To août 2014, Kunnudetọ Jehovah tọn lẹ má alọnuwe pẹvi de lẹdo aihọn pé nado fọ́n ojlo gbẹtọ lẹ tọn dote gando nọtẹn Intẹnẹt tọn jw.org go. Enẹ zọ́n bọ sọha mẹhe nọ yì nọtẹn lọ ji lẹ tọn jideji bo hugan gbẹtọ 20 to 100 ji to osun lọ mẹ bo pé nudi gbẹtọ livi 65. Lẹdo aihọn pé, nudi gbẹtọ 10 000 wẹ biọ gbọn nọtẹn lọ ji dọ yè ni wá plọn Biblu hẹ emi vọnu to whégbè: ehe basi jideji gbẹtọ 67 to 100 ji yijlẹdo osun he jẹnukọnna ẹn lọ go! Nujijla lọ gọalọna gbẹtọ lẹ to filẹpo.

To Canada, Kunnudetọ de dọnudo Madeline to ascenseur mẹ (maṣinu he nọ ze omẹ yì petlezìn ji) bo do alọnuwe pẹvi lọ Fie Wẹ Mí Sọgan Mọ Gblọndo Na Kanbiọ Titengbe Gbẹ̀mẹ Tọn lẹ Te? ehe yè to mimá hia ẹ. Madeline dọ dọ to zánmẹ, emi ko hodẹ̀ vẹkuvẹku na Jiwheyẹwhe to agbàsẹnu petlezìn he ji emi nọ nọ̀ lọ tọn bo biọ dọ ni gọalọna emi nado mọ gblọndo na kanbiọ titengbe mọnkọtọn lẹ. Jẹnukọnna enẹ, e ko ylọ ṣọṣi susu lẹ bo biọ to yé si nado plọn Biblu hẹ emi, ṣigba depope to yé mẹ ma gọ̀ ẹ ylọ. E ma dẹn bọ e jẹ Biblu plọn hẹ Kunnudetọ Jehovah tọn lẹ ji.

To Philippines, Rowena dọho hẹ dawe Chine-nu de he to ote to núdùdù-satẹn de nukọn. Rowena yí alọnuwe pẹvi lọ na ẹn bo basi zẹẹmẹ dọ Kunnudetọ Jehovah tọn lẹ jlo na gọalọna gbẹtọ lẹ nado mọaleyi sọn tito Biblu pinplọnmẹ tọn vọnu de mẹ.

Dawe lọ dọ dọ emi ma tlẹ ko mọ Biblu pọ́n. Hodọdopọ he bọdego whàn ẹn nado yì plidopọ Kunnudetọ Jehovah tọn lẹ tọn de. Enẹgodo, e dọ dọ emi jlo na mọnukunnujẹ nususu mẹ dogọ gando Biblu go bosọ to tito basi nado yí Biblu to nọtẹn Intẹnẹt tọn mítọn ji.

To Espagne, Guillermo he yin Kunnudetọ tókunọ de dukosọ hẹ Jorge, he yin wehọmẹvigbẹ́ hoho etọn de he yin tókunọ ga. Jorge dọ dọ onọ̀ emitọn kú to agọe bọ emi tin to bẹwlu mẹ bo tindo kanbiọ susu lẹ. Guillermo yí alọnuwe pẹvi he yè to mimá lọ na ẹn bo basi zẹẹmẹ lehe e sọgan mọ nudọnamẹ to jw.org ji to tókunọ-gbè mẹ, bo nasọ mọ gblọndo na kanbiọ susu he e tindo lẹ do. Guillermo sọ basi oylọna ẹn nado wá opli to Plitẹnhọ Ahọluduta tọn mẹ. E wá, podọ sọn whenẹnu, e masọ gọ̀n opli depope mahopọnna dọ fie e nọ nọ̀ dẹn do plitẹnhọ lọ na kilomẹtlu 60.

To Groenland, asu po asi po awe he yin Kunnudetọ lẹ zan akuẹ susu bo zingbejizọnlin to tọjihun pẹvi de mẹ na gànhiho ṣidopo nado yì dọyẹwheho to lẹdo de he mẹ gbẹtọ 280 te. Yé dọyẹwheho to finẹ, má alọnuwe pẹvi lẹ bo do video jw.org tọn de hia to Groenland-gbè mẹ. Gbọnvona enẹ, yé jẹ Biblu plọn ji hẹ asu po asi po de he yé dukosọ hẹ. Todin, yé nọ plọn Biblu hẹ yé whla awe to sẹmẹsẹmẹ gbọn alokan ji.

E ma yin otò enẹlẹ kẹdẹ mẹ vivẹnu yin dido te. To Nicaragua, Kunnudetọ lẹ basi tito nado má alọnuwe pẹvi lọ na mẹhe nọ do Mayangna-gbè lẹ to zungbo Caraïbe tọn mẹ. To whenue yé ko zingbejizọnlin ma nọte na gànhiho 20 to ahihun he dohó taun de mẹ to ali he tindo odò susu de ji godo, yé sọ wá zinzọnlin na gànhiho 11, bo tlẹ gbọn ogbọ̀n mẹ to fidelẹ, whẹpo do jẹ lẹdo he to olá lẹ mẹ. Yé má alọnuwe pẹvi lẹ to finẹ, do video lẹ hia to Mayangna-gbè mẹ, ehe jiawu bo hẹn homẹhun mẹhe to lẹdo lọ mẹ lẹ taun.

Estela yí alọnuwe pẹvi lọ na dawe de he juwajei gbọn gbétatò de mẹ to zungbo Amazone tọn mẹ to Brésil. Dawe lọ kẹalọyi alọnuwe pẹvi lọ, ṣigba e ze e do apòmẹ, na e ma tindo ojlo kaka de wutu. To whenue e jei whégbè, tọjihun etọn kúzò bo ma sọgan sẹtẹn ba. To whenue e to tenọpọn tọjihun devo nado wá gọalọna ẹn, e hia alọnuwe pẹvi lọ. E yí alokan apòmẹ tọn etọn zan nado yì jw.org ji, bo hia hosọ susu lẹ bosọ yí video delẹ to nọtẹn lọ ji. To azán delẹ godo, dawe lọ dukosọ hẹ asu Estela tọn bo dọna ẹn dọ ni dọnudo asi etọn na alọnuwe pẹvi he e yí na emi lọ. E dọmọ: “Hosọ voovo he n’hia to whenue ohún ṣie kúzò gọalọna mi bọ n’ma hanú susu, podọ n’nọte jẹ whenue tọjihun devo wá bo gọalọna mi. Ovi ṣie lẹ yiwanna video Kalẹb tọn lọ lẹ. N’na gbẹ́ nọ to jw.org ji yì.”