nirgaman 33:1-23
33 yahova ne moosa se yah bhi kaha, “tu un logon ko lekar yahaan se aage badh, jinhein tu misra se nikaal laaya hai. tum sab us desh ke liye ravana ho jaao jiske baare mein mainne abraham, ishaak aur yakub se shapath khaakaar kaha tha, ‘main yah desh tumhare vansh ko doonga.’+
2 main tumhare aage-aage ek swargdoot bhejoonga+ aur main kanaaniyon, emoriyon, hittiyon, parijjiyon, hivviyon aur yaboosiyon ko khaded doonga.+
3 tum us desh ko jaao jahaan doodh aur shehad ki dhaarayen behti hain.+ magar main tumhare beech rehkar tumhare saath nahin chaloonga, kyonki tum bade dheeth kism ke log ho.+ kahin aisa na ho ki main raaste mein tumhein mita doon.”+
4 jab logon ne parmeshvar ke ye kade shabd sune, to woh bahot dukhi huye aur shok manane lage. unmein se kisi ne bhi apne zevar nahin pehne.
5 yahova ne moosa se kaha, “israeliyon se kehna, ‘tum bade dheeth kism ke log ho.+ agar main chahoon to tumhare beech se hokar tum sabko ek hi pal mein mita sakta hoon.+ magar jab tak main sochoon ki tumhare saath kya karoon, tum gehne mat pehanna.’”
6 isliye israeliyon ne horeb pahad ke baad fir kabhi gehne nahin pehne.*
7 fir moosa ne apna tamboo uthaya aur israeliyon ki chhaavni se baahar kuch door le jaakaar khada kiya. usne apne tamboo ka naam bheint ka tamboo rakha. jab bhi koi yahova ki marzee jaanna chahta+ to woh chhaavni ke baahar us bheint ke tamboo ke paas jaata tha.
8 jaise hi moosa us tamboo ke paas jaata sab log uthkar apne-apne tamboo ke dvar par khade ho jaate. aur woh tab tak moosa ko dekhte rehte jab tak ki woh tamboo ke andar nahin chala jaata.
9 jaise hi moosa tamboo ke andar jaata, baadal ka khambha+ tamboo ke dvar par utar aata aur andar jab parmeshvar moosa se baat kar raha hota to yah khambha vahin dvar ke paas thehra rehta.+
10 jab log tamboo ke dvar par baadal ka khambha dekhte, to woh sab apne-apne tamboo ke dvar par sir jhukakar dandvat karte.
11 yahova moosa se aamne-saamne baat karta tha,+ jaise ek aadmi doosre aadmi se baat karta hai. jab moosa parmeshvar se baat karne ke baad tamboo se nikaalkar israeliyon ki chhaavni mein jaata to yahoshoo+ tamboo ke dvar par khada hota aur vahaan se nahin hatta. yahoshoo, noon ka beta aur moosa ka sevak aur madadgar tha.+
12 ab moosa ne yahova se kaha, “dekh, toone mujhse kaha, ‘in logon ki aguvai kar,’ magar toone mujhe yah nahin bataya ki tu mere saath kise bhejega. toone mujhse yah bhi kaha, ‘main tujhe tere naam se jaanta hoon* aur main tujhse khush hoon.’
13 agar tu vaakai mujhse khush hai to meharbani karke mujhe apni raahon ke baare mein sikha+ taaki main tujhe jaan sakoon aur teri kripa paata rahoon. aur is raashtra ke baare mein yah mat bhool jaana ki ye tere apne log hain.”+
14 tab parmeshvar ne usse kaha, “main khud tere saath jaaunga+ aur tujhe chain doonga.”+
15 fir moosa ne kaha, “agar tu hamare saath nahin chalega to hamein yahaan se aage mat le chal.
16 agar tu hamare saath nahin chalega to yah kaise pata chalega ki tu mujhse aur apne logon se khush hai?+ yah kaise pata chalega ki main aur tere log duniya ke sabhi logon mein se tere liye khaas hain?”+
17 yahova ne moosa se kaha, “theek hai, main teri yah guzarish bhi poori karoonga kyonki toone mujhe khush kiya hai aur main tujhe tere naam se jaanta hoon.”
18 tab moosa ne parmeshvar se yah binti ki: “kya tu mujhe apni mahima dekhne ka ek mauka dega?”
19 parmeshvar ne kaha, “main tere saamne se guzroonga aur tu dekh paayega ki main kitna bhala hoon. main tere saamne apne naam yahova ka ailan karoonga.+ main jinse khush hota hoon un par meharbani karoonga aur jin par daya dikhana chahta hoon, un par daya dikhaunga.”+
20 magar usne yah bhi kaha, “tu mera chehra nahin dekh sakega, kyonki koi bhi insan mujhe dekhkar zinda nahin reh sakta.”
21 yahova ne yah bhi kaha, “yahaan mere nazdeek ek chattan hai, tu aakaar is par khada ho jaa.
22 jab meri mahima ka tej tere saamne se guzrega to main tujhe is chattan ki ek badi darar mein rakhoonga aur jab tak main tere saamne se nikaal na jaaun tab tak apne haath se tujhe dhaanpe rahoonga.
23 iske baad main apna haath hata loonga aur tu meri peeth dekhega. magar mera chehra tu nahin dekh sakega.”+
