Alokan Otò Tọn de Yin Yiyizan Nado Bayi Plọnmẹ Biblu Susu
Daiane yin dopo to Kunnudetọ Jehovah tọn lẹ mẹ, podọ wẹndagbe-jlatọ whenu-gigọ́ tọn de to Brésil. To gbèdopo, he e to wẹndagbe he to Biblu mẹ lá gbọn alokan ji, e dọhona asu po asi po jọja de he do ojlo hia. Yé dọna Daiane dọ emi jlo na sẹtẹn yì lẹdo he to olá de mẹ fie miyọ́n lẹtliki tọn kavi Intẹnẹt ma tin te. Humọ, Kunnudetọ Jehovah tọn depope ma nọ nọ̀ lẹdo lọ mẹ. Na yé nido zindonukọn to hodọdopọ sinai do Biblu ji yetọn mẹ, asu po asi po lọ na Daiane sọha alokan otò tọn he to gbétatò lọ mẹ tọn bọ yé omẹ atọ̀n lẹ kọngbedopọ do azán po gànmẹ he ji yé na nọ dọho te po ji.
Whenue ojlẹ he ji yé kọngbedopọ do lọ sọ̀, Daiane ylọ alokan otò tọn lọ bọ asu po asi po lọ ze! To osẹ awe he bọdego lẹ mẹ, whla atọ̀n wẹ Daiane tindo hodọdopọ sinai do Biblu hẹ yé gbọn alokan ji.
Amọ́ to ojlẹ enẹgodo, asu po asi po lọ masọ nọ ze oylọ alokan ji tọn etọn lẹ ba. Na Daiane ma gbọjọ wutu, e zindonukọn nado nọ ylọ alokan otò tọn lọ whla atọ̀n to osẹ dopo mẹ bo nọ dọhodo Biblu ji hẹ mẹdepope he ze oylọ lọ. Taidi kọdetọn de, Daiane bẹ plọnmẹ Biblu susu lẹ jẹeji hẹ omẹ voovo lẹ to gbétatò lọ mẹ.
To gbèdopo, dile Daiane po asu etọn po to anadena plọnmẹ Biblu jọja sunnu de tọn gbọn alokan otò tọn lọ ji, sinsẹ̀ngán de to gbétatò lọ mẹ sè hodọdopọ yetọn. E wá nọte to apá na jọja he to Biblu plọn lọ nado sọgan sè hodọdopọ lọ ganji. Enẹgodo, sinsẹ̀ngán lọ biọ nado dọho hẹ Daiane po asu etọn po. Nuhe e sè lọ vivi na ẹn sọmọ bọ ewọ lọsu biọ nado plọn Biblu ga!
To nukọn mẹ, Daiane po asu etọn po nọ deanana plọnmẹ Biblu ṣidopo gbọn alokan ji to gbétatò he to olá lọ mẹ, kakajẹ sinsẹ̀ngán lọ lọsu ji. Delẹ to Biblu plọntọ lọ lẹ mẹ tlẹ ko hodo opli Klistiani tọn lẹ gbọn alokan otò tọn lọ ji. Dopo to yé mẹ tlẹ wleawuna oján gaa de, na Biblu plọntọ hatọ lẹ nido mọ fihe yé na sinai do to nupinplọn lọ whenu.
Homẹ Daiane po asu etọn po tọn hùn taun na dotẹnmẹ hundote he yé tindo nado hẹn owẹ̀n Ahọluduta lọ tọn gbayipe to gbétatò he to olá ehe mẹ. Daiane dọ dọ, “Jehovah gán bayi tito na wẹndagbe lọ nido jẹ mẹdepope dè, eyin mẹlọ tlẹ nọ nọ̀ lẹdo he to olá de mẹ.”
A Gán Sọ Pọ́n Hosọ Ehelẹ
NUMIMỌ LẸ
“N’ko to Nukundo Oylọ Alọkan Ji Tọn Mìtọn”
Naegbọn asu po asi de sin homẹ do hùn dọ yé wleawuna adọgbigbo lọ nado tindo mahẹ to kunnudide gbọn alokan ji mẹ?
KANBIỌ HE MẸSUSU NỌ KANSE LẸ
Tito Biblu Pinplọn Tọn Tẹwẹ Kunnudetọ Jehovah Tọn lẹ Do?
Vọnu wẹ tito Biblu pinplọn tọn Kunnudetọ Jehovah tọn lẹ tọn, podọ a gán zan lẹdogbedevomẹ Biblu tọn depope. Voawu nado ylọ whẹndo towe blebu po họntọn towe depope po wá nupinplọn lọ tẹnmẹ.
YỌ́N MÍ DOGỌ
Naegbọn Mí Dona Plọn Biblu?—Adà Gigọ́
Biblu to alọgọna gbẹtọ livi susu lẹdo aihọn pé nado mọ gblọndo na kanbiọ tangan gbẹ̀mẹ tọn lẹ. Be hiẹ lọsu jlo na tin to yé mẹ ya?
NUMIMỌ LẸ
Plọnmẹ Biblu Dopo Lẹzun Susu
To Guatémala, Kunnudetọ Jehovah tọn lẹ dovivẹnu nado yì jẹ mẹsusu he nọ do Kekchi-gbè lẹ dè po nugbo Biblu tọn po.