Hiẹ Tindo Whẹwhinwhẹ́n Nado Jaya

NUVIKUN pẹvi pete lẹ kakajẹ bẹplidopọ blibata sunwhlẹvu lẹ tọn he nọ pli do gọnu-gọnu lẹ ji dohia dọ nudida lẹ tin to tito ji. Ehe ma yin nupaṣamẹnu de, na Mẹdatọ lọ “ma yin Jiwheyẹwhe bẹwlu tọn de gba.” (1 Kọl. 14:33) Lehe Jehovah basi titona omẹ etọn lẹ do nado nọ basi sinsẹ̀n hlan ẹn sọ jẹna ayidego. Mì gbọ mí ni gbadopọnna lehe Jehovah wà enẹ do. E wleawuna nudida nuyọnẹntọ livi kanweko susu he tindo nudide mẹdekannujẹ tọn—enẹ wẹ gbẹtọ he to aigba ji lẹ po angẹli lẹ po—do titobasinanu wẹkẹ tọn de mẹ nado nọ basi sinsẹ̀n wiwe hlan ẹn to pọmẹ. Lehe enẹ jiawu do sọ!

To Islaeli hohowhenu tọn, Jelusalẹm wẹ nọtena adà aigba ji titobasinanu Jiwheyẹwhe tọn, fie tẹmpli Jehovah tọn tin te bọ ahọlu yiamisisadode etọn nọ nọ̀. Islaelivi he to kanlinmọgbenu to Babilọni de do numọtolanmẹ etọn lẹ hia gando tòdaho wiwe ehe go dole: “Eyin yẹn ma flin we, gbọ odẹ́ ṣie ni tẹ́ do hèko ṣie go: eyin yẹn ma yiwanna Jelusalẹm hú otado ayajẹ ṣie tọn.”—Ps. 137:6.

Be numọtolanmẹ dopolọ wẹ a nọ tindo na titobasinanu Jiwheyẹwhe tọn to egbehe ya? Be e nọ hẹn ayajẹ wá na we hugan nudevo depope ya? Be ovi towe lẹ yọ́n whenuho adà aigba ji titobasinanu Jiwheyẹwhe tọn po lehe e nọ yin anadena do po ya? Be yé mọnukunnujẹemẹ dọ emi yin apadewhe pipli mẹmẹsunnu lẹdo aihọn pé omẹ Jehovah tọn lẹ tọn ya? (1 Pita 2:17) Naegbọn hiẹ ma na yí ayinamẹ he bọdego ehelẹ zan to Sinsẹ̀n-Bibasi Whẹndo tọn towe whenu nado hẹn oyọnẹn po pinpẹn-nutọn-yinyọnẹn whẹndo towe tọn po jideji na titobasinanu Jehovah tọn?

Pìntàn Nuhe Jọ to “Hohowhenu” lẹ Tọn

To whemẹwhemẹ, whẹndo Islaelivi lẹ tọn nọ plidopọ nado basi hùnwhẹ Juwayi tọn. Whenue hùnwhẹ lọ yin didoai, Mose dọna akọta lọ dọmọ: “Whenuena visunnu towe kanbiọ we to ojlẹ he ja mẹ, dọ, Etẹwẹ ehe? wẹ hiẹ na dọ hlan ẹn, dọ, Gbọn huhlọn alọ tọn dali wẹ OKLUNỌ do hẹn mí tọ́n sọn Egipti, sọn owhé mẹglọnọ tọn gbè.” (Eks. 13:14) Lehe Jehovah yinuwa hẹ Islaelivi lẹ do ma yin nuhe yè na wọn de. Jide tin dọ susu tatọ́ whẹndo Islaelivi lẹ tọn hodo gbedide Mose tọn enẹ. To owhe susu lẹ godo, Islaelivi de hodẹ̀ dọmọ: “Jiwheyẹwhe E, míwlẹ ko yí otó mítọn do sè, otọ́ mítọn lẹ ko dọna mí, na azọ́n daho he hiẹ wà to owhè yetọn nu, to hohowhenu.”—Ps. 44:1.

Whenuho Kunnudetọ Jehovah tọn lẹ tọn he ko lán to owhe 100 ji sọgan taidi azán “hohowhenu” tọn kavi otàn na jọja lẹ to egbehe. Nawẹ a sọgan gọalọna ovi towe lẹ nado mọ nujọnu-yinyin whenuho Kunnudetọ Jehovah tọn lẹ tọn gbọn? Di apajlẹ, mẹjitọ delẹ nọ yí owe lọ Les Témoins de Jéhovah— Prédicateurs du Royaume de Dieu, Annuaire, otàn gbẹzan tọn he nọ sọawuhia to linlinwe mítọn lẹ mẹ po linlin nuwiwa yẹwhehọluduta tọn devo lẹ tọn po zan gọna DVD yọyọ mítọn he dọhodo omẹ Jiwheyẹwhe tọn egbezangbe tọn lẹ ji. Video he dọhodo homẹkẹn he mẹmẹsunnu mítọn lẹ pehẹ to Union soviétique dai tọn po Nazi Allemagne tọn po glọ lẹ ji nọ gọalọna whẹndo lẹ nado ganjẹ Jehovah go to whlepọn lẹ whenu. Nọ yí azọ́nwanu mọnkọtọn lẹ zan to Sinsẹ̀n-Bibasi Whẹndo tọn whenu. Mọwiwà na hẹn yise ovi towe lẹ tọn lodo nado sọgan pehẹ nuhahun he na whlé tenọgli yetọn pọ́n lẹ.

Ṣigba, otàn gblẹlẹ pìnpìn sọgan zọ́n bọ apọ̀ na yawu ṣì ovi lẹ. Enẹwutu, nọ kàn linlẹn ovi towe lẹ tọn sè dile hiẹ to hodọ hẹ yé. Di apajlẹ, a sọgan biọ to ovi towe si nado de otò he jlo e de bo basi dodinnanu do lehe azọ́n yẹwhehọluduta tọn  bẹjẹeji do to otò lọ mẹ ji podọ nado basi zẹẹmẹ nuhe e plọn delẹ tọn na whẹndo lọ. To agun towe mẹ, a sọgan basi oylọna Klistiani numimọnọ lẹ nado kọnawudopọ hẹ mì to sinsẹ̀n-bibasi whẹndo tọn mìtọn de whenu. Vlavo ovi towe sọgan biọ to yé si nado dọ numimọ he yé tindo lẹ. Kavi a sọgan biọ to ovi towe si nado de yẹdide nujijọ ayidego yẹwhehọluduta tọn lẹ tọn, taidi azọ́n alahọ de gbigbá tọn, plidopọ akọjọpli tọn de kavi lehe mẹmẹsunnu lẹ yí glamafonu zan to lizọnyizọn whédegbè jẹ whédegbè tọn mẹ do.

Plọn Lehe “Agbasagonu Dopodopo to Azọ́n Etọn Wà” Do

Apọsteli Paulu yí agun Klistiani tọn jlẹdo “agbasa blebu [go], ehe yin kinkọndopọ pẹkipẹki gbọn agómẹ lẹpo dali, [ehe] nọ whẹ́n bo nọ jlọ ede dote to owanyi mẹ, dile agbasagonu dopodopo to azọ́n etọn wà.” (Efe. 4:16, New International Version) Nupinplọn gando lehe agbasa gbẹtọ tọn nọ wazọ́n do go nọ yidogọna pinpẹn-nutọn-yinyọnẹn po sisi he mí tindo na Mẹdatọ mítọn po. Mọdopolọ, eyin mí nọ lẹnnupọndo lehe agun lọ nọ yin anadena lẹdo aihọn pé do ji, “adà susu nuyọnẹn Jiwheyẹwhe tọn” na hẹn awuji mí.—Efe. 3:10.

Jehovah basi zẹẹmẹ lehe titobasinanu etọn he bẹ adà olọn mẹ tọn hẹn nọ yin anadena do tọn. Di apajlẹ, e dọ dọ emi na osọhia de Jesu Klisti whẹ́, mẹhe to enẹgodo “do angẹli etọn hlan nado ze e donukọnna afanumẹ etọn Johanu gbọn ohia lẹ yiyizan dali, mẹhe dekunnu.” (Osọ. 1:1, 2) Eyin Jiwheyẹwhe do lehe adà titobasinanu mayinukundomọ etọn tọn nọ yin anadena do hia mí, be e ma na jlo dọ mí ni mọnukunnujẹ lehe “agbasagonu dopodopo to azọ́n etọn wà” do to aigba ji mẹ ya?

Di apajlẹ, eyin nugopọntọ lẹdo tọn na wá dla agun mìtọn pọ́n to madẹnmẹ, naegbọn hiẹ ma na lẹnnupọndo azọngban po lẹblanulọkẹyi yetọn po ji to pọmẹ hẹ whẹndo towe? Nawẹ yé nọ gọalọna dopodopo mítọn gbọn? Kanbiọ devo he ji mì sọ sọgan lẹnnupọndo lẹ die: Naegbọn e do yin nujọnu nado nọ na linlin sinsẹ̀nzọn kunnudegbe tọn? Nawẹ titobasinanu Jiwheyẹwhe tọn nọ yin nukunpedego to akuẹzinzan-liho gbọn? Nawẹ Hagbẹ Anademẹtọ lọ yin tito basina do, podọ nawẹ e nọ wleawuna núdùdù gbigbọmẹ tọn gbọn?

E whè gbau, nukunnumimọjẹ lehe omẹ Jehovah tọn lẹ yin tito basina do mẹ nọ hẹn ale wá na mí to aliho voovo atọ̀n mẹ: Mí nọ yọ́n pinpẹn mẹhe to azọ́n sinsinyẹn wà do ota mítọn mẹ lẹ tọn taun. (1 Tẹs. 5:12, 13) Mí nọ yin whinwhàn nado nọgodona tito yẹwhehọluduta tọn lẹ. (Owalọ 16:4, 5) Hú popolẹpo, jide he mí tindo do mẹhe to anadenanu lẹ go nọ sinyẹn deji eyin mí mọ nudide po tito sinai do Owe-wiwe ji he yé basi lẹ po.—Heb. 13:7.

“Mì Gbeje Atọ̀họ̀ Fininọ Etọn lẹ Tọn Pọ́n”

“Zinzọnlin gbọn awlò Ziọni tọn mẹ, bo dlú lẹdo e: hia atọ̀họ̀ etọn lẹ. Mì doayi agbó etọn lẹ go dagbedagbe, [mì gbeje atọ̀họ̀ fininọ etọn lẹ tọn pọ́n, NW]; na mì nido dọ ẹ hlan whẹndo he ja to godo mìtọn lẹ.” (Ps. 48:12, 13) To wefọ ehe mẹ, psalm-kantọ lọ dotuhomẹna Islaelivi lẹ nado dindona Jelusalẹm kitokito. Be hiẹ sọgan yí nukun homẹ do pọ́n otàn dagbedagbe he whẹndo Islaelivi lẹ tọn he zingbejizọnlin yì tòdaho wiwe lọ mẹ na hùnwhẹ whemẹwhemẹ tọn lẹ bo mọ whanpẹ tẹmpli gigonọ otò lọ tọn na ko nọ pìn to yedelẹ ṣẹnṣẹn ya? Yé dona ko yin whinwhàn nado “dọ ẹ hlan whẹndo he ja to godo [yetọn] lẹ.”

Lẹnnupọndo apajlẹ ahọsi Ṣeba tọn ji, mẹhe to tintan whenu, tindo ayihaawe gando linlin he e sè dogbọn gandudu gigonọ Sọlomọni tọn po nuyọnẹn daho etọn po dali go. Etẹwẹ hẹn ẹn kudeji dọ nugbo wẹ ohó he e sè lẹ? Ahọsi lọ dọmọ: “Yẹn ma yí ohó yetọn lẹ sè gba, kaka yẹn do wá, nukun ṣie lẹ ko sọ mọ ẹn.” (2 Otan. 9:6) Mọwẹ, nuhe mí yí “nukun” mítọn titi do mọ lẹ sọgan yinuwado mí ji taun.

Nawẹ a sọgan gọalọna ovi towe lẹ nado yí “nukun” yetọn titi do mọ whanpẹ titobasinanu Jehovah tọn gbọn? Eyin wekantẹn alahọ Kunnudetọ Jehovah tọn lẹ tọn de tin sẹpọ fie a nọ nọ̀, tẹnpọn nado yì dla ẹ pọ́n. Di apajlẹ, fie Mandy po Bethany po nọ nọ̀ dẹn do Bẹtẹli na nudi kilomẹtlu 1500 to otò yetọn mẹ. Etomọṣo, mẹjitọ yetọn lẹ nọ basi tito sọn ojlẹ de mẹ jẹ devo mẹ nado yì dla Bẹtẹli pọ́n, titengbe whenue viyọnnu yetọn lẹ jẹ winwinyan ji. Viyọnnu  lọ lẹ dọmọ: “Whẹpo mí do yì dla Bẹtẹli pọ́n, mí lẹndọ e ma yin míwlẹ nkọ wẹ nọ yì dọ́n, dọ mẹhe ko whẹ́n mẹho lẹ kẹdẹ wẹ e tin na. Ṣigba to finẹ, mí mọ jọja he yí ayajẹ do to azọ́n sinsinyẹn wá na Jehovah lẹ! Mí wá mọdọ titobasinanu Jehovah tọn gbloada zẹ̀ nuhe mí nọ lẹn go, podọ whedepopenu he mí dla Bẹtẹli pọ́n, mí nọ mọ huhlọn yí dogọ to gbigbọ-liho.” Na Mandy po Bethany po dindona titobasinanu Jiwheyẹwhe tọn kitokito wutu, yé yin whinwhàn nado bẹ sinsẹ̀nzọn gbehosọnalitọ tọn jẹeji, podọ yé tlẹ yin oylọ-basina nado wá sẹ̀n taidi mẹdezejotọ whenu-gli tọn lẹ to Bẹtẹli.

Mí sọ sọgan “mọ” titobasinanu Jehovah tọn hlan to aliho devo mẹ, yèdọ nude he ma tin-to-aimẹ to Islaeli hohowhenu tọn. To owhe agọe tọn lẹ mẹ, omẹ Jiwheyẹwhe tọn lẹ ko mọ video po DVD lẹ po he bẹ adà voovo titobasinanu Jiwheyẹwhe tọn lẹ hẹn, taidi: Les Témoins de Jéhovah : organisés pour proclamer la bonne nouvelle, Toute la communauté des frères, Jusqu’aux extrémités de la terre po Unis grâce à l’enseignement divin po. Eyin hiẹ po whẹndo towe po mọ azọ́n sinsinyẹn he wà mẹmẹsunnu lẹ te to Bẹtẹli po mẹhe nọ wà azọ́n kọgbọ tọn lẹ po gọna mẹdehlan lẹ, po azọ́n he mẹmẹsunnu he nọ wleawuna plidopọ bo nọ basi titona yé lẹ po te, ayihaawe ma tin dọ mì na yọ́n pinpẹn pipli mẹmẹsunnu lẹdo aihọn pé tọn lẹ tọn taun.

Agun omẹ Jiwheyẹwhe tọn lẹ tọn dopodopo wẹ nọ yí adà titengbe de wà to wẹndagbe lọ lilá po godoninọna yisenọ hatọ yetọn lẹ po mẹ. Etomọṣo, e na yọ́n dọ hiẹ po whẹndo towe po ni de whenu dovo nado lẹnnupọndo “pipli mẹmẹsunnu mìtọn lẹ tọn pete [ji] to aihọn mẹ.” Mọwiwà na gọalọna hiẹ po ovi towe lẹ po nado yọnẹn dọ mì tindo whẹwhinwhẹ́n nado jaya bo “lodo to yise mẹ” zọnmii.—1 Pita 5:9.

 [Apotin/Yẹdide to weda 18]

Titobasinanu Jiwheyẹwhe Tọn Hosọ—Dagbe de Na Nupinplọn

Mí tindo awuwledainanu susu he na gọalọna mímẹpo nado plọnnu dogọ gando whenuho titobasinanu Jehovah tọn po lehe e nọ yin anadena do po go. Kanbiọ he bọdego ehelẹ sọgan gọalọna we nado jẹ mọwà ji:

☞ Nawẹ azọ́n nugopọntọ tomẹyitọ egbezangbe tọn lẹ tọn bẹjẹeji gbọn?—Atọ̀họ̀-Nuhihọ́ lọ Tọn 1^er décembre 1996, weda 9-14.

☞ Etẹwẹ jẹna ayidego gando “Azán Ovi lẹ Tọn” go to Plidopọ Yẹwhehọluduta tọn 1941 tọn whenu?—Atọ̀họ̀-Nuhihọ́ lọ Tọn 15 juillet 2001, weda 8.

☞ Nawẹ Hagbẹ Anademẹtọ lọ nọ basi nudide lẹ gbọn?—‘Rends pleinement témoignage au sujet du Royaume de Dieu,’ weda 108-114.