Kanbiọ lẹ sọn Wehiatọ lẹ Dè

Be todido depope tin dọ ovi he kúdo homẹ na onọ̀ etọn de na yin finfọnsọnku ya?

E sọgan vẹawuna mẹhe ma ko hẹn ovi bu to aliho ehe mẹ pọ́n lẹ nado yọ́n numọtolanmẹ mẹhe go onú mọnkọtọn jọ do lẹ tọn. Nujijọ mọnkọtọn nọ hẹn mẹjitọ delẹ blawu tlala. Onọ̀ de ko hẹn ovi atọ́n bu to aliho enẹlẹ mẹ pọ́n. To nukọn mẹ, homẹ etọn hùn nado ji sunnu glegbenu awe. Etomọṣo, e gbẹ́ nọ flin ovi he e hẹnbu lọ lẹ dopodopo. Kaka e do kú, e gbẹ́ nọ flin owhe he ovi he e hẹnbu lẹ na ko tindo eyin yé ko gán dai wẹ. Be Klistiani lẹ dona donukun fọnsọnku ovi he kúdo yé to aliho mọnkọtọn mẹ lẹ tọn ya?

Gblọndo lọ poun wẹ yindọ mí ma yọnẹn. Biblu ma dọhodo whẹho fọnsọnku ovi he ohò etọn gble do onọ̀ etọn kavi he kú to ajìdonu lẹ tọn ji tlọlọ gba. Ṣigba Ohó Jiwheyẹwhe tọn bẹ nunọwhinnusẹ́n he gando whẹho ehe go bo sọgan miọnhomẹnamẹ jẹ obá de mẹ lẹ hẹn.

Mì gbọ mí ni lẹnnupọndo kanbiọ awe he gando whẹho ehe go delẹ ji. Tintan, to pọndohlan Jehovah tọn mẹ, whetẹnu wẹ ogbẹ̀ gbẹtọvi tọn nọ bẹjẹeji—to hòmimọ whenu wẹ ya kavi to jijiwhenu? Awetọ, nukun tẹwẹ Jehovah nọ yí do pọ́n ovi he ma ko yin jiji de—taidi gbẹtọ tangan de wẹ ya kavi bẹplidopọ nuvikun tiuntiun lẹ tọn poun to vidọ̀ onọ̀ etọn tọn mẹ? Nunọwhinnusẹ́n Biblu tọn lẹ na gblọndo he họnwun do kanbiọ ehelẹ ji.

Osẹ́n Mose tọn dohia hezeheze dọ ogbẹ̀ mẹde tọn nọ bẹjẹeji sọn hòmimọ whenu gbọ́n, e ma yin to jijiwhenu gba. Gbọnna? E dohia dọ mẹhe hù ovi he ma ko yin jiji sọgan yin hùhù. Doayi osẹ́n ehe go: “Hiẹ na yí gbigbọ na gbigbọ.” a (Eks. 21:22, 23) Gbọnmọ dali, ovi he ma ko yin jiji lọ tin to ogbẹ̀ bosọ yin gbẹtọ gbẹ̀te. Nukunnumimọjẹ nugbo tẹgbẹ tọn enẹ mẹ ko gọalọna Klistiani livi susu nado dapana hòdide, bo nọ pọ́n ẹn hlan taidi ylando sinsinyẹn de do Jiwheyẹwhe.

Mọwẹ, gbẹtọ gbẹ̀te de wẹ ovi he ma ko yin jiji lọ, ṣigba nukun tẹwẹ Jehovah nọ yí do pọ́n ogbẹ̀ etọn? Osẹ́n he go mí donù to aga lọ biọ dọ eyin mẹhe ko whẹ́n mẹho de hẹn okú ovi he ma ko yin jiji de tọn wá, ewọ dona yin hùhù. Enẹwutu, e họnwun dọ ogbẹ̀ ovi he ma ko yin jiji de tọn họakuẹ tlala to nukun Jiwheyẹwhe tọn mẹ. Humọ, wefọ susu wẹ dohia to Biblu mẹ dọ Jehovah nọ pọ́n ovi he ma ko yin jiji de hlan taidi gbẹtọ nujọnu tọn de. Di apajlẹ, Ahọlu Davidi yin gbigbọdo nado dọ gando Jehovah go dọmọ: “Hiẹ wẹ lọ̀n mi dopọ to adọ̀ onọ̀ ṣie tọn mẹ. . . . Nukun towe mọ didá mapemape ṣie: podọ to owe towe mẹ wẹ yè wlan awutugonu ṣie lẹpo do, ehe yè to anà etọn wà egbesọegbesọ.”—Ps. 139:13-16; Job 31:14, 15.

Jehovah sọ nọ mọdọ ovi he ma ko yin jiji de tindo jẹhẹnu tangan lẹ bo sọgan tindo nugopipe vonọtaun to nukọn mẹ. To whenuena Lebeka, asi Isaki tọn tin to ohò ahoho tọn, Jehovah dọ dọdai gando visunnu awe he to ahidi to vidọ̀ etọn mẹ lẹ go, he dohia dọ ewọ ko mọ jẹhẹnu delẹ to yé mẹ he na wá gando mẹsusu go to sọgodo.—Gẹn. 25:22, 23; Lom. 9:10-13.

Whẹho Johanu Baptizitọ lọ tọn sọ jẹna ayidego ga. Kandai owe Wẹndagbe tọn lọ dọmọ: ‘Whenuena Elizabẹti sè nudọdomẹ Malia tọn, ovi whàngo to adọ̀ etọn mẹ; Elizabẹti sọ gọ́ na gbigbọ wiwe.’ (Luku 1:41) To whenue Luku dotozọ́nwatọ lọ to zẹẹmẹ nujijọ ehe tọn basi, e yí hogbe Glẹki tọn de zan, he sọgan ko to alọdlẹndo ovi he ma ko yin jiji kavi viyẹyẹ he ṣẹṣẹ yin jiji. E yí hogbe dopolọ zan na Jesu he yin titẹ́ do kanlinpó mẹ.—Luku 2:12, 16; 18:15.

To popolẹpo mẹ, be Biblu na mí whẹwhinwhẹ́n de nado do vogbingbọn nujọnu tọn hia  to ovi he gbẹ́ pò to vidọ̀ mẹ po dehe ṣẹṣẹ yin jiji po ṣẹnṣẹn ya? Mí ma lẹnmọ. Podọ enẹ tin to kọndopọ mẹ hẹ dodinnanu lẹnunnuyọnẹn egbezangbe tọn lẹ. Di apajlẹ, dodinnanutọ lẹ ko mọdọ ovi he gbẹ́ pò to vidọ̀ mẹ sọgan tindo numọtolanmẹ bo yinuwa sọgbe hẹ nuhe to jijọ to gbonu ohò onọ̀ etọn tọn. Abajọ e ma do nọ paṣa mí dọ onọ̀ hohonọ de nọ tindo kanṣiṣa pẹkipẹki de hẹ ovi he to whinwhẹ́n to ohò etọn mẹ.

Ojlẹ he ovi de nọ yizan nado whẹ́n to homẹ whẹpo do yin jiji sọgan gbọnvo na devo tọn. Lẹnnupọndo apajlẹ ehe ji: Onọ̀ de jivi azán mape bọ ovi lọ nọgbẹ̀ na azán vude bo kú. Onọ̀ devo jivi he azán etọn pé, ṣigba ovi lọ kú to ajìdonu. Be onọ̀ tintan lọ tindo todido dọ ovi etọn na fọnsọnku na e yin jiji azán mape wutu, bọ onọ̀ awetọ lọ ma tindo todido mọnkọtọn wẹ ya?

To bladopọ mẹ, Biblu plọn mí hezeheze dọ ogbẹ̀ nọ bẹjẹeji to hòmimọ whenu podọ Jehovah nọ pọ́n ovi he ma ko yin jiji de hlan taidi gbẹtọ nujọnu tọn he họakuẹ de. Sọgbe hẹ zẹẹmẹ nugbo Owe-wiwe tọn enẹlẹ, mẹdelẹ sọgan lẹndọ e ma sọgbe nado dọ dọ todido fọnsọnku tọn de ma tin na ovi he kúdo homẹ na onọ̀ de gba. Na nugbo tọn, yé sọgan lẹndọ pọndohlan mọnkọtọn jẹagọdo nujinọtedo Owe-wiwe tọn mítọn, he sinai do nugbo titengbe enẹlẹ ji, gando hòdide go.

To ojlẹ delẹ mẹ wayi, linlinnamẹwe ehe ko dọhodo kanbiọ titengbe delẹ ji he fọ́n ayihaawe dote eyin ovi he kúdo homẹ na onọ̀ yetọn lẹ sọgan yin finfọnsọnku kavi lala. Di apajlẹ, be Jiwheyẹwhe na gọ̀ ovi-kẹ́n he ma ko wleawu ganji de zedo vidọ̀ onọ̀ de tọn mẹ to Paladisi mẹ wẹ? Ṣigba, nupinplọn sisosiso, ayihamẹlinlẹnpọn, po odẹ̀ po ko gọalọna Hagbẹ Anademẹtọ lọ nado wá tadona lọ kọ̀n dọ linlẹn mọnkọtọn ma sọgbe hẹ todido fọnsọnku tọn paali. Jesu dọmọ: “Nulẹpo wẹ wiwà na Jiwheyẹwhe.” (Malku 10:27) Numimọ Jesu lọsu tọn do nugbo-yinyin hogbe ehelẹ tọn hia; ogbẹ̀ etọn yin tẹndiọna sọn olọn mẹ do vidọ̀ awhli de tọn mẹ—yèdọ nuhe ma sọgan yọnbasi to pọndohlan gbẹtọvi tọn mẹ.

Eyin mọ wẹ, be nuhe dọ Biblu te wẹ yindọ ovi he kúdo homẹ lẹ na yin finfọnsọnku ya? Mí dona yigbe dọ Biblu ma na gblọndo kanbiọ ehe tọn tlọlọ gba, enẹwutu mẹdepope ma dona tindo pọndohlan hẹngogo tọn gando whẹho ehe go. Whẹho ehe sọgan fọ́n kanbiọ susu dote. Ṣigba, e na yọ́n hugan ma nado pàhodọ. Nuhe mí yọnẹn wẹ yindọ: Whẹho lọ tin to alọ Jehovah Jiwheyẹwhe tọn mẹ, yèdọ mẹhe sù to dagbewanyi po lẹblanu po mẹ. (Ps. 86:15) Matin ayihaawe, e tindo ojlo vẹkuvẹku nado jla nuhe okú hẹngble lẹ do gbọn fọnsọnku gblamẹ. (Job 14:14, 15) Mí sọgan deji dọ nuhe sọgbe wẹ e nọ wà to whepoponu. Ewọ na hẹn pọngbọ wá na oyà susu he ji mí te to aihọn ylankan ehe mẹ dile e na gbọn owanyi dali deanana Ovi etọn nado “gbà azọ́n Lẹgba tọn sudo.”—1 Joh. 3:8.

[Nudọnamẹ odò tọn]

[Yẹdide to weda 13]

Jehovah na hẹn pọngbọ wá na oyà he ji mí te lẹpo