To whenue apọsteli Johanu to kandai basi gando nujijọ he wá aimẹ to gbẹzan Jesu tọn mẹ lẹ go, e wlan dọmọ: “Mẹhe mọ nujijọ lọ ko dekunnu, nugbo sọ wẹ kunnudide etọn, ewọ sọ yọnẹn dọ nugbo wẹ nuhe e dọ lẹ, na mìlọsu nido sọgan yise.”​—Johanu 19:35.

 Dopo to whẹwhinwhẹ́n he wutu e sọgbe nado dejido kandai Wẹndagbe tọn he Matiu, Malku, Luku po Johanu po wlan lẹ go mẹ wẹ yindọ kandai lọ lẹ yin bibasi to whenue susu mẹhe yinukundomọ nujijọ he yin nùdego lọ lẹ tọn gbẹ́ pò togbẹ̀. Sọgbe hẹ asisa nudọnamẹ tọn delẹ, Wẹndagbe Matiu tọn yin kinkan to owhe ṣinatọ̀n poun to okú Klisti tọn godo, enẹ wẹ to nudi owhe 41 W.M. Dile etlẹ yindọ weyọnẹntọ susu lẹndọ owhe enẹ godo wẹ e yin kinkan, yemẹpo wẹ kọngbedopọ dọ owe he tin to Owe-wiwe Glẹki tọn mẹ lẹ yin kinkan to owhe kanweko tintan W.M.

 Mẹhe mọ Jesu to whenue e togbẹ̀ to aigba ji, yinukundomọ okú etọn bosọ mọ fọnsọnku etọn lẹ sọgan dọ eyin kandai owe Wẹndagbe tọn lẹ tọn yin nugbo kavi lala. Yé sọgan sọ de nuhe ma sọgbe delẹ gbà po awubibọ po. Weyọnẹntọ Biblu tọn de F. F. Bruce dọ dọ: “Dopo to onú titengbe yẹwhehodidọ apọsteli dowhenu tọn lẹ tọn lẹ mẹ wẹ jidide he yé tindo nado ganjẹ nuhe hosetọ lẹ yọnẹn go; yé ma nọ dọ poun dọ, ‘Mí yin kunnudetọ onú ehelẹ tọn’ gba, ṣigba yé sọ nọ dọ dọ, ‘Kẹdẹdile mìlọsu yọnẹn do’ (Owalọ lẹ 2:22).”