Paali. Biblu dọ hezeheze dọ Jiwheyẹwhe wẹ dá gbẹtọvi lẹ, gọna kanlin po atin “wunmẹ” he to gbẹ̀mẹ lẹpo po. a (Jenẹsisi 1:12, 21, 25, 27; Osọhia 4:11) E dọ dọ gbẹtọvi he to gbẹ̀mẹ lẹpo wẹ yin kúnkan mẹjitọ mítọn tintan lẹ Adam po Evi po tọn. (Jenẹsisi 3:20; 4:1) Kandai he to Biblu mẹ ma nọgodona nuplọnmẹ lọ dọ Jiwheyẹwhe dá nutogbẹ̀ wunmẹ dopo de, ehe mẹ onú tẹnmẹ-tẹnmẹ devo he to gbẹ̀mẹ lẹpo wá jọ sọn na yede vudevude gba. Etomọṣo, na nugbo tọn, Biblu ma dọ nudepope he jẹagọdo zẹẹmẹ lẹnunnuyọnẹntọ lẹ tọn lọ, dọ nutogbẹ̀ wunmẹ dopolọ lẹ nọ wá gbọnvona yedelẹ to whedelẹnu.

•  Be Jiwheyẹwhe yí aliho he gblamẹ nulẹ nọ wá aimẹ na yede te zan wẹ ya?

•  Be Biblu nọgodona linlẹn lọ dọ nuhe tin lẹ lọsu wẹ wá aimẹ na yede poun ya?

•  Be nugopipe he atin po kanlin lẹ po tindo nado nọ diọada to ninọmẹ voovo mẹ dohia dọ yé nọ wá aimẹ na yede domọ poun wẹ ya?

 Mẹhe yise dọ Jiwheyẹwhe yí aliho de zan he gblamẹ nutogbẹ̀ lẹ lọsu nọ wá aimẹ na yede domọ poun te lẹ, nọ tindo linlẹn he voovo lẹ gando aliho he mẹ Ewọ hẹn nulẹ aimẹ te go. Sọgbe hẹ wezẹhomẹ lọ Encyclopædia Britannica, mẹdelẹ yise dọ “nugopipe he nutogbẹ̀ lẹ tindo to jọwamọ-liho nado nọ diọada to lẹdo voovo lẹ mẹ nado sọgan gbọṣi aimẹ, yin dopo to nuhe Jiwheyẹwhe nọ yizan nado deanana nuhe to gbẹ̀mẹ lẹ mẹ.”

 Nuyise lọ dọ Jiwheyẹwhe yí aliho de zan he gblamẹ nutogbẹ̀ lẹ lọsu nọ wá aimẹ na yede domọ poun te sọgan sọ bẹ linlẹn he bọdego ehelẹ hẹn:

•   Nutogbẹ̀ lẹpo jọ sọn tọgbo dopolọ he ko nọgbẹ̀ to owhe susu taun die lẹ dè.

•   Nutogbẹ̀ wunmẹ de sọgan vọ́ ede jọ bo lẹzun nutogbẹ̀ wunmẹ devo pete.

•   Yigodo yinukọn, Jiwheyẹwhe lọsu wẹ nọ deanana lehe nudida lẹ nọ jọ wá gbẹ̀mẹ na yede do.

 Eyin nugbo wẹ dọ Jiwheyẹwhe yí aliho de zan bọ nuhe tin lẹ nọ wá gbẹ̀mẹ na yede domọ poun, be nuhe Biblu dọ gando azọ́n nudida tọn go to owe Jenẹsisi tọn mẹ ma sọgbe mlẹnmlẹn niyẹn. Ṣigba, Jesu donù nuhe tin to kandai Jenẹsisi tọn mẹ go taidi whenuho nugbo de. (Jenẹsisi 1:26, 27; 2:18-24; Matiu 19:4-6) Biblu dọ dọ whẹpo Jesu do wá aigba ji, ewọ ko nọgbẹ̀ to olọn mẹ hẹ Jiwheyẹwhe, bosọ kọnawudopọ hẹ ẹ nado hẹn “nulẹpo” wá aimẹ. (Johanu 1:3) Enẹwutu, linlẹn lọ dọ Jiwheyẹwhe nọ yí aliho de zan he gblamẹ nutogbẹ̀ voovo he tin lẹ lọsu nọ wá aimẹ na yede te ma sọgbe hẹ nuplọnmẹ Biblu tọn lẹ.

 Biblu ma basi zẹẹmẹ obá he mẹ nutogbẹ̀ wunmẹ dopolọ lẹ sọgan gbọnvona yedelẹ jẹ tọn. Etomọṣo e ma jẹagọdo linlẹn lọ dọ vogbingbọn delẹ sọgan sọawuhia to kanlin po atin wunmẹwunmẹ he Jiwheyẹwhe dá lẹ po mẹ, eyin yé to okún gbà kavi to adàdiọ sọn ninọmẹ de mẹ jẹ devo mẹ. Dile etlẹ yindọ mẹdelẹ nọ pọ́n adàdidiọ enẹlẹ bo nọ mọdọ nutogbẹ̀ lọ lẹ lọsu wẹ to aimẹ wá na yede, e họnwun dọ yé ma yin nutogbẹ̀ yọyọ he ma ko tin pọ́n de.