nmẹzọ̀n go lẹ dohia dọ avi yin apadewhe awubla tọn. Podọ awubla sọgan wá gọalọna we ma nado gbọjọ mahopọnna lehe nujijọ lọ yinuwado ji we do sọ. Etomọṣo, awubibla zẹjlẹgo sọgan hẹn nulẹ ylan dogọ. Biblu ma nọgodona linlẹn lọ dọ madogán wẹ e yin nado nọ viavi to awubla whenu gba. Di apajlẹ, lẹnnupọndo Jesu ji. Mahopọnna dọ e tindo huhlọn nado fọ́n oṣiọ lẹ sọnku, e viavi to gbangba na okú họntọn vivẹ́ etọn Lazalọsi tọn wutu!​—Johanu 11:33-35.

Homẹgble nọ saba zọnpọ hẹ awubla, titengbe to okú madonukun de godo. Whẹwhinwhẹ́n susu wẹ sọgan zọ́n bọ mẹhe to aluẹmẹ de na gblehomẹ, taidi to whenue mẹhe yè nọ na sisi de wá to nuhe ma sọgbe bo ma jlọmẹdote lẹ dọ. Dawe de he nọ yin Mike to Afrique du Sud basi zẹẹmẹ dọmọ: “Owhe 14 poun wẹ n’tindo to whenue otọ́ ṣie kú. To ṣiọdidi lọ whenu, sinsẹ̀ngán ṣọṣi Anglicane tọn lọ dọ dọ Jiwheyẹwhe tindo nuhudo mẹdagbe lẹ tọn bo nọ yawu ylọ yé. * Ehe hẹn homẹgble mi na mí do hudo otọ́ mítọn tọn taun. E ko yì owhe 63 todin, ṣigba e gbẹ́ nọ vẹna mi.”

Etẹwẹ dogbọn numọtolanmẹ whẹhuhu tọn dali? Titengbe to okú madonukun de godo, mẹhe to aluẹmẹ lọ sọgan nọ to lewu mapote dọ ‘eyin n’ko wà ehe kavi enẹ wẹ, e ma na ko jọ.’ Kavi e sọgan yindọ whenue a mọ mẹhe kú lọ gbọngodo, mì tindo wiwọ́ wẹ. Enẹ sọgan yidogọna numọtolanmẹ whẹhuhu tọn towe.

Eyin numọtolanmẹ whẹhuhu kavi homẹgble tọn mọnkọtọn to tuklado we, nujọnu wẹ e yin ma nado hlá ẹ do homẹ. Kakatimọ, dọhodeji hẹ họntọn de he na dotoaina we bo na hẹn we deji dọ susu mẹhe to aluẹmẹ lẹ tọn wẹ nọ tindo numọtolanmẹ agọ̀ mọnkọtọn lẹ. Biblu flinnu mí dọmọ: “Họntọn nugbo nọ yiwannamẹ to whelẹponu, podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.”​—Howhinwhẹn lẹ 17:17.

Họntọn dagbe hugan he mẹhe to aluẹmẹ de sọgan tindo wẹ Mẹdatọ mítọn, Jehovah Jiwheyẹwhe. Nọ dọ nuhe to ahun ji na we lẹpo na ẹn to odẹ̀ mẹ, na “e to [towe] hòpọn wutu.” (1 Pita 5:7) Humọ, e dopà na mẹhe nọ wàmọ lẹpo dọ “jijọho Jiwheyẹwhe tọn he yiaga hugan linlẹn lẹpo” na miọnhomẹna yé. (Filipinu lẹ 4:6, 7) Podọ, nọ na dotẹnmẹ Jiwheyẹwhe nado hẹn we jẹgangan gbọn Ohó homẹmiọnnamẹ tọn etọn, Biblu dali. Basi kandai wefọ homẹmiọnnamẹ tọn delẹ tọn. (Pọ́n  apotin he to weda ehe ji.) A tlẹ sọgan plọn delẹ to  yé mẹ do tamẹ. Nulinlẹnpọn do wefọ mọnkọtọn lẹ ji sọgan gọalọna we titengbe to whenue a to dewe ṣo bo ma mọ amlọndọ to zánmẹ.​—Isaia 57:15.

To agọe, Jack he tindo owhe 40 sin asi bẹ azọ̀n kansẹẹ tọn bo kú. Jack dọ dọ to ojlẹ delẹ mẹ, emi nọ mọ emide to ṣokẹdẹ. Ṣigba, odẹ̀ gọalọna ẹn. E dọmọ: “Eyin n’hodẹ̀ hlan Jehovah, n’masọ nọ lẹn paali dọ n’to ṣokẹdẹ ba. N’nọ saba fọ́n to zánhomẹ bo masọ nọ penugo nado damlọn ba. Amọ́, eyin n’hia linlẹn homẹmiọnnamẹ tọn lẹ sọn Owe-wiwe lẹ mẹ bo lẹnayihamẹpọn do yé ji bosọ dọ nuhe tin to ahun ji na mi lẹ tọ́n to odẹ̀ mẹ, n’nọ tindo jijọho nujọnu tọn, ehe nọ hẹn ayiha ṣie jai bo nọ hẹn mi penugo nado gọ̀ amlọndọ.”

Awhli de he nọ yin Vanessa sin onọ̀ bẹ azọ̀n bo kú. Ewọ lọsu tindo numimọ huhlọn odẹ̀ tọn. E dọmọ: “To ojlẹ sinsinyẹn hugan ṣie lẹ mẹ, n’nọ dawhá ylọ yinkọ Jehovah tọn poun bo nọ bẹ avi. Jehovah nọ sè odẹ̀ ṣie lẹ bo nọ na mi huhlọn he sin nuhudo n’tindo.”

Mẹdelẹ he nọ na ayinamẹ mẹhe to aluẹmẹ lẹ nọ na tuli mẹhe to pipehẹ awubla lẹ nado nọ gọalọna mẹdevo lẹ kavi nọ ze yede jo na nuwiwa pọmẹ tọn lẹ. Mọwiwà sọgan hẹn ayajẹ wá na yé bo na de awubla yetọn pò. (Owalọ lẹ 20:35) Klistiani susu he to aluẹmẹ lẹ ko mọdọ alọgigọna mẹdevo lẹ nọ miọnhomẹnamẹ taun.​—2 Kọlintinu lẹ 1:3, 4.