Ti madi puuni li pamanli, ama li go baa fidi ki cuani a paka li ñiigili nni. Yi yaa tie bidanba ke li daa waagi, yi laadi yi biga kubima n taandi yi lenli leni yi paalu maanma. Yii go gua ŋanma, li bonli yaali n lebidi boncianla baa fidi ki cuani a paka yi siiga. Yin bua ki ŋanbi ki kubi yi biga leni yi ñiigili yeni, li tie tiladi yinba bonbilie kuli n lebidi bontianla yi yema nni. Lanwani, Biibili tundi baa fidi ki todi yi lede?

BIIBILI N YEDI YAALA: “Mi buama pia li juunli ki go ŋanbidi.”

“Maa lingi yaala n ŋani mi yuli po bebe, maa fiindi mi pali, maa kpaagi yaala n bia.” (Korenti Yaaba Tikpiali 13:4,5) A yaa tie pomadipaano, ŋan kubi a biga maanma yeni cie bonli kuli. A calo baa fidi ki yaa tama ke a sundi opo. Lanwani ŋan tiadi ke a calo moko bua ŋaa faami opo. A yaa dini li juunli ki go baa li ŋanbili, a calo baa bandi ke a bua o kaanu ki go bua o todima, yi biga kubima po.

“Yinba bi puodanba . . . yuakuli n yaa ye leni o pua leni mi yanfuoma, ki yaa faami ke bi puoba tadi ki cie bi jaba.” (Pieli Tikpiali 3:7) Yin yaa bani ke pomado kuli li kubi o biga ki cie bonli kuli. Yi biga kubima yaa cua ki pugini a pua n den cili ki tuuni yaa tuonli yeni, li baa fidi ki tua opo coagili leni mutuoli. O baa fidi ki yaa fiindi o pali leni a. Lanwani yin baa mi dingima kelima “yua yaa pali n ki be tonma cie o jakoandimoano.” (Mi Kpanjama 16:32) Yi yaa baa mi yanfuoma, yi baa bandi yin baa todi yi puoba maanma — Mi Kpanjama 14:29.

ŊAN BAA FIDI KI TIENI YAALA:

• A yaa tie bibaa: ŋan todi a pua yogunu kuli baa ku ñiagu yaa bii. Ŋan wadi tuontiama, ki baa li lenli a pua leni a biga po.

• A yaa tie binaa: A calo yaa bua ki todi a ŋan kubi yi biga, ŋan tuo o todima. Baa wan tiendi maanma yaa dagidi apo, ŋan da ŋmiidi o ba. Leni mi dingima, ŋan li waani o wan baa tieni maanma.

BIIBILI N YEDI YAALA: “Ban tua gbananyendi.” (Mi Cilima 2:24) Baa a yaa ba ki biga, ŋan tiadi ke fini leni a calo, bi fini leni a pua baa tie “gbananyendi.” Lanwani, moandi mani yin paani maanma kuli, ki pugini yi ñiigili gbamanu.

Bi puoba, yi ciaba n todi yi yeni, yin tuondi ba, ki go waani ba, ke yi pala mani leni ba, kelima li “baa paagidi o gbanu.” (Mi Kpanjama12:18) Bi podanba, yin togidi yi puoba yin bua ba maanma, ki go waani ba ban pia yi po yaa mayuli. Yin pagi ba leni ban kubi yi diegu maanma yeni.—Mi Kpanjama 31:10,28.

“Oba kuli n da lingi o yuceli ŋamu, ama wan yaa lingi yaala n tie o lieba moko yaa ŋamu.”(Korenti Yaaba Tikpiali 10:24) Yogunu kuli, yin yaa tiendi yaali n ŋani yi calo, bi yi pua po. Yin baa li lenli ki kali boe leni yaba, ki pagi yi yaba, ki go cengi yi yaba. Ja leni o pua yaa baa kua leni yaba, yuakuli n tia o lielo po, wan da lingi o yuli ŋamu bebe ka. Biibili yedi: “Yin da yie mani yiyaba po, kali yikuli yaa juogi ki tuo ki bili u yogunu.” (Korenti Yaaba Tikpiali 7:3-5)Yin kali ki maadi li maama leni li papienli. Yi yaa dini li juunli, ki go pia mi ninñingbadima, li baa pugini yi ñiigili gbamanu.

ŊAN BAA FIDI KI TIENI YAALA:

• O yogunu kuli, yin lingi li lenli ki kali ki boe leni yaba.

• A baa fidi ki diani o mi mabima, bi ki paa o bu paabu. A yaa tiendi yeni a wangi a lielo kaa bua o.

BIIBILI N YEDI YAALA: “Hali a biwaama nni a bani i Diani. I baa fidi ki pa ŋa mi yanfuoma, yaama n baa ciani a mi tindima nni.”(Timote Tilieli 3:15) Yin kali ki boe ki bandi yin baa bangi yi biga maanma. Ki biga yaa ye o naa tugi nni, o pia u fidu ki baa bangi bonli boncianla. O baa fidi ki gagidi ki bandi yua kuli nialu, ki bandi yi pali yaa mani, bi li yaa mani. Yi baa fidi ki yaa cogi a tila a biga po, baa o yaa baa tie biwaaga. Baa o yaa gba yin cogi yaala fuuli, li baa todi o waa faadi u cogu o yaa ti yabidi.

Yin da tama ke yi biga n tie biwaaga yeni, yi yaa maadi Jeova maama, waa gba ba. Yin yugidi yi nialu ki jaani Jeova leni o, wan cengi. (Mi Tiadima 11:19) Yin jeli leni o yaa yogunu, yin maadi o Jeova n tagi yaala maama. (Pisomi 78:3,4) O yaa ti yabidi, o baa bani yi buama Jeova po n de maanma, lan todi o moko n bua O.

ŊAN BAA FIDI KI TIENI YAALA:

• Yin jaani Jeova ki mia O yaa yanfuoma n baa todi yi, yi biga kubima nni.

• Yi yaa bua yi biga n kubi li bonli o yantiala nni, yin yaa togidi la yogunu kuli. Li baa todi o wan jaligi ki bandi li bonli boncianla.