Plọnnu sọn Ohó Jiwheyẹwhe Tọn Mẹ

Naegbọn Jiwheyẹwhe Tindo Titobasinanu De?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Naegbọn Jiwheyẹwhe basi titona Islaeli hohowhenu tọn?

Jiwheyẹwhe basi titona kúnkan Ablaham tọn bo hẹn yé zun akọta de bosọ na yé todohukanji osẹ́n tọn. E ylọ akọta lọ dọ “Islaeli” podọ akọta ehe kẹdẹ wẹ tẹdo sinsẹ̀n-bibasi nugbo po ohó etọn po go. (Psalm 147:19, 20) Enẹwutu, omẹ akọta lẹpo tọn sọgan mọaleyi gbọn Islaeli gblamẹ.—Hia Gẹnẹsisi 22:18.

Jiwheyẹwhe de Islaelivi lẹ nado yin kunnudetọ etọn lẹ. Otàn yetọn do lehe osẹ́n Jiwheyẹwhe tọn lẹ yìnyìn nọ hẹn ale wá na gbẹtọ lẹ do hia. (Deutelonomi 4:6) Enẹwutu, gbọn Islaelivi lẹ gblamẹ, mẹdevo lẹ sọgan plọn nado yọ́n Jiwheyẹwhe nugbo lọ.—Hia Isaia 43:10, 12.

2. Naegbọn Klistiani nugbo lẹ yin tito-basina?

To ojlẹ de godo, Islaeli hẹn nukundagbe Jiwheyẹwhe tọn bu bọ Jehovah yí agun Klistiani tọn do diọ akọta enẹ. (Matiu 21:43; 23:37, 38) Todin, Klistiani nugbo lẹ to Jehovah sẹ̀n taidi kunnudetọ etọn lẹ to otẹn Islaelivi lẹ tọn mẹ.—Hia Owalọ lẹ 15:14, 17.

Jesu basi titona hodotọ etọn lẹ na yé nido nọ dọyẹwheho bo nọ hẹn gbẹtọ lẹ sọn akọta lẹpo mẹ zun devi. (Matiu 10:7, 11; 24:14; 28:19, 20) Mí to gbẹnọ to vivọnu titonu ehe tọn, podọ azọ́n lọ na yin tadona to madẹnmẹ. Whla tintan die to whenuho mẹ he Jehovah bẹ gbẹtọ livi susu pli sọn akọta lẹpo mẹ do sinsẹ̀n-bibasi nugbo lọ mẹ. (Osọhia 7:9, 10) Klistiani nugbo lẹ yin tito-basina nado nọ na tuli po alọgọ po ode awetọ. Lẹdo aihọn pé, yé nọ duvivi tito-to-whinnu sinai do Biblu ji dopolọ tọn to opli yetọn lẹ ji.—Hia Heblu lẹ 10:24, 25.

  3. Nawẹ titobasinanu egbezangbe tọn Kunnudetọ Jehovah tọn lẹ tọn bẹjẹeji gbọn?

To owhe 1870 tọn lẹ mẹ, pipli pẹvi Biblu plọntọ delẹ tọn jẹ nugbo Biblu tọn he ko bu na ojlẹ dindẹn lẹ mọ ji. Yé yọnẹn dọ Jesu basi titona agun Klistiani tọn nado dọyẹwheho wẹ, enẹwutu yé bẹ nujijla yẹwhehodidọ Ahọluduta lọ tọn de jẹeji lẹdo aihọn pé. To 1931, yé kẹalọyi yinkọ lọ Kunnudetọ Jehovah tọn lẹ.—Hia Owalọ lẹ 1:8; 2:1, 4; 5:42.

4. Nawẹ Kunnudetọ Jehovah tọn lẹ yin tito-basina gbọn?

To owhe kanweko tintan whenu, hagbẹ anademẹtọ tangan de he kẹalọyi Jesu taidi Ota agun lọ tọn hẹn ale susu wá na agun Klistiani tọn lẹ to otò susu mẹ. (Owalọ lẹ 16:4, 5) Mọdopolọ to egbehe, Kunnudetọ Jehovah tọn lẹ kẹalọyi Jesu taidi Nukọntọ yetọn. (Matiu 23:9, 10) Yelọsu nọ mọ ale susu yí sọn Hagbẹ Anademẹtọ dè, ehe bẹ mẹho numimọnọ lẹ hẹn he nọ wleawu tuli po anademẹ sinai do Owe-wiwe ji po tọn na agun 100 000 linlán. To agun dopodopo mẹ, sunnu he pegan lẹ nọ wadevizọn taidi mẹho agun tọn kavi nugopọntọ. Sunnu ehelẹ nọ yí owanyi do penukundo lẹngbọpa Jiwheyẹwhe tọn go. —Hia 1 Pita 5:2, 3.

Kunnudetọ Jehovah tọn lẹ yin tito-basina nado dọyẹwheho wẹndagbe lọ tọn bo hẹn gbẹtọ lẹ zun devi. Nado gọalọna gbẹtọ lẹ to filẹpo, yé nọ basi lẹdogbedevomẹ owe sinai do Biblu ji lẹ tọn, nọ zín owe enẹlẹ tọ́n bo nọ má yé to ogbè 500 linlán mẹ. Taidi apọsteli lẹ, yé nọ dọyẹwheho sọn whédegbè jẹ whédegbè. (Owalọ lẹ 20:20) Yé nọ ze tito Biblu pinplọn tọn donukọnna gbẹtọ ahunjijlọnọ he yiwanna nugbo lọ lẹ. To whenuena e yindọ omẹ Jehovah tọn lẹ yin tito-basina nado wà ojlo Jiwheyẹwhe tọn bo gọalọna mẹdevo lẹ, yewlẹ wẹ yin whẹndo ayajẹnọ hugan to aigba ji.—Hia Psalm 33:12; Owalọ lẹ 20:35.

Na nudọnamẹ dogọ, pọ́n weta 19tọ owe Etẹwẹ Biblu Plọn Mí Taun tọn, he Kunnudetọ Jehovah tọn lẹ zinjẹgbonu.