To Australie, dile e te do to otò susu mẹ, sọha mẹhomẹ lẹ tọn fọ́n bo to jijideji. Mẹhomẹ delẹ nọ sẹtẹn yì owhé mẹgopinpọ́n tọn lẹ gbè bọ azọ́nwatọ he to finẹ lẹ nọ yí homẹdagbe do gọalọna yé bo nọ penukundo agbasalilo po nuhudo egbesọ tọn yetọn lẹ po go.

E họnwun dọ susu mẹhe nọ nọ̀ owhé mẹgopinpọ́n tọn gbè lẹ tọn wẹ tindo nuhudo devo lẹ gbọnvona dehe gando agbasalilo go lẹ. Yé gán nọ mọ apọ̀ to whedelẹnu bo nọ tindo numọtolanmẹ ṣokẹdẹninọ kavi agbátọnọ-yinyin tọn. Kunnudetọ Jehovah tọn lẹ nọ hẹn todido po homẹmiọnnamẹ po wá na omẹ mọnkọ lẹ to dlapọn sẹmẹsẹmẹ tọn he yé nọ basi lẹ whenu to owhé mẹgopinpọ́n tọn awe delẹ gbè to Portland, yèdọ tòpẹvi de to Victoria, Australie.

Kunnudetọ lẹdo lọ tọn lẹ nọ pli hẹ yọnhonọ he to owhé lọ lẹ gbè lẹ bo nọ dọhodo hosọ Biblu tọn delẹ ji hẹ yé, taidi nujijọ tangan delẹ to gbẹzan Jesu tọn mẹ. “Mí nọ hia wefọ Biblu tọn lẹ na mẹhomẹ lọ lẹ,” wẹ Jason dọ “enẹgodo mí nọ dọhodo kandai lọ ji hẹ yé.” Na susu mẹhe nọ nọ̀ hodọdopọ lọ tẹnmẹ lẹ tọn wẹ tindo nuhahun agbasamalo tọn lẹ wutu, Kunnudetọ lọ lẹ sọ nọ dọhodo opagbe Jiwheyẹwhe tọn nado de azọ̀n po okú po sẹ̀ ji nado na yé todido po tuli po.

“To bẹjẹeji, dlapọn mítọn ma nọ dẹn hú nukunwhiwhe 30, amọ́ mẹhomẹ lọ lẹ jlo dọ mí ni nọ nọ̀ humọ,” wẹ Kunnudetọ lẹdo lọ tọn de he nọ yin Tony dọ. “Enẹwutu, todin hodọdopọ lọ nọ dẹn na nudi gànhiho dopo, dile etlẹ yindọ dopo to yé mẹ gbẹ́ jlo dọ ni dẹn na nudi gànhiho awe!” Na delẹ to yé mẹ masọ nọ mọnú ba, bo ma gán fọ́n kavi hẹn núgo wutu, Kunnudetọ lọ lẹ nọ gọalọna yé to hodọdopọ lọ whenu bo nọ na tuli yé nado tindo mahẹ dile yé penugo do.

To dlapọn lọ whenu, Kunnudetọ lọ lẹ nọ jihàn pipà tọn delẹ hlan Jiwheyẹwhe to pọmẹ hẹ mẹhomẹ lọ lẹ bọ yé nọ saba to bibiọ dogọ. John, a he yin dopo to mẹhomẹ lọ lẹ mẹ dọmọ: “Mí yiwanna ohàn he mì nọ hẹnwa lẹ. Yé nọ gọalọna mí nado yọ́n Jiwheyẹwhe bo na ẹn sisi.” Judith, yèdọ mẹhomẹ devo he ma nọ mọnú, ko plọn hogbe ohàn he e yiwanna hugan lẹ tọn do tamẹ!

Dagbemẹninọ mẹhomẹ lọ lẹ dopodopo tọn nọ duahunmẹna Kunnudetọ lọ lẹ. Mẹdezejotọ de he nọ yin Brian dọ dọ eyin mẹhomẹ lọ lẹ to azọ̀njẹ, Kunnudetọ lẹ nọ yì dla yé pọ́n to ohọ̀ yetọn lẹ mẹ. “Mí nọ nọwhẹ̀ do yé bo nọ kàn dagbemẹninọ yetọn sè. To whedelẹnu, mí nọ lẹkọwa to azán devo ji nado pọ́n lehe mẹhe to azọ̀njẹ lọ te do.”

Susu mẹhe nọ nọ̀ owhé mẹgopinpọ́n tọn gbè lẹ tọn wẹ nọ duvivi dlapọn lọ lẹ tọn. Peter, he nọ nọ̀ hodọdopọ lọ tẹnmẹ to sẹmẹsẹmẹ dọmọ: “N’nọ to jejeji nado wá.” Judith nọ dọna mẹgopọntọ etọn lẹ dọ: “Mercredi wẹ egbé! Mì jaale bo sọnú na mi na tito Biblu pinplọn tọn lọ. N’ma jlo na gbọwhenu!”

Mẹhomẹ lọ lẹ yiwanna nuhe plọn yé te lẹ taun bosọ nọ mọdọ emi dọnsẹpọ Jiwheyẹwhe hugan dai. To hodidọ do nuplọnmẹ Jesu tọn lẹ ji godo, Robert dọmọ: “N’ma mọnukunnujẹ wefọ Biblu tọn ehe mẹ pọ́n. Din wẹ e wá họnwun na mi!” David ko wá yọ́n nujọnu-yinyin odẹ̀ tọn todin bo dọmọ: “E ko gọalọna mi nado wleawuna haṣinṣan de hẹ Jiwheyẹwhe bọ ewọ wá lẹzun omẹ nujọnu tọn de na mi.”

Homẹ mẹhomẹ lọ lẹ tọn nọ hùn taun nado plọnnu gando todido sọgodo tọn he to Biblu mẹ go. Dopo to yé mẹ he nọ yin Lynette dọna Kunnudetọ lẹ dọmọ: “E na ṣẹ na mì na homẹmiọnnamẹ Biblu tọn he mì nọ hẹnwa na mí.” Mẹdevo dọmọ: “Jiwheyẹwhe wẹ do mì hlan!”

Margaret nọ duvivi dlapọn lọ lẹ tọn sọmọ bọ e ko jẹ opli Kunnudetọ Jehovah tọn lẹ tọn wá ji to gbesisọ mẹ to Plitẹnhọ Ahọluduta tọn lẹdo lọ tọn mẹ. Ehe nọ biọ vivẹnudido to e si taun na agbasamalo po madogán etọn po nọ hẹn tẹnsisẹ vẹawuna ẹn wutu. E dọna Kunnudetọ lẹ dọmọ: “Mì ko na dopodopo mítọn whẹwhinwhẹ́n de nado to gbẹnọ zọnmii.”

Azọ́nwatọ he to finẹ lẹ lọsu nọ yiwanna dlapọn Kunnudetọ lẹ tọn. Anna, he yin dopo to Kunnudetọ lẹdo lọ tọn lẹ mẹ dọmọ: “Azọ́nwatọ lọ lẹ nọ na tuli mẹhomẹ lọ lẹ nado wá hodọdopọ lọ lẹ tẹnmẹ na yé mọdọ e nọ yidogọna ayajẹ yetọn taun wutu.” Brian, he go mí donù wayi yidogọ dọmọ: “Azọ́nwatọ lọ lẹ jọmẹ bosọ nọ kọngbedopọ. Yé nọ wà nuhe go yé pé lẹpo nado gọalọ.”

E nọ vivi na hagbẹ whẹndo tọn mẹhomẹ lọ lẹ tọn nado mọ obá he mẹ mẹyiwanna yetọn lẹ nọ duvivi hodọdopọ lọ lẹ tọn jẹ. Viyọnnu dopo to mẹhomẹ lọ lẹ mẹ tọn na pipà Kunnudetọ lẹ dọmọ: “Nujiawu de wà wẹ mì te na onọ̀ ṣie.”