Marta, yèdọ dopo to Kunnudetọ Jehovah tọn lẹ mẹ to Guatémala, to Kekchi-gbè plọn nado má owẹ̀n Biblu tọn hẹ mẹhe nọ do ogbè lọ lẹ. To gbèdopo, e mọ dawe de to tintọ́n sọn dotowhé de. Po awusọhia dawe lọ tọn po, Marta mọdọ gbétatò Kekchi-gbè tọn de he to lẹdo osó tọn fie Kunnudetọ Jehovah tọn lẹ nọ dọyẹwheho te vlavo de mẹ wẹ e na ko wá sọn. E dọnsẹpọ dawe lọ bo dọhona ẹn to Kekchi-gbè pẹẹde he e sè mẹ.

 Marta ze plọnmẹ Biblu de donukọnna dawe lọ. Po homẹhunhun po wẹ e kẹalọyi nuzedonukọnnamẹ lọ, amọ́ e dọna ẹn dọ emi ma do akuẹ nado sú i. Marta basi zẹẹmẹ na ẹn dọ vọnu wẹ Kunnudetọ Jehovah tọn lẹ nọ plọn Biblu hẹ mẹlẹ. E sọ dọna dawe lọ dọ e gán plọnnu gbọn alokan ji podọ whẹndo etọn blebu sọgan gọna ẹn to oplọn lọ whenu. Dawe lọ kẹalọyi nupinplọn. Na dawe lọ nọ hia bosọ nọ do Espagne-gbè wutu, Marta ze vọkan Owe Wiwe lẹ—Lẹdogbedevomẹ Aihọn Yọyọ Tọn Espagne-gbè tọn dopo na ẹn. E sọ ze owe nupinplọn tọn dopo na ẹn to Kekchi-gbè mẹ, enẹ wẹ owe lọ, Etẹwẹ Biblu Plọn Mí Taun? To osẹ he bọdego mẹ, Marta bẹ Biblu pinplọn jẹeji hẹ dawe lọ, asi ẹ po ovi yetọn awe lẹ po gbọn alokan ji. Yé nọ plọnnu whla awe to osẹ dopo mẹ. Marta dọ dọ, “Na Kekchi-gbè baṣa-baṣa wẹ n’sè wutu, mí nọ plọnnu to Espagne-gbè mẹ bọ dawe lọ nọ bayi gbesetọ na asi ẹ. Ovi lẹ uwọ sè Espagne-gbè.”

 Sinsẹ̀ngán de wẹ dawe ehe yin to ṣọṣi etọn mẹ. E jẹ nue plọn e te sọn Biblu pinplọn etọn mẹ lẹ plọn hẹ agunvi etọn lẹ ji. Agunvi lọ lẹ yiwanna nue plọn yé e te lẹ bo kanse e fie e plọn nuplọnmẹ yọyọ enẹlẹ te. Whenue e dọ na yé dogbọn Biblu pinplọn etọn dali, yé jẹ awukọndopọ hẹ ẹ to oplọn lọ tẹnmẹ debọdo-dego ji. Ojlẹ vude godo, omẹ 15 nkọ nọ pli na oplọn lọ to osẹ dopo mẹ nado plọnnu hẹ Marta gbọn alokan ji. To nukọn mẹ, yé ze miklo de do apá na alokan lọ na mẹlẹpo nido sọgan sèhó lọ ganji.

 Whenue Marta dọna mẹho agun tọn etọn lẹ gando plọnmẹ Biblu ehe go, dopo to yé mẹ dla gbétatò he mẹ nuplọntọ lọ lẹ nọ nọ̀ pọ́n. Mẹho lọ basi oylọna yé nado wá sè hodidọ na mẹlẹpo de he nugopọntọ lẹdo tọn a na na to gbétatò he yé na do mọto na gànhiho dopo bọ to enẹgodo yé na zọ̀n afọ na gànhiho awe nado jẹ filọ mẹ. Nuplọntọ lọ lẹ yigbe dọ emi na wá, podọ omẹ 17 to yé mẹ wẹ wá opli lọ tẹnmẹ.

 To osẹ delẹ godo, nugopọntọ lẹdo tọn lọ po Kunnudetọ devo lẹ po yí azán ẹnẹ zan hẹ nuplọntọ lọ lẹ. To afọnnu lẹ, yé nọ pọ́n video sinai do Biblu ji he to Kekchi-gbè mẹ lẹ to jw.org ji, podọ yé nọ plọn alọnuwe lọ Mẹnu lẹ Wẹ to Ojlo Jehovah Tọn Wà to Egbehe? To whèmẹ lẹ, yé nọ pọ́n adà delẹ to Televiziọn JW ji. Nugopọntọ lẹdo tọn lọ sọ basi tito bọ nuplọntọ dopodopo tindo mẹplọntọ etọn titi.

 To azán ẹnẹ lọ lẹ gblamẹ, Kunnudetọ lọ lẹ sọ dọyẹwheho to gbétatò Kekchi-gbè tọn devo he to yakẹ lẹ mẹ bosọ bayi oylọna mẹlẹ wá opli vonọtaun de. To opli lọ whenu, mẹmẹsunnu lẹ biọ to omẹ 47 he wá lẹ si nado kẹalọyi plọnmẹ Biblu mẹdetiti tọn. Whẹndo 11 wẹ kẹalọyi nupinplọn.

 To osun vude godo, mẹho lẹ bayi tito nado nọ bayi opli lẹ to sẹfifo lẹpo to gbétatò tintan lọ mẹ. Omẹ 40 nkọ wẹ nọ wá opli lẹ to gbesisọ mẹ todin. Podọ whenue mẹmẹsunnu lẹ bayi hùnwhẹ Oflin okú Jesu tọn to finẹ, homẹ yetọn hùn nado mọ omẹ 91 he wá nuwiwa lọ tẹnmẹ lẹ.

 Marta flin lehe numimọ lọ bẹjẹeji bosọ tindo kọdetọn dagbe do bo dọmọ: “N’dopẹna Jehovah. To whedelẹnu, n’nọ mọdọ n’ma gán wà susu. Amọ́, azọ́nwanu lẹ wẹ mí yin to alọ Jiwheyẹwhe tọn mẹ. E yọ́n nue to ahun mẹhe to gbétatò enẹlẹ mẹ tọn, podọ e dọ́n yé wá omẹ etọn lẹ dè. Jehovah yiwanna yé.”