preshiton ke kaam 26:1-32
26 fir agrippa+ ne paulus se kaha, “tujhe apni safai mein bolne ki ijazat hai.” tab paulus ne haath uthaya aur apne bachav mein yah kehne laga,
2 “hey raja agrippa, yahoodiyon ne mujh par jin baaton ka ilzam lagaya hai,+ un sabke baare mein aaj tere saamne apni safai dene mein mujhe badi khushi ho rahi hai,
3 khaaskar isliye ki tujhe yahoodiyon ke sabhi rivazon, saath hi unke maslon ki achhi jaankari hai. isliye main tujhse binti karta hoon ki tu sabraa se meri sune.
4 vaakai, mainne javani se apne jaati-bhaaiyon ke beech aur yarooshalem mein rehte vakt jaisi zindagi bitayi hai, uske baare mein un sabhi yahoodiyon ko maaloom hai+
5 jo mujhe pehale se jaante hain. agar woh chahein to is baat ki gavahi de sakte hain ki main apne dharm ke sabse kattar panth ko maanta tha+ aur ek fareesi ki zindagi jeeta tha.+
6 magar ab us aasha ki vajah se jiska vaada parmeshvar ne hamare purkhon se kiya tha,+ mujh par yahaan mukadma chalaya jaa raha hai.
7 hamare 12 gotra isi vaade ke poora hone ki aasha lagaye huye hain, isliye woh raat-din bade jatan se parmeshvar ki pavitra seva karte hain. hey raja , isi aasha ke baare mein yahoodiyon ne mujh par ilzam lagaye hain.+
8 tumhein kyon yah naamumkin
lagta hai ki parmeshvar mare huon ko zinda karta hai?
9 ek vakt par mujhe bhi lagta tha ki yeeshu naasri ke naam ka kada virodh karna mera farz hai.
10 aur mainne yarooshalem mein aisa hi kiya. mainne pradhan yaajkon se adhikar paakaar bahot-se pavitra janon ko jelon mein band kar diya+ aur jab unhein maut ki saza dene ki baat chalti, to main bhi haami bharta tha.
11 mainne har sabha-ghar mein jaakaar unhein kitni hi baar saza dilayi taaki woh majboor hokar apna vishvas chhod dein. main unke khilaf gusse se is kadar paagal ho gaya tha ki doosre shehron mein bhi jaakaar un par zulm dhaane laga.
12 isi dhun mein jab main pradhan yaajkon se adhikar aur aagya paakaar damishk jaa raha tha,
13 to hey raja , bhari dopahri mein aakash se ek raushni chamki jo sooraj se bhi tez thi. woh raushni mere aur mere saath chalnevalon ke chaaron taraf chamak uthi.+
14 tab hum sab zameen par gir pade aur mainne ek aavaz suni jo mujhse ibrani bhasha mein kah rahi thi, ‘shaaool, shaaool, tu kyon mujh par zulm kar raha hai? is tarah virodh karke* tu apne liye mushkil paida kar raha hai.’
15 magar mainne kaha, ‘hey prabhu, tu kaun hai?’ aur prabhu ne kaha, ‘main yeeshu hoon, jis par tu zulm kar raha hai.
16 magar ab uth, apne paanvon ke bal khada ho. mainne tujhe isliye darshan diya hai ki tujhe ek sevak aur gavah thehraun taaki toone mere baare mein jo baatein dekhi hain aur jo main tujhe aage dikhaunga, unki tu gavahi de.+
17 aur main is raashtra se aur doosre raashtron se teri hifazat karoonga jinke paas main tujhe bhej raha hoon.+
18 main tujhe isliye bhej raha hoon taaki tu unki aankhein khole+ aur unhein andhkar se nikaalkar+ ujale mein le aaye+ aur shaitan ke adhikar se chhudakar+ parmeshvar ke adhikar mein le aaye aur woh mujh par vishvas karke paapon ki maafi paayen+ aur un logon ke saath virasat paayen jo pavitra thehraye gaye hain.’
19 isliye hey raja agrippa, jo aagya mujhe swarg ke is darshan mein mili, mainne use nahin toda.
20 mainne sabse pehale damishk ke logon ko,+ fir yarooshalem ke logon ko+ aur poore yahoodiya pradesh mein aur fir doosre raashtron mein bhi yah sandesh diya ki unhein pashchatap karna chahiye aur pashchatap dikhanevale kaam karke parmeshvar ki taraf firna chahiye.+
21 iseeliye yahoodiyon ne mujhe mandir mein pakad liya aur mujhe maar daalne ki koshish ki.+
22 magar parmeshvar meri madad karta raha isliye main aaj ke din tak chhote-bade sabhi ko gavahi de raha hoon. aur main un baaton ko chhod aur kuch nahin batata jinke baare mein bhavishyavaktaon aur moosa ne pehale se kaha tha.+
23 yaani yah ki maseeh dukh uthayega+ aur vahi pehala hoga jise mare huon mein se zinda kiya jaayega+ aur woh is raashtra ko aur doosre raashtron ko prachar karega aur raushni dega.”+
24 paulus apne bachav mein ye baatein bol hi raha tha ki festus ne unchi aavaz mein kaha, “are paulus, tera dimag kharab ho gaya hai, bahot gyaan ne tujhe paagal kar diya hai!”
25 magar paulus ne kaha, “hey mahapratapi festus, main paagal nahin hoon, main sachchi baatein kah raha hoon aur poore hosh-havaas mein bol raha hoon.
26 sach to yah hai ki jis raja ke saamne main bejhijhak baat kar raha hoon, woh khud bhi in baaton ke baare mein achhi tarah jaanta hai aur mujhe poora yakeen hai ki inmein se ek bhi baat usse chhipi nahin hai kyonki ye ghatnayen kisi kone mein to nahin ghatin.+
27 hey raja agrippa, kya tu bhavishyavaktaon ki baaton par yakeen karta hai? main jaanta hoon tu yakeen karta hai.”
28 magar agrippa ne paulus se kaha, “thodi hi der mein tu mujhe maseehi banne ke liye kaayal kar dega.”
29 tab paulus ne kaha, “parmeshvar se meri yahi dua hai ki chahe thodi der mein ya zyada mein, sirf tu hi nahin balki jitne log aaj meri sun rahe hain, sab meri tarah ban jaayen, bas is tarah zanjeeron mein na hon.”
30 tab raja agrippa utha aur uske saath raajyapal aur birneeke aur unke saath baithe aadmi uth khade huye.
31 magar jaate-jaate woh ek-doosre se kehne lage, “is aadmi ne aisa kuch nahin kiya ki ise maut ki saza di jaaye ya jail mein daala jaaye.”+
32 tab agrippa ne festus se kaha, “agar is aadmi ne samraat se fariyad na ki hoti, to ise riha kiya jaa sakta tha.”+
kai footnote
^ shaa., “ankush par laat maarkar.”
