Naegbọn Kunnudetọ Jehovah Tọn lẹ Ma Nọ Dohùn?
Linlẹn agọ̀ he gbayipe lẹ
Lalo: Kunnudetọ Jehovah tọn lẹ ma yise dọ amasin kavi nukunpedomẹgo dotowhé tọn lẹ sọgan hẹnazọ̀ngbọna yé.
Nugbo lọ: Mí nọ dín nukunpedomẹgo dotowhé tọn dagbe hugan lẹ na mílọsu po whẹndo mítọn lẹ po. Eyin mí tindo nuhahun agbasalilo tọn, mí nọ yì dotozọ́nwatọ he sọgan wazọ́n na mí matin hùndido lẹ dè. Mí yọ́n pinpẹn nukọnyiyi he wá aimẹ to dotozọ́nwiwa-liho lẹ tọn taun. Na nugbo tọn, nukunpedomẹgo matin hùndido he yin awuwlena nado penukundo Kunnudetọ he to azọ̀njẹ lẹ go nọ yin yiyizan todin na mẹhe ma tlẹ yin Kunnudetọ lẹ lọsu. To otò susu mẹ, awutunọ depope sọgan de todin nado dapana owù he hùndido nọ hẹnwa lẹ, taidi azọ̀n he ohùn mẹdevo tọn nọ bẹpla mẹ lẹ, nuṣiwa gbẹtọ tọn lẹ, kavi nuhahun agbasalilo tọn devo lẹ.
Lalo: Kunnudetọ Jehovah tọn lẹ nọ lẹndọ yise mẹde tọn sọgan hẹnazọ̀ngbọna ẹn.
Nugbo lọ: Mí ma nọ hẹnazọ̀ngbọna mẹ to azọ́njiawu-liho.
Lalo: Nukunpedomẹgo matin hùndido nọ vẹahi taun.
Nugbo lọ: Nukunpedomẹgo dotowhé tọn matin hùndido nọ de akuẹzinzan nukunpedomẹgo tọn lẹ pò. a
Lalo: Kunnudetọ susu gọna ovi yetọn lẹ wẹ nọ kú to whemẹwhemẹ na yé nọ gbẹ́ nado dohùn wutu.
Nugbo lọ: Lalo pete wẹ. Doto mẹzẹtọ lẹ nọ wazọ́n mẹzizẹ tọn he gẹdẹ taun lẹ taidi ahun zizẹ, ohú zizẹ, po nugonu agbasa tọn lẹ vivọ́ donamẹ po matin hùndido. b Awutunọ he ma dohùn lẹ, eyin yé tlẹ yin yọpọvu, nọ tindo agbasalilo dagbe hugan mẹhe yè dohùn na lẹ. c Depope he whẹho lọ yin, mẹde ma sọgan dọ po nujikudo po eyin awutunọ de na kú na e ma dohùn wutu, kavi dọ e na gán na e dohùn wutu.
Naegbọn Kunnudetọ Jehovah tọn lẹ Ma Nọ Dohùn?
Whẹho nuyise tọn de wẹ, e ma yin whẹho nukunpedomẹgo dotowhé tọn de poun gba. Alẹnu Hoho po Alẹnu Yọyọ lọ po dọna mí tlọlọ nado nọla na ohùn. (Gẹnẹsisi 9:4; Levitiku 17:10; Deutelonomi 12:23; Owalọ lẹ 15:28, 29) Podọ Jiwheyẹwhe nọ pọ́n ohùn taidi ogbẹ̀. (Levitiku 17:14) Enẹwutu, nado setonuna Jiwheyẹwhe bosọ do sisi hia ẹ na Ewọ wẹ na mí ogbẹ̀ wutu, mí ma nọ dohùn.
Mẹsusu to pọndohlan yetọn diọ
Doto lẹ sọgan wazọ́n mẹzizẹ tọn he gẹdẹ lẹ po kọdetọn dagbe po matin hùndido
To ojlẹ de mẹ wayi, dotozọ́nwatọ lẹ nọ saba lẹndọ azọ́nwiwa na mẹ matin hùndido ma sọgbe paali bo tlẹ nọ yin pinpọnhlan taidi mẹhuhu, ṣigba to owhe agọe tọn lẹ mẹ pọndohlan mọnkọtọn ko diọ. Di apajlẹ, to 2004 hosọ he yin zinzinjẹgbonu to linlinwe dotozọ́nwiwa tọn de mẹ dọ dọ “aliho he nọ yin yiyizan nado penukundo awutunọ Kunnudetọ Jehovah tọn lẹ tọn go na wá lẹzun aliho paa he mẹ yè na nọ penukundo mẹlẹpo go te to owhe he ja lẹ mẹ.” d Hosọ de to owe lọ Heart, Lung and Circulation mẹ dọ to 2010 dọ “‘mẹzizẹ matin hùndido’ ma dona nọte do Kunnudetọ Jehovah tọn lẹ kẹdẹ ji gba, ṣigba e dona nọ yin yiyizan na awutunọ lẹpo.”
To alọnu din, dotozọ́nwatọ fọtọ́n susu lẹdo aihọn pé nọ wazọ́n mẹzizẹ he gẹdẹ tọn lẹ matin hùndido. Azọ́nwiwa to aliho mọnkọtọn mẹ nọ yin yiyizan to otò he tlẹ to nukunhun lẹ mẹ, podọ awutunọ susu he ma tlẹ yin Kunnudetọ Jehovah tọn lẹ nọ biọ nado yin nukunpedego to aliho enẹ mẹ.
a Pọ́n owe lọ Transfusion and Apheresis Science, Volume 33, No. 3, w. 349.
b Pọ́n owe lọ lẹ The Journal of Thoracic and Cardiovascular Surgery, Volume 134, No. 2, w. 287-288; Texas Heart Institute Journal, Volume 38, No. 5, w. 563; Basics of Blood Management, w. 2; po Continuing Education in Anaesthesia, Critical Care & Pain, Volume 4, No. 2, w. 39 po.
c Pọ́n owe lọ lẹ The Journal of Thoracic and Cardiovascular Surgery, Volume 89, No. 6, w. 918; po Heart, Lung and Circulation, Volume 19, w. 658 po.
d Pọ́n owe lọ Continuing Education in Anaesthesia, Critical Care & Pain, Volume 4, No. 2, weda 39.