Jeova n kaani ku diegu yaa yogunu, O puogi bi bidanba n wubi bi bila. (Kolosi Yaaba 3:20) A yaa pia a bila, ŋan yaa bani ke fini n yeni bi wubima, fini n baa todi ba ban bua Jeova ki go tua saala bila. (Timote Tilieli 1:5; 3:15) A biga yaa tie bonpuoga bi bonjaga, li ŋani ŋan bandi yaala n ye o pali nni. Li pia ti ñoadi ŋan tua opo bontogidikaaŋanli. Fini aba pali yaa gbie leni Jeova buama, li baa tua faala ŋan bangi a biga Jeova maama.—Pisomi 40:9.

BIIBILI N YEDI YAALA: “Nilo kuli n cengi tontoni ki da maadi tonma.” (Jaki 1:19) Yi yaa pia a bila, yin bua yaala tie, laa faali bipo, bi yaa bua ki maadi leni yi. Li ŋani ban bandi ke lan tie yaa yogunu kuli, yi baa cengi ba bi yaa bua ki togidi yi yaala n ye bi pala nni. Mi yanduanma yaa ye yinba leni yi bila siiga, li baa tua faala bipo, baa maadi leni yi. (Jaki 3:18) Bi yaa nua ŋan, nani yaa nilo n bia bi yua n ki pia sugili, bi kan togidi a, yaala n ye bi pala nni. Yin je li juunli leni yi bila, yogunu kuli yin waani ba ke yi bua ba.—Matie 3:17; Korenti Yaaba Tikpiali 8:1.

ŊAN BAA FIDI KI TIENI YAALA:

• Yi bila yaa ti bua ki maadi leni yi, yin moandi ki cengi ba.

• Yogunu kuli, yin li yaa maandi ki maadi leni yi bila, lan da tua bi paka yogunu bebe ka.

BIIBILI N YEDI YAALA: “O nilo pali nni yantiana tie nani yaa ñima n ñua yeni. O yanfuodaano n bani ki gedi ki ban luuni ma.” (Mi Kpanjama 20:5) O yogutianma, yin da cengi yi bila maama bebe kaa, yin moandi ki bandi yaala n ye bi pala nni. Bi nipanba yen baa fidi ki duoni mi maama, bi ki ñani bi ñoabu nni yaala ke baa bi bua ki yedi. “Yua n guani i buali ki daa cengi, doagidi o yanpiima.” (Mi Kpanjama 18:13) Lanwani yin da fiindi yi pala tontonma leni ba.— Mi Kpanjama 19:11.

ŊAN BAA FIDI KI TIENI YAALA:

• Yi bila n togidi yi yaala kuli, ba mani li yukubili ki cengi ba, yin da fiindi yi pala ba.

• Tiadi mani ki le, yi bimi nni, yin den pia yaa yantiana leni yaala n den pia yipo ti ñoadi.

BIIBILI N YEDI YAALA: “N bijua cengi a baa tundi, ki da yie a naa n bangi a yaala mo.” (Mi Kpanjama 1:8) Jeova bua bibaa leni binaa n taani ki wubi bi bila. Yinba n baa waani ba, ban baa tuo yi maanma ki go fangi yi maanma. (Efesi Yaaba 6:1-3) Yi bila bani yi “yaa taa yenma yi yantiana nni.” (Korenti Yaaba Tikpiali 1:10) Baa yi yaa koani leni yaba, moandi mani yi bila n da bandi ba. Yeni li kaa paa bipo, baa fangi yi.

ŊAN BAA FIDI KI TIENI YAALA:

• Yin taani boe ki bandi yin baa tundi yi bila maanma.

• Yi yaa dagidi leni yaba yin baa wubi yi bila maanma po, yin kali boe ki bandi yaala n cedi ke yi yantiana ki tata ba.

BIIBILI N YEDI YAALA: “Bangi ki bonwaaga wan baa tagini yaa sanu.” (Mi Kpanjama 22:6) Yin yaa bani ke yi bila wubima kan baa mayuli yaalayaala. Li tie tiladi, yin bandi bi wubima n baa ŋoadi yaa fuuli, leni yin baa tundi ba maanma. (Pisomi 127:4; Mi Kpanjama 29:17) Ki tundi ki biga ki bua yedi ki niini o ba. Li ŋani yin waani o sanbili kuli ŋoadima n bua ki yedi yaala. (Mi Kpanjama 28:7) Li go bua ki yedi, yin todi ban pugini bi buama Jeova maama po, ban bandi yaa ñoamabona n ye li niinni. (Pisomi 1:2) Laa banma baa todi ba, ban gagidi yaala n ŋani leni yaala n bia.—Hebilunba 5:14.

ŊAN BAA FIDI KI TIENI YAALA:

• Moandi mani yi bila n bandi ke Jeova tie nilo moamoani, ke bi baa fidi ki yaa dugi opo.

• Todi yi bila n bandi yaala n bia, nani yaa tuonyuodi n ye internet nni. Waani ba, ban baa tieni maanma ki guudi bi yuli leni yaa niba n dua leni a bila leni u palu.