Biblu dọ dọ, “Jehovah ma na tẹ̀ nudagbe depope mẹhe to zọnlinzin to tenọgli mẹ lẹ.” (Salmu lẹ 84:11) Etẹwẹ ‘zọnlinzinzin to tenọgli mẹ’ zẹẹmẹdo? E zẹẹmẹdo dọ a ni nọ yinuwa sọgbe hẹ opà he a do na Jehovah to whenue a klan dewe do wiwe na ẹn. (Yẹwhehodọtọ 5:4, 5) Nawẹ a gán zinzọnlin to tenọgli mẹ to baptẹm towe godo gbọn?

To hosọ ehe mẹ

•  Nọ doakọnna nuhahun lẹ

•  Nọ nọavùnte sọta whlepọn lẹ

•  Nọ yidogọna zohunhun towe

 Pọ́n wefọ tangan ehe: “Mí dona gbọn nukunbibia susu mẹ biọ Ahọluduta Jiwheyẹwhe tọn mẹ.”—Owalọ lẹ 14:22.

 Nuhe e zẹẹmẹdo: Nado dọ hójọhó, Klistiani lẹpo wẹ na pehẹ nuhahun to gbẹ̀mẹ. Delẹ to nuhahun he a na pehẹ lẹ mẹ gán yin mẹṣanko kavi nukundiọsọmẹ, na a yin Klistiani wutu. Devo lẹ wẹ azọ̀n kavi nuhahun akuẹ tọn, ehe gbẹtọvi lẹpo wẹ nọ jiya etọn.

 Nuhe a gán donukun: To whedelẹnu, ninọmẹ towe gán diọ do lehe a ma jlo do. Biblu dohia dọ nuylankan gán jọ do mẹdepope go—vlavo mẹlọ yin Klistiani kavi e ma yin Klistiani.—Yẹwhehodọtọ 9:11.

 Nuhe a gán wà: Din he a yọnẹn dọ emi na pehẹ nuhahun lẹ, a gán wleawu nado duto yé ji. Nọ mọ nuhahun lẹ taidi dotẹnmẹ de nado hẹn yise towe lodo bo ganjẹ Jehovah go dogọ. (Jakọbu 1:2, 3) Dile ojlẹ to yìyì, hiẹ lọsu na penugo bo dọ nue apọsteli Paulu dọ nkọ: “To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.”—Filipinu lẹ 4:13.

 Ayinamẹ: Plọnnu gando Josẹfu go. A gán hianu gando gbẹzan etọn go to Jenẹsisi weta 37 po 39 jẹ 41 po mẹ. Lẹnnupọndo kanbiọ ehelẹ ji: Nuhahun madonukun tẹlẹ wẹ fọ́n, podọ nawẹ e duto yé ji gbọn? Nawẹ Jehovah gọalọna Josẹfu gbọn?

 Be a do hudo alọgọ tọn dogọ wẹ ya?

•   Hia:

   “Nawẹ N’Sọgan Doakọnnanu Gbọn to Whenue Adán Sinsinyẹn de Gbò Mi?”

   “Suis-je quelqu’un de « résilient » ?”

   “Comment faire face aux changements”

•   Mọ owe ehe yí:

   “Un de mes parents est malade”

 Pọ́n wefọ tangan ehe: “Mẹdopodopo nọ yin whiwhlepọn dile e yin dindọn yì bo yin omọ̀ do na gbọn ojlo edetiti tọn dali.”—Jakọbu 1:14.

 Nuhe e zẹẹmẹdo: To whedelẹnu, ojlo mítọn lẹ gán ze mí do whlepọn mẹ, bọ eyin mí ma gbẹ́ yé dai, yé gán sisẹ́ mí nado wà nuylankan.

 Nuhe a gán donukun: To baptẹm godo, a na gbẹ́ pehẹ “ojlo agbasalan tọn lẹ.” (2 Pita 2:18) A tlẹ gán yin whiwhlepọn nado tindo zanhẹmẹ jẹnukọnna alọwle.

 Nuhe a gán wà: Wleawudai bẹsọn din, yèdọ whẹpo a nido wá yin whiwhlepọn, na ojlo towe lẹ nikaa sisẹ́ we nado bayi nudide ylankan lẹ. Flindọ Jesu dọ dọ: “Mẹdepope ma sọgan yin afanumẹ na ogán awe.” (Matiu 6:24) Hiẹ lọsu wẹ na de mẹhe na yin ogán towe. E na yọ́n dọ a ni de Jehovah. Mahopọnna lehe ojlo ylankan de gán sinyẹn sọ, a gán gbẹ́ de ma nado yinuwa sọgbe hẹ ẹ.—Galatianu lẹ 5:16.

 Ayinamẹ: Tẹnpọn nado yọ́n nue ji a gán dù te po dehe ji a ma gán dù te po lẹ. Nọ de họntọn he na zọ́n bọ a na do jijọ dagbe towe lẹ hia. Nọ dapana mẹdepope, nọtẹn kavi ninọmẹ he na hẹn ẹn vẹawuna we nado wà nuhe sọgbe lẹ.—Salmu lẹ 26:4, 5.

 Be a do hudo alọgọ tọn dogọ wẹ ya?

•   Hia:

   “Nawẹ N’Gán Duto Whlepọn Ji Gbọn?”

   “Etẹ N’Gán Wà Ma Nado Nọ Lẹnnupọndo Zanhẹmẹ Ji?”

   “Nawẹ N’Sọgan Duto Kọgbidinamẹ Hagbẹ Tọn Ji Gbọn?”

   “Be A to Linlẹn Jehovah Tọn lẹ Hẹn Zun Towe Titi Ya?”

 Pọ́n wefọ tangan ehe: ‘Tindo vivẹnudido dopolọ kakajẹ opodo, ma nado lẹzun adidọnọ.’—Heblu lẹ 6:11, 12.

 Nuhe e zẹẹmẹdo: Mẹhe ma nọ ze ayiha do azọ́n etọn ji gán jẹ adidọ wà ji po awubibọ po bo na wá lẹzun adidọnọ.

 Nuhe a gán donukun: E yọnbasi dọ homẹ towe hùn bọ a sọ tindo zohunhun taun to baptẹm towe godo. Owanyi towe na Jehovah sọ sinyẹn taun. Amọ́, to ojlẹ de godo, e gán vẹawuna we nado zindonukọn bo to tonusena Jehovah to nulẹpo mẹ, podọ enẹ gán hẹn we gbọjọ bo tlẹ dekanpona zohunhun towe.—Galatianu lẹ 5:7.

 Nuhe a gán wà: Zindonukọn nado to nudagbe lẹ wà, eyin e ma tlẹ nọ jlo we nado wàmọ. (1 Kọlintinu lẹ 9:27) Nọ tẹnpọn nado yọ́n Otọ́ olọn mẹ tọn towe dogọ bosọ nọ dọhona ẹn whẹwhẹ to odẹ̀ mẹ. Gbọnmọ dali, a na to dindọnsẹpọ ẹ dogọ. Podọ, sọ jihọntọn pẹkipẹki hẹ mẹhe yiwanna nado nọ sẹ̀n Jehovah lẹ.

 Ayinamẹ: Flindọ Jehovah yiwanna we taun bo wleawufo nado gọalọna we. Ma lẹndọ eyin zohunhun towe depò na ojlẹ de, e na gblehomẹ do gowe blo. Biblu dọ dọ: “Ewọ nọ na huhlọn mẹhe nuṣikọna bo nọ na nugopipe mẹhe ma tindo huhlọn lẹ.” (Isaia 40:29) To nukọn mẹ, e na dona vivẹnudido towe bo na we huhlọn nado gọ̀ zohunhun towe mọ.

 Be a do hudo alọgọ tọn dogọ wẹ ya?

•   Hia:

   “Jọja lẹ Emi—Mì Zindonukọn Nado ‘to Azọ́nwa Na Whlẹngán Mìtọn Titi’”

   “Comment trouver du plaisir à adorer Dieu ?”

•   Pọ́n video lọ:

   Nuhe Ogbẹ́ Towe lẹ Nọ Dọ—Gbẹzan He Yọ́n Hugan Lọ

 Nuagokun lọ die: Eyin a hẹn tenọgli towe go, a na hẹn homẹhun Jehovah! (Howhinwhẹn lẹ 27:11) Homẹ etọn na hùn dọ a de nado nọ adà etọn mẹ, podọ e na na we nue sin hudo a do nado nọavùnte sọta mẹgbeyinyan Satani tọn lẹ.