BE gbẹtọvi depope na penugo nado hẹn nugbonọ-yinyin etọn na Jiwheyẹwhe go, eyin e pehẹ whlepọn jẹ obá godo tọn mẹ podọ eyin e taidi dọ tonusise ma to ale nujọnu tọn de hẹnwana ẹn ya? Kanbiọ ehe ko fọndote wayi—podọ gblọndo etọn ko yin nina—gbọn nujijọ he gando dawe lọ Jobu go gblamẹ.

To whenue Islaelivi lẹ pò to Egipti, Jobu, he yin hẹnnumẹ Ablaham tọn de tin to lẹdo de mẹ he nọ yin yiylọ to egbé dọ Alabia. To ojlẹ enẹ gblamẹ, angẹli lẹ pli dopọ to olọn mẹ to Jiwheyẹwhe nukọn, podọ Satani atẹṣitọ lọ lọsu tin to ṣẹnṣẹn yetọn. To pipli nudida gbigbọnọ enẹ lẹpo tọn nukọn, Jehovah dọ dọ emi dejido devizọnwatọ nugbonọ emitọn Jobu go. Na nugbo tọn, Jehovah dọ dọ gbẹtọvi devo depope ma yin tenọglinọ sọ Jobu. Etomọṣo, Satani dọ madoadúdẹji dọ Jobu to Jiwheyẹwhe sẹ̀n na Jiwheyẹwhe ko dona ẹn bosọ to awà ṣinyọ́n e ji poun wutu wẹ. Satani sọalọakọ́n dọ eyin Jobu ba nuhe e tindo lẹpo pò, e na zánnu do Jiwheyẹwhe go.

Enẹwutu, Jiwheyẹwhe na dotẹnmẹ Satani, jẹnukọn whẹ́ nado hẹn adọkun Jobu tọn gble pete, nado hẹn okú wá ovi etọn lẹ ji podọ nado do azọ̀n ẹn to godo mẹ. Whenuena e yindọ Jobu to tókuku-ahọ̀nyinyọn gando adà Satani tọn to whẹho lọ mẹ go, e vẹawuna ẹn nado mọnukunnujẹ nuhewutu Jiwheyẹwhe dike bọ adán ehe nkọ lẹ do to gbigbò e mẹ. Mahopọnna enẹ, Jobu ma gbẹ́ Jiwheyẹwhe dai gbede.

Họntọn lalo atọ̀n delẹ wá dla Jobu pọ́n. Hodọdopọ he yé tindo hẹ ẹ yin kinkandai to owe Jobu tọn mẹ; kandai lọ dohia dọ sunnu ehelẹ tẹnpọn nado diọlinlẹnna Jobu to aliho agọ̀ mẹ bo jlo na hẹn ẹn lẹndọ Jiwheyẹwhe wẹ to yasana ẹn na ylando he e whlá delẹ wutu. Yé sọ yidogọ dọ Jiwheyẹwhe ma tlẹ nọ tindo homẹhunhun depope to devizọnwatọ etọn lẹ mẹ, mọ e ma nọ dejido yé go. Jobu jẹagọdo nulẹnpọn agọ̀ yetọn lẹ. Podọ e dọna yé po nujikudo po dọ emi na tẹdo tenọgli emitọn go, bọ okú ján na dá!

Amọ́ gbọn nuṣiwa dali, Jobu suwhẹna ede di dodonọ zẹjlẹgo. Jọja sunnu de he nọ yin Elihu lọsu tin to otẹn lọ mẹ bo to todoaina hodọdopọ lọ sọn bẹjẹeji, podọ todin e wá kẹnù. Elihu gbẹnuna Jobu, na e gboawupo nado dohia dọ whẹsuna nupojipetọ-yinyin Jehovah Jiwheyẹwhe tọn yin nujọnu taun hú whẹsuna gbẹtọvi depope. Elihu sọ wọhẹ họntọn lalo Jobu tọn lẹ sinsinyẹn.

Enẹgodo, Jehovah Jiwheyẹwhe lọsu dọhona Jobu, bo vọ́ nulẹnpọn etọn jlado. Gbọn ayidonugo Jobu tọn dindọn wá nudida jiawu susu he tin lẹ ji dali, Jehovah dohia ẹ obá he mẹ gbẹtọvi whète taun sọ do kiklo Jiwheyẹwhe tọn. Jobu yí whiwhẹ do kẹalọyi wọhẹmẹ he e mọyi sọn Jiwheyẹwhe dè. Na Jehovah “tindo owanyi sisosiso bosọ yin lẹblanunọ” wutu, e hẹnazọ̀ngbọna Jobu bo vọ́ na ẹn donu awe adọkun he e ko tindo dai tọn, podọ e dona ẹn bọ e vọ́ ji ovi ao devo lẹ. (Jakọbu 5:11) Mọwẹ, tenọgligo-hinhẹn Jobu tọn to adà Jehovah tọn mẹ, etlẹ yin pannukọn whlepọn sinsinyẹn lẹ, yin aliho dagbe hugan de nado na gblọndo avùnnukundiọsọmẹ Satani tọn, mẹhe sọalọakọ́n dọ gbẹtọvi de ma gán zindonukọn nado to nugbonọ yin na Jiwheyẹwhe eyin e pehẹ whlepọn lẹ.

—Sinai do owe Jobu tọn ji.