Ma Yí Linlẹn Agọ̀ Do Klọ Dewe Blo

“ETẸWẸ hiẹ ko basi he?” wẹ Jiwheyẹwhe kanse Evi to whenuena e ko dù sọn atin-sinsẹ́n he yè dosẹ́n etọn na yé lọ mẹ godo. “Odàn wẹ blu mi, bọ yẹn sọ dù,” wẹ yọnnu lọ gblọn. (Gẹn. 3:13) Satani, yèdọ odàn he gbọn oklọ dali sisẹ́ Evi nado vẹtolina Jiwheyẹwhe, yin alọdlẹndo to godo mẹ taidi “odàn hoho lọ, . . . he nọ to aigba fininọ lẹpo klọ.”—Osọ. 12:9.

Kandai Gẹnẹsisi tọn ehe do Satani hia taidi mẹklọtọ, yèdọ mẹhe nọ dolalo po linlẹn lọ po nado klọ mẹhe ma to aṣeji lẹ. E họnwun dọ Evi jai jẹ oklọ etọn mẹ. Etomọṣo, mí ma dona nọ lẹndọ Satani kẹdẹ wẹ sọgan klọ mí gba. Biblu na mí avase gando owù lọ nado yí ‘linlẹn agọ̀ do to mídelẹ klọ’ go.—Jak. 1:22.

Mí sọgan lẹndọ e na vẹawu dọ mí ni klọ mídelẹ kavi dọ e ma tlẹ sọgan jọ paali. Ṣigba e họnwun dọ e ma yin tata wẹ Jiwheyẹwhe do na avase enẹ gba. Enẹwutu, e na yọ́n nado gbadopọnna lehe mí sọgan klọ mídelẹ do po linlẹn agọ̀ wunmẹ he mí sọgan yí do klọ mídelẹ po. Apajlẹ Owe-wiwe tọn de sọgan gọalọna mí.

Apajlẹ Mẹhe Klọ Yede Delẹ Tọn

To nudi owhe 537 J.W.M., Kilusi Daho Pẹlsia tọn de gbedide de tọ́n na Ju he to kanlinmọgbenu to Babilọni lẹ nado lẹkọyi Jelusalẹm nado vọ́ tẹmpli lọ gbá. (Ẹzla 1:1, 2) To owhe he bọdego mẹ, akọta lọ ze dodonu tẹmpli yọyọ lọ tọn lẹ dai sọgbe hẹ lẹndai Jehovah tọn. Mẹhe lẹkọ lẹ jaya bo pà Jehovah na dona etọn do adà tintan azọ́n họgbigbá tọn titengbe ehe tọn ji. (Ẹzla 3:8, 10, 11) Ṣigba e ma dẹn bọ akọta lọ pehẹ nukundiọsọmẹ bo jẹflumẹ. (Ẹzla 4:4) To nudi owhe 15 to kọlilẹ yetọn godo, aṣẹpatọ Pẹlsianu lẹ hẹnalọdotena azọ́n họgbigbá tọn lọ lẹpo to Jelusalẹm. Nado hẹn Ju lẹ gánnugánnu, ahọluzọnwatọ Pẹlsia tọn lẹ wá Jelusalẹm nado doalọtena yé “gbọn gánhumẹ po huhlọn po dali.”—Ẹzla 4: 21-24.

Aliglọnnamẹnu sinsinyẹn he Ju lẹ pehẹ enẹ zọ́n bọ yé yí linlẹn agọ̀ do klọ yedelẹ. Yé lẹn to yede mẹ dọ: “Yè ma hẹn ojlẹ wá na ohọ̀ OKLUNỌ tọn gba, ojlẹ na ohọ̀ OKLUNỌ tọn nado yin dido.” (Hag. 1:2) Yé wá tadona kọ̀n dọ Jiwheyẹwhe ma jlo dọ tẹmpli lọ ni yin gbigbá tlolo din gba. Kakati nado dín lehe yé na wagbọn do hẹn ojlo Jiwheyẹwhe tọn di, yé gbẹkọ azọ́ndenamẹ wiwe yetọn go bo hẹn alọnu yetọn ján to ohọ̀ yetọn titi lẹ gbigbá mẹ. Yẹwhegán Jiwheyẹwhe tọn Hagai kanse yé madoadúdẹji dọ: “Be e yin ojlẹ de na mìlọsu nado nọ nọ̀ ohọ̀ ozànọ mìtọn lẹ mẹ, whenuena ohọ̀ he [tẹmpli Jehovah tọn] mlọnai gbọgbé?”—Hag. 1:4.

Etẹwẹ mí sọgan plọn sọn apajlẹ ehe mẹ? Pọndohlan agọ̀ tintindo gando hẹndi lẹndai Jiwheyẹwhe tọn go sọgan zọ́n bọ mí na dovọ́na nuwiwa po azọ́ndenamẹ he gando sinsẹ̀n-bibasi mítọn go po lẹ bo yin ayihafẹsẹna gbọn nujlomẹ mítọn titi lẹ dali. Di apajlẹ, mí ni dọ dọ hiẹ to nukundo jonọ delẹ. Dile a to nukundo wiwá yetọn, enẹ sọgan biọ whégbè-zọ́n susu he yin dandan tọn delẹ wiwà to asi we. Ṣigba, a sè owẹ̀n dọ jonọ towe lẹ na gbọwhenu pẹẹde. Be a na jo azọ́n he wà a te lẹ do wẹ ya?

Ṣigba, flindọ Hagai po Zekalia po gọalọna Ju lẹ nado mọnukunnujẹemẹ dọ Jehovah gbẹ́ jlo dọ tẹmpli lọ ni yin vivọgbá matin gbàndindọn. Hagai dotuhomẹna yé dọmọ: “[Mì] yin huhlọnnọ, mì gbẹtọ aigba lọ tọn lẹpo emi, . . . bo wazọ́n.” (Hag. 2:4) Yé dona zindonukọn to azọ́n lọ mẹ po jidide po dọ gbigbọ Jiwheyẹwhe tọn na gọalọna yé.  (Zek. 4:6, 7) Be apajlẹ ehe sọgan gọalọna mí nado dapana tadona agọ̀ kọ̀n wiwá gando azán Jehovah tọn go ya?—1 Kọl. 10:11.

Dapana Linlẹn Agọ̀ bo Yin Lẹnpọn Dagbenọ

To wekanhlanmẹ awetọ apọsteli Pita tọn mẹ, e dọho gando tito Jehovah tọn nado hẹn “olọn yọyọ lẹ po aigba yọyọ de po” wá go. (2 Pita 3:13) E dọ dọ mẹṣankotọ delẹ fọ́n ayihaawe dote dọ Jiwheyẹwhe ma na dádo whẹho gbẹtọvi lẹ tọn mẹ. Yé dọnnu to aliho agọ̀ mẹ dọ nudepope ma na jọ, dọ “mọ wẹ onú lẹpo gbẹ́ te kẹdẹdile e te do pẹpẹ sọn bẹjẹeji nudida tọn gbọ́n.” (2 Pita 3:4) Ojlo Pita tọn wẹ nado sukúndona linlẹn agọ̀ mọnkọtọn. E wlan dọmọ: “Yẹn gbọn nuflinmẹ dali do to nugopipe nulẹnpọn ganji tọn mìtọn lẹ fọndote.” E flinnu Klistiani hatọ lẹ dọ hoṣidọ wẹ mẹṣankotọ lọ lẹ te. Jiwheyẹwhe ko dádo whẹho gbẹtọvi lẹ tọn mẹ pọ́n to whenue e hẹn nugbajẹmẹji singigọ lẹdo aihọn pé tọn de wá.—2 Pita 3:1, 5-7.

To owhe 520 J.W.M., Hagai lọsu dotuhomẹna Ju he jẹflumẹ bo jo azọ́n họgbigbá tọn lọ do lẹ. E na tuli yé dọmọ: “Mì ze ayiha mìtọn do aliho mìtọn lẹ go.” (Hag. 1:5) Nado fọ́n nugopipe nulẹnpọn tọn yetọn lẹ dote, e flinnu sinsẹ̀n-basitọ hatọ etọn lẹ gando lẹndai po opagbe Jiwheyẹwhe tọn lẹ na omẹ Etọn lẹ po go. (Hag. 1:8; 2:4, 5) To whenue yé mọ tudohomẹnamẹ enẹ yí godo, e ma dẹn bọ yé vọ́ azọ́n họgbigbá tọn lọ bẹjẹeji mahopọnna gbedide ahọlu tọn nado doalọtena azọ́n lọ. Whladopo dogọ, kẹntọ lẹ tẹnpọn nado hẹnalọdotena azọ́n họgbigbá tọn lọ, ṣigba e ma pà yé. Alọhẹndotenamẹ lọ yin didesẹ podọ to owhe atọ́n gblamẹ, tẹmpli lọ yin gbigbá fó.—Ẹzla 6:14, 15; Hag. 1:14, 15.

Ayiha Mítọn Zizedo Aliho Mítọn lẹ Ji

Be hiẹ lẹndọ mílọsu sọgan jẹflumẹ to whenue nuhahun lẹ fọ́n dile e yin na Juvi azán Hagai tọn gbè lẹ do ya? Eyin enẹ jọ, e sọgan vẹawuna mí nado hẹn zohunhun mítọn go to wẹndagbe lọ lilá mẹ. Ṣigba, etẹwẹ sọgan hẹn mí jẹflumẹ? E sọgan yindọ mí to yaji na mawadodo aihọn ehe tọn wutu. Lẹnnupọndo Habbakuk ji, mẹhe kanse dọmọ: “Nawẹ yẹn na dawhá dẹnsọ, bọ hiẹ ma na sè? Yẹn dawhá tọ́n hlan we sọn huhlọnnu mẹ, bọ hiẹ ma na whlẹngán gba.” (Hab. 1:2) Klistiani de sọgan hẹn linlẹn niyaniya tọn etọn bu na nuhe dù nuhe mẹdelẹ nọ pọnhlan taidi gbàndindọn bo doafọna gbẹzan fẹẹmẹninọ tọn. Be enẹ sọgan jọ do gowe ya? Eyin mí yinuwa to aliho enẹ mẹ, be mí to míde klọ niyẹn. Enẹwutu, lehe e yin nujọnu dọ mí ni hodo ayinamẹ Owe-wiwe tọn nado ‘ze ayiha mítọn do aliho mítọn lẹ ji’ bo ‘fọ́n nugopipe nulẹnpọn ganji tọn mítọn lẹ dote’ do sọ! Mí sọgan kanse mídelẹ dọ, ‘Be e nọ paṣa mi dọ aihọn ylankan ehe gbẹ́ pò to ote kakajẹ din wẹ ya?’

Ojlẹ He Biblu Dọ Dọdai Etọn De

Yiagbọji bo lẹnnupọndo nuhe Jesu dọ gando vivọnu aihọn ehe tọn go lẹ ji. Nuhe kandai Malku tọn dọ gando dọdai Jesu tọn go na nuhe dù azán godo tọn lẹ dohia dọ Jesu dotuhomẹna  mí pludopludo nado gbọṣi nukle. (Malku 13:33-37) Avase dopolọ sọawuhia to Osọhia 16:14-16 mẹ he dọ dọdai gando azán daho Jehovah tọn go to Amagẹdọni. Naegbọn avase ehe do yin nina pludopludo? Mí tindo nuhudo nuflinmẹ ehelẹ tọn, na mí nikaa lẹndọ mí ko nọte gbau bo hẹn linlẹn niyaniya-yinyin tọn mítọn bu.

Jesu na apajlẹ de nado dohia dọ nujọnu wẹ e yin nado gbọṣi nukle dile mí to nukundo opodo aihọn ehe tọn. E dọho gando whétọ de he ajotọ lẹ gbà owhé etọn go. Etẹwẹ e dona ko wà bọ ajotọ lẹ ma nado gbà owhé etọn? E dona ko gbọṣi nukle to ozán lọ blebu mẹ. Jesu dotana apajlẹ ehe gbọn ayinamẹ nina mí dali dọmọ: “Mì wleawudai, na ogàn he mẹ mì ma lẹn do wẹ Visunnu gbẹtọ tọn ja.”—Mat. 24:43, 44.

Apajlẹ enẹ dohia dọ dandannu wẹ e yin nado wleawudai bo sinyẹnlin eyin ojlẹ he pò tlẹ dẹn. Na nugbo tọn, mí ma dona dike linlẹn lọ dọ vivọnu aihọn ylankan ehe tọn gbẹ́ dẹn hugan nuhe mí lẹn ni nọ duahunmẹna mí zẹjlẹgo. Mí ma dona yí linlẹn agọ̀ do klọ mídelẹ dọ ‘Ojlẹ lọ ma ko sọ na Jehovah.’ Linlẹn mọnkọtọn na zọ́n bọ mí na dọ̀n yonu dogodo to azọ́n wẹndagbe Ahọluduta lọ tọn lilá mẹ.—Lom. 12:11.

Dapana Linlẹn Agọ̀

Na nuhe dù linlẹn agọ̀, nunọwhinnusẹ́n he tin to Galatianu lẹ 6:7 mẹ yọ́n-na-yizan na mí dọmọ: “Yè klọ mì blo . . . Nudepope he gbẹtọ to dido, ehe wẹ e na gbẹ̀n ga.” Eyin yè jo aigba de do bo ma to ogle lẹ do e ji, ogbé ylankan lẹ nọ yawu wú do e ji. Mọdopolọ, eyin mí ma yí nugopipe nulẹnpọn tọn mítọn lẹ zan ganji, linlẹn agọ̀ lẹ sọgan doadọ̀do to ayiha mítọn mẹ. Di apajlẹ, mí sọgan lẹn to míde mẹ dọ ‘Ayihaawe ma tin dọ azán Jehovah tọn na wá, ṣigba e ma yin tlolo din gba.’ Linlẹn mọnkọtọn sọgan zọ́n bọ mí na jẹ nukun pẹvi yí do pọ́n nuwiwa yẹwhehọluduta tọn mítọn lẹ ji. Dile ojlẹ to yìyì, mí sọgan jẹ vọdona gbigbọnu lẹ ji. Taidi kọdetọn de, azán Jehovah tọn sọgan wá mí ji to ajiji mẹ.—2 Pita 3:10.

Ṣigba eyin mí nọ mọdona “ojlo Jiwheyẹwhe tọn he yọ́n, bo yin alọkẹyi bosọ yin pipé lọ” to whepoponu, e na vẹawu dọ linlẹn agọ̀ ni doadọ̀do to ayiha mítọn mẹ. (Lom. 12:2) Dopo to aliho he yọ́n hugan nado jẹ yanwle ehe kọ̀n lẹ mẹ wẹ nado nọ hia Ohó Jiwheyẹwhe tọn to gbesisọ mẹ. Owe-wiwe lẹ sọgan hẹn nujikudo he mí tindo dọ Jehovah nọ yinuwa to ojlẹ sisọ mẹ sinyẹn deji.—Hab. 2:3.

Nupinplọn, dẹ̀hiho, opli lẹ yìyì to gbesisọ mẹ, yẹwhehodidọ po nuyiwa owanyi tọn he gọ́ na homẹdagbe lẹ po na gọalọna mí nado hẹn “tintin tofi azán Jehovah tọn do ayiha mẹ gligli.” (2 Pita 3:11, 12) Jehovah na doayi nugbonọ-yinyin mítọn go. Apọsteli Paulu flinnu mí dọmọ: “Mì dike mí gbọjọ to nuhe yin dagbe wiwà mẹ blo, na mí na gbẹ̀n to osaa sisọ mẹ eyin agbọ́ ma pé mí.”—Gal. 6:9.

Na nugbo tọn, ojlẹ lọ ma die nado yí linlẹn agọ̀ do klọ mídelẹ dọ azán Jehovah tọn to gbàndọn. Kakatimọ, ojlẹ lọ die nado hẹn do ayiha mẹ gligli dọ azán Jehovah tọn ko sẹpọ.

[Yẹdide to weda 4]

Hagai po Zekalia po dotuhomẹna Juvi lẹ nado gbá tẹmpli lọ

[Yẹdide to weda 5]

Etẹwẹ na ko jọ eyin whétọ lọ ko yọnẹn dai dọ ajotọ lọ ja?