Kandai lẹ dohia to Biblu mẹ dọ agbasa kavi ohú mẹhe kú delẹ tọn yin mimẹ̀ to miyọ́n mẹ. (Jọṣ. 7:25; 2 Otan. 34:4, 5) Ehe sọgan ko dohia dọ omẹ mọnkọtọn lẹ ma jẹ nado yin dìdì po yẹyi po. Ṣigba, e ma yin mẹhe ma jẹ nado yin dìdì po yẹyi po lẹ kẹdẹ wẹ nọ yin mimẹ̀ to miyọ́n mẹ gba.

Kandai he gando okú Ahọlu Sauli po visunnu etọn atọ̀n lẹ po tọn go do ehe hia. Yé omẹ ẹnẹ lẹpo wẹ kú to whenue yé to awhànfun hẹ Filistinu lẹ. Dopo to visunnu lọ lẹ mẹ wẹ Jonatani, yèdọ họntọn vivẹ́ podọ godonọnamẹtọ nugbonọ Davidi tọn. To whenue Islaelivi adọgbotọ he nọ nọ̀ Jabẹṣi-giliadi lẹ sè nuhe jọ, yé dín oṣiọ yé omẹ ẹnẹ lọ lẹ tọn mọ bo mẹ̀ yé, podọ enẹgodo yé dì ohú yetọn lẹ. To nukọn mẹ, Davidi pà Islaelivi ehelẹ na nuyiwa yetọn.—1 Sam. 31:2, 8-13; 2 Sam. 2:4-6.

Owe-wiwe lẹ dohia dọ oṣiọ lẹ na yin finfọnsọnku, enẹ wẹ yindọ Jiwheyẹwhe na hẹn mẹhe ko kú lẹ gọwá ogbẹ̀. Vlavo oṣiọ de yin mimẹ̀ to miyọ́n mẹ kavi lala, Jehovah tindo nugopipe nado gọ̀ mẹlọ wá ogbẹ̀ po agbasa yọyọ de po. To whenue Ahọlu Nẹbukadnẹzali degbe dọ Heblu nugbonọ atọ̀n lọ lẹ ni yin zizedlan zòhọ miyọ́n tọn de mẹ, yé ma tindo ayihaawe dọ Jiwheyẹwhe sọgan fọ́n yé sọnku eyin miyọ́n tlẹ fiọ yé. (Dan. 3:16-18) Enẹ sọ yin nugbo gando devizọnwatọ nugbonọ Jehovah tọn he yin mimẹ̀ to miyọ́n mẹ to opá yasanamẹ Nazi lẹ tọn mẹ go. Devizọnwatọ nugbonọ Jiwheyẹwhe tọn susu wẹ yin vivasudo gbọn bọmbu lẹ dali kavi to aliho devo lẹ mẹ bọ yè ma tlẹ sọgan mọ agbasa yetọn. Etomọṣo, yé na yin finfọnsọnku dandan.—Osọ. 20:13.

Jehovah ma to dandannu glọ nado ṣinyan adà voovo agbasa mẹhe kú de tọn lẹ pli whẹpo do fọ́n ẹn sọnku. Aliho he mẹ Jiwheyẹwhe nọ fọ́n Klistiani yiamisisadode lẹ do ogbẹ̀ olọn mẹ tọn mẹ te do enẹ hia. Taidi Jesu he yin “hinhẹnwa ogbẹ̀ to gbigbọ mẹ,” mẹyiamisisadode lẹ nọ yin finfọnsọnku po gbẹtọ-yinyin dopolọ po, ṣigba to gbigbọ mẹ. Adà agbasa yetọn hoho tọn depope ma nọ hodo yé yì olọn mẹ.—1 Pita 3:18; 1 Kọl. 15:42-53; 1 Joh. 3:2.

Todido fọnsọnku tọn he mí tindo ma sinai do nuhe sọgan yin wiwà na agbasa mẹhe kú lọ tọn ji, ṣigba e sinai do yise he mí tindo gando nugopipe Jiwheyẹwhe tọn po ojlo etọn nado hẹn opagbe etọn lẹ di po go ji. (Owalọ 24:15) Nugbo wẹ dọ mí sọgan nọma mọnukunnujẹ lehe Jiwheyẹwhe wà azọ́njiawu fọnsọnku tọn lẹ to hohowhenu do mẹ to gigọ́ mẹ kavi lehe e na wàmọ do to sọgodo. Etomọṣo, mí nọ dejido Jehovah go. Ewọ ko na mí “jide” gbọn Jesu finfọnsọnku dali.—Owalọ 17:31; Luku 24:2, 3.

Klistiani lẹ dona nọ ze nuhe yin alọkẹyi to paa mẹ lẹ, numọtolanmẹ mẹhe lẹdo yé lẹ tọn po nubiọtomẹsi osẹ́n tọn gando agbasa mẹhe ko kú de tọn go po do lẹnpọn mẹ. (2 Kọl. 6:3, 4) Enẹwutu, nudide mẹdetiti tọn kavi whẹndo tọn de wẹ e yin nado mẹ̀ agbasa mẹhe ko kú de tọn to miyọ́n mẹ kavi lala.