Lala. Biblu dohia dọ Jiwheyẹwhe kẹdẹ wẹ mí dona nọ hodẹ̀ hlan, podọ to oyín Jesu tọn mẹ. Jesu dọna devi etọn lẹ dọmọ: “Le wẹ mì ni nọ hodẹ̀ do: Otọ́ mítọn he tin to olọn mẹ, hihiọ wẹ oyín towe.” (Matiu 6:9, Biblu Wiwe lọ—Gun Alada) E ma plọn devi etọn lẹ gbede nado nọ hodẹ̀ hlan mẹwiwe lẹ, angẹli lẹ kavi mẹdevo depope, adavo Jiwheyẹwhe kẹdẹ.

 Jesu sọ dọna hodotọ etọn lẹ dọ: “Yẹn wẹ aliho lọ, nugbo, po ogbẹ̀ po; mẹde ma sọgan wá Otọ́ dè, adavo gbọn yẹn dali.” (Johanu 14:6, Biblu Wiwe lọ—Gun Alada) Jesu kẹdẹ wẹ Jiwheyẹwhe na aṣẹ nado vẹvẹ do ota mítọn mẹ.—Heblu lẹ 7:25.

Be e ylan nado nọ hodẹ̀ hlan Jiwheyẹwhe bosọ nọ hodẹ̀ hlan mẹwiwe lẹ wẹ ya?

 Jiwheyẹwhe dọ to apadewhe gbedide ao lẹ tọn mẹ dọ: “Yẹn OKLUNỌ Jiwheyẹwhe towe Jiwheyẹwhe awuwhàntọ de wẹ.” (Eksọdusi 20:5, Biblu Wiwe lọ—Gun Alada) Aliho tẹ mẹ wẹ Jiwheyẹwhe yin “awuwhàntọ” te? To Owe-Wiwe lẹ—Lẹdogbedevomẹ Aihọn Yọyọ Tọn mẹ wefọ ehe yin lilẹdo, “nọ biọ mẹdezejo mlẹnmlẹn.” Jiwheyẹwhe biọ dọ nuyiwa mẹdezejo tọn kavi sinsẹ̀n-bibasi tọn lẹ—kakajẹ dẹ̀hiho ji—ni nọ yin hlan ewọ kẹdẹ.—Isaia 48:11.

 Mí nọ hẹn homẹgble Jiwheyẹwhe eyin mí hodẹ̀ hlan mẹdevo de, yèdọ etlẹ yin hlan mẹwiwe lẹ kavi hlan angẹli wiwe lẹ. To whenue apọsteli Johanu tẹnpọn nado sẹ̀n angẹli de, angẹli lọ gbẹnuna ẹn bo dọmọ: “A wàmọ blo! Afanumẹ de poun wẹ yẹn kẹdẹdi hiẹ po mẹmẹsunnu towe lẹ po he tindo azọ́n kunnudide gando Jesu go tọn. Sẹ̀n Jiwheyẹwhe!”—Osọhia 19:10, Owe-Wiwe lẹ—Lẹdogbedevomẹ Aihọn Yọyọ Tọn.