Mẹsusu nọ dọ dọ sọgodo mẹhe sewé ganji bo do adọkun lẹ tọn nọ pọnte. Yé yise dọ mẹhe yì wehọmẹ alavọ tọn lẹ nọ yin azọ́nwatọ dagbe, tòvi dagbe bọ whẹndo yetọn nọ vò. Linlẹn devo wẹ yindọ mẹhe plọnwe ganji lẹ wẹ nọ mọ azọ́n he pekuẹ lẹ bọ mẹhe do akuẹ lẹ wẹ nọ do ayajẹ.

Dawe de he nọ yin Zhang Chen bo wá sọn Chine dọ dọ: “N’lẹndọ eyin n’yì wehọmẹ alavọ tọn bo fó, oyà ṣie na gbọ. Podọ eyin n’mọ azọ́n he pekuẹ, n’na vò bo do ayajẹ.”

Mẹsusu wẹ nọ jlo na yì wehọmẹ alavọ tọn he diyin lẹ, etlẹ gán yin to tògodo, na ogbẹ̀ yetọn nido pọnte. Azọ̀nylankan COVID-19 he hẹn tomẹyiyi vẹawu wẹ zọ́n bọ ehe do depò. Linlin 2012 tọn de dọ dọ: “Hugan mado-awe mẹhe to weplọn to tògodo lẹ tọn wẹ yin Asie-nu.” (L’Organisation de coopération et de développement économiques)

Mẹjitọ lẹ nọ saba yí nususu do sanvọ́, na ovi yetọn lẹ nido yì wehọmẹ alavọ tọn to tògodo. Nuhe dawe de he nọ yin Qixiang bo wá sọn Taïwan dọ die: “Mẹjitọ ṣie lẹ ma do alọnu sọmọ, amọ́ míwu ovi yetọn ẹnẹ lẹpo wẹ yé dohlan wehọmẹ alavọ tọn to États-Unis.” Taidi mẹjitọ Qixiang tọn lẹ, mẹjitọ susu wẹ nọ tlọ biọ ahọ́ mẹ nado penukundo ovi yetọn he to weplọn to tògodo lẹ go.

Wepinplọn gán hẹn ale delẹ wá nugbo. Amọ́, mẹhe yì wehọmẹ lẹ nọ wá mọ to whedelẹnu dọ ovò wẹ emi lẹn, ovò wẹ emi ka wá mọ. Di apajlẹ, mẹlẹ nọ jẹtukla na owhe susu bo nọ yàn akuẹ he yinukunkẹ bo ma nọ wá mọ azọ́n he donukun yé te. Rachel Mui na linlin to owe de mẹ dọ: “Mẹhe fó wehọmẹ alavọ tọn bo ma mọ azọ́n lẹ fọ́n bo to susudeji.” (Owe lọ Singapore’s Business Times) Wesetọ de he nọ yin Jianjie bo nọ nọ̀ Taïwan dọ dọ: “Mẹsusu wẹ ma nọ mọ owe he yé plọn sin azọ́n wà.”

Mẹdelẹ he tlẹ nọ mọ owe he yé plọn sin azọ́n nọ wá dọ dọ e ma yin ogbẹ̀ dagbe he yé lẹn wẹ yé wá mọ. Dawe Thaïlande-nu de he nọ yin Niran yì wehọmẹ alavọ tọn to Royaume-Uni. To whenue e lẹkọ bo mọ azọ́n he sin owe e plọn, e dọmọ: “Whenue n’fó wehọmẹ alavọ tọn, n’mọ azọ́n he pekuẹ taun de nugbo. Amọ́, n’dona to azọ́nwa poun. Dile ojlẹ to yìyì, azọ́nwhé lọ wá yàn mẹsusu bọ yẹnlọsu demẹ. N’wá mọdọ azọ́n de ma do jide.”

Mẹhe tlẹ do adọkun kavi jẹyín dọ emi vò to gbẹ̀mẹ lẹ gbẹ́ nọ do nuhahun to whẹndo mẹ, nọ jẹazọ̀n sinsinyẹn, bo nọ hanú gando akuẹ go. Katsutoshi he wá sọn Japon dọmọ: “N’do adọkun taun, amọ́ e nọ vẹna mi dọ mẹlẹ nọ jlo na whlẹnagbà hẹ mi. Yé nọ whànwu mi bo tlẹ nọ wadanu do mi.” Nawe de he nọ yin Lam bo wá sọn Viêt Nam dọmọ: “Na mẹlẹ jlo na vò to gbẹ̀mẹ wutu, yé nọ to wezunhọ̀n to azọ́n he pekuẹ de godo. Amọ́, susu yetọn wẹ nọ wá pò na nuhiha, azọ̀n, flumẹjijẹ po apọṣimẹ po.”

Taidi Franklin, mẹsusu lẹ wẹ wá mọnukunnujẹemẹ dọ nudevo lẹ sọ to nukọnna wepinplọn po adọkun po. Kakati nado doafọna adọkun, yé nọ tẹnpọn nado yin mẹdagbe bo nọ wà dagbe na mẹhe lẹdo yé lẹ nado do sọgodo dagbe. Amọ́, be e nọ pà yé ya? Mí na mọ gblọndo lọ to hosọ he bọdego mẹ.