Nuhe Jesu Plọn Mí

Gando Sọgodo Gbẹtọvi Tọn Go

Be Jesu dopagbe gbẹninọ to olọn mẹ tọn wẹ ya?

Mọwẹ, e wàmọ! Jesu lọsu yin finfọnsọnku, bo yì Otọ́ etọn dè to olọn mẹ. Ṣigba jẹnukọnna okú po fọnsọnku etọn po, e dọna apọsteli nugbonọ 11 etọn lẹ dọmọ: “To owhé Otọ́ ṣie tọn gbè fininọ susu wẹ tin. . . . Yẹn jei nado wleawu otẹn de tọn dai na mì.” (Johanu 14:2) Ṣigba e ma yin mẹsusu wẹ na tindo lẹblanulọkẹyi enẹ. Jesu hẹn nugbo enẹ họnwun to whenue e dọna devi etọn lẹ dọmọ: “Mì dibu blo, lẹngbọpa pẹvi; na homẹvivi Otọ́ mìtọn tọn wẹ nado yí ahọludu na mì.”—Luku 12:32.

Etẹwẹ “lẹngbọpa pẹvi” lọ na wà to olọn mẹ?

Otọ́ lọ jlo dọ pipli pẹvi ehe ni dugán hẹ Jesu to olọn mẹ. Nawẹ mí wagbọn do yọnẹn? To fọnsọnku Jesu tọn godo, e dohia apọsteli Johanu to numimọ mẹ dọ delẹ to nugbonọ lẹ mẹ na ‘duahọlu do aigba ji.’ (Osọhia 1:1; 5:9, 10) Wẹndagbe de wẹ ehe yin. Na gandudu dagbe yin dopo to nuhe gbẹtọvi lẹ tindo nuhudo etọn hugan lẹ mẹ. Etẹwẹ gandudu Jesu tọn ehe na wadotana? Jesu dọmọ: ‘To vọji mẹ, whenuena Ovi gbẹtọ tọn na sinai to ofìn gigo etọn tọn ji, mìwlẹ ga na sinai to ofìn wiawe ji.’ (Matiu 19:28) Gandudu Jesu po hodotọ etọn lẹ po tọn na hẹn “vọji,” kavi diọdo lẹ wá, yèdọ ninọmẹ pipé he asu po asi po tintan lẹ duvivi etọn to aigba ji whẹpo do wà ylando.

 Pagbe tẹwẹ Jesu do na gbẹtọvi he pò lẹ?

To vogbingbọn mẹ na Jesu he yin didá nado nọgbẹ̀ to olọn mẹ, gbẹtọvi lẹ yin didá nado nọgbẹ̀ to aigba ji. (Psalm 115:16) Abajọ Jesu do dọmọ: “Odò wẹ mìwlẹ tin sọn; aga wẹ yẹn tin sọn.” (Johanu 8:23) Jesu dọho gando sọgodo jiawu he gbẹtọvi lẹ na duvivi etọn to aigba ji go. To gbèdopo, e dọmọ: “Donanọ wẹ homẹmimiọnnọ lẹ; na yé na dugu aigba tọn.” (Matiu 5:5) E to alọdlẹndo kandai gbọdo psalm tọn he dọmọ: “Homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ. Dodonọ wẹ na dugu aigba tọn, bo nasọ nọ nọ̀ e mẹ kakadoi.”—Psalm 37:11, 29.

Enẹwutu, e ma yin “lẹngbọpa pẹvi” he jei olọn mẹ lọ kẹdẹ wẹ na mọ ogbẹ̀ madopodo gba. Jesu sọ dọho gando todido he gbẹtọ livi susu he tin to aihọn lọ blebu mẹ lẹ tindo go. E dọmọ: “Jiwheyẹwhe yiwanna aihọn sọmọ bọ e yí Ovi detọ́n etọn dopo akàn namẹ, na mẹdepope he yí i sè ma nado dọ̀n, ṣigba e nido tindo ogbẹ̀ madopodo.”—Johanu 3:16.

Nawẹ Jiwheyẹwhe na hẹn pọngbọ wà na yajiji gbẹtọvi lẹ tọn gbọn?

Jesu dọho gando kọgbidinamẹ voovo awe he glọ gbẹtọvi lẹ na yin dide sọn go, to whenuena e dọmọ: “Dinvie wẹ whẹdida aihọn he tọn . . . wá: dinvie wẹ yè na yàn ahọvi aihọn he tọn jẹgbonu.” (Johanu 12:31) Tintan, mẹylankan he nọ hẹn yajiji wá lẹ na yin whẹdana bo yin vivasudo. Awetọ, Satani na yin yinyan jẹgbonu bọ e ma nasọ klọ gbẹtọvi lẹ ba.

Etẹwẹ dogbọn mẹhe ko nọgbẹ̀ sọn hohowhenu gbọ́n bo ma mọ dotẹnmẹ hundote lọ nado plọnnu gando Jiwheyẹwhe po Klisti po go, bo masọ tindo yise to yé mẹ whẹpo do kú lẹ dali? Jesu dọna ylanwatọ he yin whiwhè do yatin go to apá etọn dọmọ: “Hiẹ na nọ̀ hẹ mi to Paladisi mẹ.” (Luku 23:43) Dawe enẹ na mọ dotẹnmẹ hundote lọ nado plọnnu gando Jiwheyẹwhe go to whenue Jesu na fọ́n ẹn sọnku to paladisi mẹ to aigba ji, to pọmẹ hẹ gbẹtọ livi susu devo lẹ. To whenẹnu, ewọ na mọ dotẹnmẹ hundote lọ nado yin dopo to homẹmimiọnnọ po dodonọ he na duvivi ogbẹ̀ madopodo tọn to aigba ji po lẹ mẹ.—Owalọ lẹ 24:15.

Na nudọnamẹ dogọ, pọ́n weta 3 po 7 po to owe lọ Etẹwẹ Biblu Plọn Mí Taun? a mẹ.

[Nudọnamẹ Odò tọn]

[Yẹdide to weda 19]

“Dodonọ wẹ na dugu aigba tọn, bo nasọ nọ nọ̀ e mẹ kakadoi.”—Psalm 37:29