N’gbleawuna mẹhe po yẹn po nọ plọn avùn hugan nuhe n’donukun. N’gbà awọntin na ẹn to mayọnẹn mẹ. N’mọdọ n’hùwhẹ, podọ n’jẹ kinkanse dee ji eyin n’na gbẹ́ zindonukọn to avùn pinplọn mẹ. Naegbọn nuṣiwa enẹ na zọ́n bọ n’na do ayihaawe gando aihun he n’yiwanna bo to afọdona sọn owhe susu die go? Jẹnnukọn whẹ́, mì dike ma pintàn lehe n’bẹ avùnhiho pinplọn jẹeji do tọn.

 N’whẹ́n to fie sẹpọ Buffalo, New York, to États-Unis. Whẹndo ṣie do ayajẹ bosọ yin Katoliki akonka de. N’yì wehọmẹ Katoliki tọn lẹ bosọ sẹ̀n taidi yọpọvu he nọ yilizọn to agbà nukọn. Mẹjitọ ṣie lẹ jlo dọ yẹn po mẹdaho ṣie yọnnu po ni tọ́nta to gbẹ̀mẹ. Enẹwutu, yé yigbe dọ ma nọ daihun to wehọmẹ godo bosọ nọ wazọ́n ojlẹ gli tọn lẹ eyin n’nọ wazọ́n ganji to wehọmẹ. Ehe zọ́n bọ n’plọn lehe n’gán pé dee ji do sọn pẹvi.

 To whenue n’do owhe 17, n’jẹ avùnhiho plọn ji. Na owhe susu, n’nọ yí gànhiho atọ̀n do plọn avùn to gbèdopo, podọ na azán ṣidopo to osẹ dopodopo mẹ. To osẹ lẹpo mẹ, n’sọ nọ yí gànhiho susu do lẹnnupọndo wlẹnwin po gowhinwàn he n’gán nọ zan lẹ po ji, podọ n’sọ nọ pọ́n video lẹ nado yọ́n azọ́n ẹn dogọ. N’yiwanna nado nọ ṣinyọnnudo nukun to whenue n’to avùnhiho plọn, etlẹ yin whenue n’to adánwanu lẹ yizan. N’gán wẹ́n owhlẹ lẹ kavi gbà bliki po akotokún dopo po. N’yinukọn taun bo tlẹ dù ajọ̀ susu lẹ to agbàwhinwhlẹn lẹ whenu. Avùnhiho wẹ n’wá yiwanna hugan to gbẹ̀mẹ.

 N’do nue n’lẹndọ eyin nujọnu hugan to gbẹ̀mẹ lẹ. N’yí gbedewema wehọmẹ alavọ tọn po ajọ̀ daho lẹ po. N’wazọ́n to azọ́nwhé daho de taidi ọdinatẹẹ-zọ́nwatọ. N’mọ ale delẹ yí sọn azọ́nwhé lọ, n’do owhé bosọ do họntọn yọnnu. Mẹlẹ gán nọ mọdọ n’do ayajẹ, amọ́ e ma yinmọ, na n’do kanbiọ titengbe lẹ he n’ma yọ́n gblọndo yetọn.

 Na n’jlo na mọ gblọndo na kanbiọ ṣie lẹ wutu, n’jẹ ṣọṣi yì ji whla awe to osẹ dopo mẹ bosọ nọ hodẹ̀ hlan Jiwheyẹwhe dọ ni gọalọna mi. To gbèdopo, n’dọho hẹ họntọn ṣie de, hodọdopọ ehe wẹ diọ gbẹzan ṣie. N’kanse e dọ: “Be a ko kanse dewe pọ́n nuhewutu mí to gbẹ̀mẹ ya?” N’sọ yidogọ dọ: “Nuhahun susu wẹ gọ́ ogbẹ̀ lọ mẹ, podọ mawadodo sọ gbọn kámẹ-gòmẹ!” E dọna mi dọ emi ko kàn kanbiọ enẹlẹ nkọ sè emide pọ́n, amọ́ todin emi ko mọ gblọndo-jọ-gblọndo na kanbiọ enẹlẹ to Biblu mẹ. E na mi owe de he hosọ etọn yin: Hiẹ Sọgan Nọgbẹ̀ Kakadoi to Paladisi mẹ to Aigba Ji. a E dọna mi dọ emi ko to Biblu plọn hẹ Kunnudetọ Jehovah tọn lẹ. Tlolo he e ze owe lọ na mi, n’whleawu na n’lẹndọ n’ma dona hia owe devo depope gbọnvona sinsẹ̀n ṣie tọn. Amọ́, na n’jlo na mọ gblọndo na kanbiọ ṣie lẹ wutu, enẹ sisẹ́ mi nado dindona eyin nuhe Kunnudetọ lẹ nọ plọnmẹ sọgbe.

 Nuhe n’mọ plọn to Biblu mẹ lẹ paṣa mi taun. N’plọn dọ lẹndai dowhenu tọn Jiwheyẹwhe tọn wẹ yindọ gbẹtọvi lẹ ni nọgbẹ̀ kakadoi to Paladisi mẹ to aigba ji, podọ linlẹn Jiwheyẹwhe tọn enẹ ma ko diọ. (Jenẹsisi 1:28) E paṣa mi nado mọ to Biblu ṣie titi la Bible du roi Jacques Glẹnsigbe tọn mẹ dọ yinkọ Jiwheyẹwhe tọn wẹ Jehovah, podọ nado mọ plọn dọ yinkọ enẹ wẹ n’nọ hodẹ̀ hlan to whenue n’nọ to dọvọdọ Odẹ̀ Oklunọ tọn bayi. (Salmu lẹ 83:18; Matiu 6:9) To godo mẹ, n’wá mọnukunnujẹ nuhewutu Jiwheyẹwhe jotẹnna yajiji gbẹtọvi lẹ tọn na ojlẹ gli de mẹ. Nuhe n’plọn lẹpo wẹ sọgbe. E vivi na mi taun.

 N’ma sọgan wọn lee homẹ ṣie hùn do whla tintan he n’yì opli Kunnudetọ Jehovah tọn lẹ tọn gbede. Mẹlẹpo wẹ jọmẹ bo jlo na yọ́n yinkọ ṣie. To opli lọ ji, hodidọ vonọtaun de yin nina gando odẹ̀ he Jiwheyẹwhe nọ sè lẹ go. N’yiwanna hosọ lọ, na n’ko to alọgọ Jiwheyẹwhe tọn biọ to odẹ̀ mẹ wutu. Enẹgodo, n’yì hùnwhẹ Oflin Okú Jesu tọn. To opli enẹlẹ whenu, e nọ paṣa mi nado mọdọ yọpọvu lẹ tlẹ nọ hùn Biblu yetọn bo nọ hodo hodọtọ lọ to whenue e to wefọ Biblu tọn lẹ hia. To bẹjẹeji, n’ma yọ́n lehe yè nọ mọ wefọ Biblu tọn lẹ do, amọ́ Kunnudetọ lẹ gọalọna mi taun bo plọn mi lehe yè nọ mọ wefọ Biblu tọn lẹ do.

 Dee n’jẹ opli lẹ yì ji ganji, n’wá yiwanna onú dagbedagbe he Kunnudetọ lẹ nọ plọnmẹ taun. N’nọ plọn nususu to opli lẹpo whenu, podọ whedepopenu he n’yì opli, n’nọ mọ tuli po kọfanamẹ po yí. Kunnudetọ lẹ wá biọ to asi e nado plọn Biblu.

Nuhe n’mọ to Kunnudetọ Jehovah tọn lẹ ṣẹnṣẹn gbọnvo pete na nuhe n’ko nọ mọ to ṣọṣi ṣie mẹ. N’mọdọ Kunnudetọ lẹ yin pipli de he to kọndopọ mẹ bo nọ to vivẹnudo nado hẹn homẹ Jiwheyẹwhe tọn hùn. N’wá kudeji dọ yé nọ wanu di Klistiani nugbo lẹ na yé yiwanna yenọzo.—Johanu 13:35.

 Dile n’to nukọnyi to Biblu pinplọn ṣie mẹ sọ, mọ wẹ n’to diọdo lẹ bayi nado nọgbẹ̀ sọgbe hẹ nue n’plọn to Biblu mẹ lẹ do niyẹn. Amọ́, n’nọ mọdọ n’ma gán jo avùnhiho uwọ do gbede. N’yiwanna avùn pinplọn po agbàwhinwhlẹn po. To whenue n’dọ ehe na Kunnudetọ he to nuplọn hẹ mi lọ, e dọna mi dọ: “Saa to nuplọn zọmmi, n’yọnẹn dọ a na wá bayi nudide he sọgbe lọ.” Nuhe n’jlo na sè pẹẹ niyẹn. Dile n’to nuplọn yinukọn sọ, mọ wẹ n’nọ jlo na hẹn homẹ Jehovah Jiwheyẹwhe tọn hùn do niyẹn.

 Nuhe hẹn mi nado bayi diọdo wẹ nujijọ he go n’donù to bẹjẹeji lọ, enẹ wẹ whenue n’gbà awọntin na mẹhe po yẹn po nọ plọn avùn to mayọnẹn mẹ. Nujijọ enẹ hẹn mi lẹnnupọn taun, bọ n’nọ kanse dee vlavo n’gán yin hodotọ Klisti tọn jijọho-dintọ de eyin n’zindonukọn to avùnhiho pinplọn mẹ. N’ko plọn to Isaia 2:3, 4 mẹ dọ mẹhe jlo na setonuna nuhe Jehovah dọ lẹ ma dona “plọn awhànfunfun ba.” Podọ Jesu plọnmẹ ma nado wà danu etlẹ yin to whenue mẹdevo lẹ yinuwa hẹ yé po mawadodo po. (Matiu 26:52) Enẹwutu, n’jo aihun he n’yiwanna taun enẹ do.

 Enẹgodo, n’hodo ayinamẹ Biblu tọn he dọ dọ, “nọ to dewe plọn po yanwle lọ po nado tindo mẹdezejo na Jiwheyẹwhe.” (1 Timoti 4:7) Whenu po huhlọn he n’nọ zan dai na avùn pinplọn po wẹ n’nọ zan todin nado dọnsẹpọ Jiwheyẹwhe bo sẹ̀n ẹn. Họntọn ṣie yọnnu ma kẹalọyi nuhe plọn n’te sọn Biblu mẹ, enẹwutu mí jo míde do. N’yí baptẹm bo lẹzun Kunnudetọ Jehovah tọn to 24 janvier 1987. E ma dẹn bọ n’jẹ whenu susu yizan ji do dọ yẹwheho bo nọ desọn ojlo mẹ nado plọn Biblu mẹdevo lẹ. N’gbẹ́ nọ yí whenu susu zan to sinsẹ̀nzọn ehe mẹ, podọ n’sẹ̀n to tatọ́-tẹnnọ Kunnudetọ Jehovah tọn lẹ tọn to New York to États-Unis na ojlẹ de.

 Todin he n’yọ́n nugbo lọ gando Jiwheyẹwhe go, n’ko mọ nuhe jẹdò to gbẹzan ṣie mẹ lọ. N’masọ nọ mọdọ nude whèdo mi ba. Kakatimọ, gbẹzan ṣie yọ́n todin, bọ n’do todido dagbe de hlan sọgodo, n’sọ do ayajẹ taun. N’gbẹ́ nọ daihun lanmẹyiya tọn whẹwhẹ, amọ́ agbasa yiyizan masọ yin nujọnu hugan na mi ba. Jehovah Jiwheyẹwhe sinsẹ̀n wẹ yin nujọnu na mi hugan todin.

 Whenue n’gbẹ́ to avùnhiho plọn, n’nọ to aṣeji na mẹhe lẹdo mi lẹ nado yíavunlọna dee eyin mẹde tọnavùn mi. Amọ́ todin, n’gbẹ́ nọ to aṣeji na mẹhe lẹdo mi lẹ, amọ́ na whẹwhinwhẹn devo—enẹ wẹ nado gọalọna yé. Biblu gọalọna mi nado lẹzun alọtlútọ podọ asu dagbe de na asi yiwanna ṣie Brenda.

 Avùnhiho wẹ n’yiwanna hugan dai. Amọ́, n’ko yí nudagbe devo do diọtẹnna ẹn. Biblu dohia dọ: “Agbasa yiyizan yin alenu na onú vude, ṣigba mẹdezejo na Jiwheyẹwhe yin alenu na nulẹpo, na e tindo opagbe ogbẹ̀ dintọn podọ ogbẹ̀ he ja lọ tọn.”—1 Timoti 4:8.