Kanbiọ Wehiatọ Mítọn lẹ Tọn . . .

Be Jiwheyẹwhe Tindo Bẹjẹeji Ya?

▪ Biblu na gblọndo lọ dọ Jiwheyẹwhe ma tindo bẹjẹeji. Jiwheyẹwhe tin tẹgbẹ. Dile etlẹ yindọ linlẹn lọ dọ Jiwheyẹwhe yin madopodo vẹawu nado mọnukunnujẹemẹ, mí ma sọgan gbẹ́ linlẹn enẹ dai poun na mí ma sọgan mọnukunnujẹemẹ to gigọ́ mẹ wutu gba.

Be e sọgbe hẹ lẹnpọn dagbe dọ mí ni donukun dọ mí na mọnukunnujẹ aliho Jiwheyẹwhe tọn lẹpo mẹ ya? Apọsteli Paulu dọmọ: “Lehe dona susugege, nuyọnẹn po oyọnẹn Jiwheyẹwhe tọn po siso do sọ! Lehe whẹdida etọn lẹ yin dinmamọdona bọ aliho etọn lẹ ma yọ́n dinmọ do sọ!” (Lomunu lẹ 11:33) Ayiha mítọn ma sọgan mọnukunnujẹ lehe nuyọnẹn po oyọnẹn Jiwheyẹwhe tọn po siso sọ mẹ to gigọ́ mẹ kẹdẹdile yọpọvu de ma sọgan mọnukunnujẹ nulẹpo mẹ gando mẹjitọ etọn go do. Dile etlẹ yindọ onú tintan he ohó gbọdo Paulu tọn ehelẹ dlẹnalọdo wẹ oyọnẹn po lẹblanu matin awetọ Jiwheyẹwhe tọn po, yé dohia dọ nuhe gando Jehovah Jiwheyẹwhe po azọ́n etọn lẹ po go delẹ siso sọmọ bọ mí ma sọgan mọnukunnujẹ yé mẹ. Na nugbo tọn, dopo to onú mọnkọtọn lẹ mẹ wẹ linlẹn lọ dọ Jiwheyẹwhe ma tindo bẹjẹeji. Etomọṣo, mí sọgan dejido nuhe Biblu plọnmẹ dogbọn Jiwheyẹwhe dali go mlẹnmlẹn. Jesu Klisti dọho gando kandai wiwe lẹ go dọmọ: “Ohó towe wẹ nugbo.” —Johanu 17:17.

Mose dọna Jehovah to odẹ̀ mẹ dọmọ: “Sọn madopodo jẹ madopodo, hiẹ wẹ Jiwheyẹwhe.” (Psalm 90:2) Mose dohia tofi dọ tintin Jiwheyẹwhe tọn dlẹnkan yì adà voovo awe ji. Ode hlan sọgodo. Jehovah wẹ “Omẹ lọ he to ogbẹ̀ kakadoi podọ doidoi.” (Osọhia 4:10) Enẹwutu, tintin Jiwheyẹwhe tọn dlẹnkan yì sọgodo mavọmavọ. Awetọ hlan hohowhenu. To hogbe devo mẹ, Jiwheyẹwhe ma yin didá podọ mọjanwẹ e ma wá tintin mẹ do niyẹn. Kakatimọ, tintin Jiwheyẹwhe tọn dlẹnkan yì hohowhenu he ma tindo bẹjẹeji.

E nọ vẹawuna suhugan mítọn nado mọnukunnujẹ linlẹn he gẹdẹ lẹ mẹ. Etomọṣo, to whedelẹnu mí nọ kẹalọyi linlẹn he gẹdẹ delẹ taidi nado hia sọha yì nukọn podọ yì godo. Sọha hihia, vlavo yì nukọn kavi yì godo sọgan zindonukọn bo ma na do opodo. Be mí ma sọgan yí apajlẹ ehe jlẹdo owhe madosọha Mẹdatọ lọ tọn go ya?

Abajọ e do sọgbe dọ Jiwheyẹwhe kẹdẹ wẹ nọ yin “Ahọlu madopodo.” (1 Timoti 1:17) Lẹnnupọndo ehe ji: Jesu Klisti, angẹli madosọha he tin to olọn mẹ lẹ, gọna gbẹtọvi he tin to aigba ji lẹ tindo bẹjẹeji na yé yin didá wutu. (Kọlọsinu lẹ 1:15, 16) Ṣigba, e ma yinmọ na Jiwheyẹwhe. Nado tẹkudeji dọ Jiwheyẹwhe dona ko yin didá na fọ́n kanbiọ madodogbó lẹ dote gando mẹhe dá Mẹdatọ lọ go. Jehovah kẹdẹ wẹ tin “sọn madopodo jẹ madopodo.” (Psalm 90:2) To hogbe devo mẹ, Jehovah ko tin “sọn ojlẹ madopodo.”—Juda 25.

Ṣigba, hẹn do ayiha mẹ dọ tintin madopodo Jiwheyẹwhe tọn ma yin nugbo mọmọ tọn de poun gba. Eyin mí lẹnnupọn sisosiso do odẹ̀ Mose tọn ji, mí na mọdọ tintin madopodo Jiwheyẹwhe tọn na mí jide gando opagbe owanyi tọn etọn go, yèdọ ogbẹ̀ madopodo. To vogbingbọn mẹ na gbẹninọ mítọn he whègli todin, Jiwheyẹwhe yin zẹẹmẹ basina taidi “fininọ mítọn to whẹndo lẹpo mẹ.” Taidi Otọ́ owanyinọ de, Jehovah ko tin, bo tin todin, bo nasọ tin tẹgbẹ na omẹ etọn lẹ. Na nugbo jiawu ehe ni miọnhomẹna we!—Psalm 90:1.