Biblu Nọ Diọ Gbẹzan Mẹtọn

“Yanwle ṣie wẹ nado lẹzun yẹwhenọ”

Dile e yin didọ gbọn Roberto Pacheco dali

OWHE HE MẸ N’YIN JIJI: 1957

OTÒ HE MẸ N’WÁ SỌN: MEXIQUE

OTÀN ṢIE: N’YÌ WEHỌMẸ YẸWHENỌ LẸ TỌN; N’YLÀNHUN TAUN

NUHE N’YIN DAI: Tòpẹvi Texcoco tọn mẹ wẹ n’yin jiji te. To ojlẹ lọ mẹ, suhugan tòhomẹ-liho lẹ tọn wẹ ma ko yin titẹ́ bo nọ gọ́ na afínfín. Mẹhe to gbétatò lẹdo lọ tọn mẹ lẹ nọ saba doagban nuhe yé jlo na sà lẹ tọn do kẹtẹkẹtẹ yetọn lẹ ji wá tòhomẹ. Whẹndo wamọnọ tọn mẹ wẹ n’whẹ́n te, podọ yẹn wẹ yin ṣinawetọ to ovi ṣinẹnẹ he mẹjitọ ṣie lẹ ji lẹ mẹ. Afọpa wẹ otọ́ ṣie nọ jlado nado penukundo whẹndo lọ go. Amọ́, e kú to whenue n’tindo owhe ṣinawe. Sọn whenẹnu, onọ̀ ṣie nọ hòkàn taun whẹpo mí do nọ mọ núdù.

Onọ̀ ṣie sin otọ́ nọ hò violon bo nọ deanana nuhogbẹ́ de he nọ honú na mẹhe nọ ji sinsẹ̀n-hàn lẹ. Diblayin mẹhe to whẹndo ṣie mẹ lẹpo wẹ yọ́n hànjinu de hò. Onọ̀ ṣie nọ jihàn to hànjigbẹ́ ṣọṣi tọn mẹ, podọ ylọnẹn ṣie nọ jihàn to nupọntẹn daho opéra tọn lẹ bosọ nọ hò piano. Katoliki akonka wẹ mí yin—n’yin dopo to jọja he nọ yilizọn na yẹwhenọ to agbà nukọn lẹ mẹ, podọ yanwle ṣie wẹ nado lẹzun mẹdehlan Katoliki tọn de. To ojlẹ dopolọ mẹ, n’yiwanna sinima karaté tọn lẹ taun. Sinima enẹlẹ pinpọn whẹwhẹ zọ́n bọ n’wá jẹ hùnylan ji.

N’yì wehọmẹ sinsẹ̀n tọn de to Puebla, ehe nọ yin anadena taidi wehọmẹ yẹwhenọ lẹ tọn. Yanwle ṣie wẹ nado lẹzun yẹwhenọ Katoliki tọn de. Ṣigba, to owhe godo tọn he n’basi to wehọ lọ mẹ, nujijọ delẹ diọ pọndohlan ṣie gando Ṣọṣi Katoliki tọn go. Jọja yẹwhenọ-yọnnu pamẹnọtọ de jlo dọ ma tindo kọndopọ zanhẹmẹ tọn hẹ emi. N’duto whlepọn lọ ji, ṣigba ninọmẹ enẹ zọ́n bọ asi didà wá jẹ jijlo mi ji. N’sọ doayi e go dọ yẹwhenọ susu wẹ yiwanna yẹnuwiwa. To nukọn mẹ, n’wá gbẹkọ yanwle ṣie nado yin yẹwhenọ go.

 N’de nado plọn nuhiho to Conservatoire national de musique to Tòdaho Mexique tọn mẹ. To whenue n’fó wehọmẹ, n’dà asi bọ mí jivi ẹnẹ. To ojlẹ lọ mẹ, ohàn wẹ n’nọ ji to Ṣọṣi Katoliki tọn mẹ nado penukundo whẹndo ṣie go.

Sọn whenue gbọ́n n’wlealọ, whẹgbè janwẹ yẹn po asi ṣie po nọ to dido. Mí nọ ylanhùn do míde go, titengbe na mí omẹ awe lẹ nọ whànwu wutu. To bẹjẹeji, mí nọ dọ danú na mídelẹ, ṣigba to nukọn mẹ mí wá jẹ avùnho ji. Wagbọ-wagbọ etọn, to owhe 13 godo, mí de nado klan podọ nado wá basi gbẹdai.

LEHE BIBLU DIỌ GBẸZAN ṢIE DO: Whẹpo yẹn po asi ṣie po do klan wẹ n’dọho hẹ Kunnudetọ Jehovah tọn lẹ whla tintan. Kunnudetọ awe húhúhọ̀n na mí bo jlo na dọhodo Biblu ji hẹ mí. Na n’ko nọ mọdọ n’yọ́n nususu gando sinsẹ̀n go wutu, n’magbe nado dohia yé dọ yé ma yọ́n nude. Kanbiọ sinsinyẹn he n’lẹndọ gblọndo yetọn ma tin lẹ wẹ n’fọndote. Amọ́, e paṣa mi dọ yé yí Biblu do na mi gblọndo kanbiọ lọ lẹ dopodopo tọn. Vudevude, e wá họnwun na mi dọ yẹn wẹ ma yọ́n nude. Ṣigba, na asi ṣie nọ ylanhùn do yé go bọ alọnu yẹnlọsu tọn nọ ján taun wutu, yẹn po Kunnudetọ lọ lẹ po masọ nọ mọ míde ba.

To owhe atọ́n godo, n’vọ́ dukosọna Kunnudetọ Jehovah tọn lẹ, podọ to ojlẹ lọ mẹ, yọnnu devo he nọ yin Elvira wẹ to họmẹ na mi. Na ewọ ma diọnukunsọ Kunnudetọ lẹ wutu, e bọawuna mi nado plọn Biblu po yé po to gbesisọ mẹ. Etomọṣo, owhe susu wẹ e yí to asi e nado diọ gbẹzan he n’nọ zan dai.

E wá họnwun na mi dọ eyin n’jlo na yí ahun ṣie lẹpo do sẹ̀n Jehovah, n’dona basi diọdo he ma na bọawu delẹ. Tintan whẹ́, n’dona jo azọ́n hànjiji to Ṣọṣi Katoliki tọn mẹ do bo dín agbasazọ́n devo nado penukundo whẹndo ṣie go. (Osọhia 18:4) Gbọnvona enẹ, n’sọ dona wlealọ hẹ Elvira sọgbe hẹ osẹ́n.

Dopo to diọdo he e vẹawuna mi hugan nado basi lẹ mẹ wẹ nado jo hùnyinylan do. Wefọ Biblu tọn awe delẹ wẹ gọalọna mi taun: Psalm 11:5 he dohia dọ Jehovah gbẹwanna danuwiwa, podọ 1 Pita 3:7 he plọn mi dọ eyin n’jlo dọ Jehovah ni sè odẹ̀ ṣie lẹ, n’dona nọ wleyẹyina asi ṣie. Ayihamẹlinlẹnpọn do wefọ enẹlẹ ji po alọgọ Jehovah tọn bibiọ to odẹ̀ mẹ po gọalọna mi nado jẹ hùnyinylan ṣie jodo ji vudevude.

ALE HE N’MỌYI LẸ: Todin, n’tindo ayajẹ taun to whẹndo ṣie mẹ. N’to vivẹnudo nado vọ́ haṣinṣan ṣie jlado hẹ visunnu he asi ṣie tintan ji na mi lẹ, podọ nado gọalọna whẹndo ṣie dintọn nado lodo to yise mẹ.

To whenue n’to ovu, yanwle ṣie wẹ nado lẹzun yẹwhenọ podọ nado nọ gọalọna gbẹtọ lẹ. Todin, gbẹzan ṣie pọnte taun. Nuhiho wẹ n’nọ plọnmẹ to alọnu din nado penukundo whẹndo ṣie go. N’dopẹ́ taun dọ Jehovah do homẹfa hia mi bo na mi dotẹnmẹ nado diọ jijọ podọ nado lẹzun gbẹtọ-jọ-gbẹtọ.

[Nudọnamẹ tangan lẹ to weda 8]

Taidi jọja de he nọ yilizọn na yẹwhenọ to agbà nukọn, yanwle ṣie wẹ nado lẹzun mẹdehlan Katoliki tọn de, ṣigba n’sọ yiwanna sinima karaté tọn lẹ taun, ehe zọ́n bọ n’wá jẹ hùnylan ji

[Nudọnamẹ tangan lẹ to weda 9]

Biblu plọn mi dọ eyin n’jlo dọ Jehovah ni sè odẹ̀ ṣie lẹ, n’dona nọ wleyẹyina asi ṣie