“Todin, sọgbe hẹ huhlọn etọn he to nuyiwa to mí mẹ, na mẹlọ he sọgan wà susu tlala hú nuhe mí biọ kavi lẹn lẹpo, ewọ wẹ gigo ni tin na.”—Efesunu lẹ 3:20, 21, Lẹdogbedevomẹ Aihọn Yọyọ Tọn.

 “Be na ewọ he sọgan basi susu hú ehe mí to bibiọ lẹpo, kavi hú ehe mí to linlẹn, kẹdẹdi huhlọn he to azọ́nwa to míwlẹ mẹ, ewọ wẹ gigo tin hlan.”—Efesunu lẹ 3:20, 21, Biblu Wiwe lọ—Gun Alada.

 To wefọ ehe mẹ, apọsteli Paulu kudeji dọ Jiwheyẹwhe penugo nado na gblọndo odẹ̀ lẹ tọn, podọ nado hẹn nukundido mẹhe nọ basi sinsẹ̀n hlan Ẹn lẹ tọn di to aliho he yé ma lẹndọ e gán yọnbasi paali te de mẹ. Gblọndo etọn lẹ tlẹ gán zẹ̀ nukundido kavi todido yetọn lẹpo go.

 “Todin, sọgbe hẹ huhlọn etọn he to nuyiwa to mí mẹ, na mẹlọ he sọgan.” Wefọ 21​tọ dohia dọ Jehovah Jiwheyẹwhe a wẹ “mẹlọ” nọtena. To finẹ, Paulu wlan dọmọ: “Ewọ wẹ gigo ni tin na gbọn agun lọ gblamẹ podọ gbọn Klisti Jesu gblamẹ.” (Johanu 20:31) Humọ, Jiwheyẹwhe gán na mí huhlọn kavi hẹn mí lodo, na mí nido penugo bo wà ojlo etọn.—Filipinu lẹ 4:13.

 To wefọ 20​tọ mẹ, apọsteli Paulu zinnudo onú titengbe de ji gando nugopipe Jehovah tọn nado gọalọna mẹhe nọ sẹ̀n Ẹn lẹ go. Owe alọdlẹndonu tọn de dọ gando hodidọ he yin lilẹdo “mẹlọ he sọgan” go, dọmọ: “Nugopipe he yin nùdego tofi gbọnvona nugopipe he mẹde tindo to paa mẹ, bo ma zẹẹmẹdo dọ e yọnbasi nado wà nude amọ́ dọ huhlọn lọ tin nado wà ẹ.” To vogbingbọn mẹ na gbẹtọvi ahundoponọ de, Jehovah nọ to gbesisọ mẹ bo nọ penugo to whelẹponu nado wà nudepope he e biọ nado penukundo mẹhe nọ sẹ̀n ẹn lẹ go bosọ na gblọndo odẹ̀ yetọn lẹ tọn. Ewọ kẹdẹ wẹ tindo huhlọn madodogbó po aṣẹpipa daho po.—Isaia 40:26.

 “[Jiwheyẹwhe] sọgan . . . wà susu tlala hú nuhe mí biọ kavi lẹn lẹpo.” Jehovah gán wà nususu hugan nado wleawu onú susugege kavi etlẹ yin “susu tlala” tọn na mẹhe nọ sẹ̀n ẹn lẹ. E gán gọalọna yé to aliho he gbloada mẹ zẹ̀ nuhe yé nọ pọnhlan taidi nususu tlala kavi alọtútlú go.

 Hodidọ lọ “hú nuhe mí biọ kavi lẹn lẹpo” sọ plọn mí nudevo de gando wefọ ehe go. To whenue apọsteli lọ dọ dọ “hú nuhe mí biọ kavi lẹn lẹpo,” e jlo dọ Klistiani lẹpo ni mọnukunnujẹemẹ dọ Jiwheyẹwhe gán gọalọna yé to aliho he zẹ̀ nukundido yetọn lẹpo go mẹ. To Mawuhowema Fọngbe tọn mẹ, adà wefọ 20​tọ lọ tọn yin lilẹ́ dole: “Jiwheyẹwhe dohuhlọn, bo hẹn, e na wà na mí hú nuhe mí biọ ẹ lọ, kavi nuhe lẹn mí tlẹ te lọ.” To whedelẹnu, Klistiani lẹ gán nọ lẹndọ nuhahun emitọn lẹ klohugan kavi gẹdẹ gbau nado didẹ. Vlavo yé ma tlẹ nọ yọ́n nuhe ji yé na hodẹ̀ do. Amọ́, ninọmẹ de ma tin bo dózin do Jehovah podọ nugopipe etọn nado gọalọ madodogbó. To ojlẹ sisọ mẹ, ewọ gán didẹ nuhahun depope—bo tlẹ gán wàmọ to aliho he yé ma kudlọ etọn paali kavi lẹndọ e yọnbasi de mẹ. (Jobu 42:2; Jelemia 32:17) Amọ́ todin whẹ́, e nọ na yé huhlọn nado doakọnna, etlẹ yin po ayajẹ po!—Jakọbu 1:2, 3.

 Apọsteli Paulu wẹ kàn owe Efesunu lẹ tọn taidi wekanhlanmẹ de hlan Klistiani he nọ nọ̀ tòdaho Efesu tọn mẹ lẹ to Asia Pẹvi, ehe yin apadewhe Turquie egbezangbe tọn. To wekanhlanmẹ lọ mẹ, linlẹn he Paulu kàn dai lẹ taidi odẹ̀ de he e to hihò do ota yetọn mẹ. (Efesunu lẹ 3:14-21) E hodẹ̀ dọ Klistiani lọ lẹ—podọ to linlẹn he gbloada de mẹ, Klistiani lẹpo—ni wleawuna owanyi Klisti tọn nkọ gbọn vivẹnudido nado nọ do owanyi enẹ hia to linlẹn po nuyiwa yetọn lẹ po mẹ dali. Nado dotana odẹ̀ etọn, Paulu pà Jiwheyẹwhe bo yí hogbe he to Efesunu lẹ 3:20, 21 mẹ lẹ zan.

 Pọ́n video kleun ehe nado mọ nue to owe Efesunu lẹ tọn mẹ delẹ.