utpatti 35:1-29
35 iske baad parmeshvar ne yakub se kaha, “ab tu yah jagah chhodkar betel+ jaa aur vahaan reh. vahaan sachche parmeshvar ke liye ek vedi bana, jisne tujhe us vakt darshan diya tha jab tu apne bhaai esav se jaan bachakar bhaag raha tha.”+
2 tab yakub ne apne gharane se aur jitne bhi log uske saath rehte the un sabse kaha, “tumhare paas jhoothe devtaon ki jitni bhi moortiyaan hain, unhein nikaalo+ aur khud ko shuddh karo aur apne kapde badlo,
3 kyonki ab hum yah jagah chhodkar betel jaayenge. vahaan main sachche parmeshvar ke liye ek vedi banaunga jisne museebat ki ghadi mein meri duhai suni aur main jahaan-jahaan* gaya, woh mere saath raha.”+
4 tab unhonne woh sab moortiyaan, jo unke paas thi, nikaalin aur apne kaanon ki baaliyaan bhi utaarin aur yakub ko de di. yakub ne yah sab le jaakaar shekem shehar ke paasvale bade ped ke neeche gaad* diya.
5 unhonne apna padav uthaya aur vahaan se nikaal pade. vahaan ke aas-paas ke shehron ke logon ne yakub ke beton ka peechha nahin kiya, kyonki unmein parmeshvar ka khauf sama gaya tha.
6 yakub apne logon ke saath safar karte-karte kanaan desh ke looj+ yaani betel pahuncha.
7 yahaan usne ek vedi khadi ki aur is jagah ka naam el-betel* rakha, kyonki jab woh apne bhaai se bhaag raha tha to sachche parmeshvar ne yahin par use darshan diya tha.+
8 kuch samay baad, ribka ki dhaai dabora+ ki maut ho gayi aur use betel ke paas ek baanj ped ke neeche dafnaya gaya. yakub ne us jagah ka naam allon-bakkoot* rakha.
9 jab yakub paddan- araam se laut raha tha to parmeshvar ne ek baar fir uske saamne prakat hokar use aasheesh di.
10 parmeshvar ne usse kaha, “tera naam yakub hai+ magar ab se tera naam yakub nahin, israel hoga.” aur parmeshvar use israel bulane laga.+
11 parmeshvar ne usse yah bhi kaha, “main sarvashaktiman parmeshvar hoon.+ main tujhe aasheesh deta hoon ki tu foole-fale aur ginti mein badh jaaye. tujhse jaatiyaan nikleingi, haan, kai jaatiyaan nikleingi+ aur tere khaandan se raja paida honge.+
12 aur jo desh mainne abraham aur ishaak ko diya tha, vahi desh main tujhe aur tere baad tere vansh ko doonga.”+
13 yakub se yah sab kehne ke baad parmeshvar vahaan se chala gaya.
14 iske baad yakub ne us jagah par, jahaan parmeshvar ne usse baat ki thi, yaadgar ke taur par ek patthar khada kiya. fir us patthar par argh chadhaya aur tel undela.+
15 aur yakub ne dobara us jagah ko betel kaha+ jahaan parmeshvar ne usse baat ki thi.
16 fir woh betel se apna padav uthakar aage badhe. woh eprat se kuch doori par the ki tabhi raahel ki prasav-peeda shuroo ho gayi. bachcha janne mein use bahot takaleef ho rahi thi.
17 jab woh dard se tadap rahi thi, to uski dhaai ne usse kaha, “himmat rakh, tujhe ek aur beta hoga.”+
18 fir raahel ne ek ladke ko janm diya. bachcha jante-jante uski maut ho gayi. magar jab uski jaan nikaal rahi thi to usne apne bete ka naam ben-oni* rakha. lekin yakub ne use binyameen*+ naam diya.
19 is tarah eprat (yaani betlehem) jaanevale raaste mein raahel ki maut ho gayi aur use vahin dafnaya gaya.+
20 yakub ne raahel ki kabraa par nishani ke taur par ek bada-saa patthar khada kiya. yah patthar aaj tak uski kabraa par rakha hua hai.
21 iske baad israel apna padav uthakar aage badha. usne eder meenar se aage jaakaar apna tamboo gaada.
22 jab israel vahaan reh raha tha to ek din rooben ne apne pita ki up-patni bilha ke saath sambandh rakhe aur yah baat israel ko pata chali.+
yakub ke 12 bete the.
23 lia se yakub ke ye bete huye: pehalautha rooben,+ uske baad shimon, levi, yahooda, issakar aur jabooloon.
24 raahel se yoosuf aur binyameen paida huye.
25 raahel ki daasi bilha se daan aur naptali
26 aur lia ki daasi jilpa se gaad aur aasher paida huye. ye sabhi yakub ke bete the jo paddan- araam mein paida huye the.
27 aakhirkar yakub apne pita ishaak ke paas mamre pahuncha+ jo kiryat-arba yaani hebron ke ilake mein hai. yahin par abraham aur ishaak ne pardesiyon ki zindagi guzari thi.+
28 ishaak kul milakar 180 saal jeeya.+
29 ek lambee aur khushhal zindagi jeene ke baad* uski maut ho gayi aur use dafnaya gaya.* ishaak ko uske bete esav aur yakub ne dafnaya.+
kai footnote
^ ya “jis raaste.”
^ ya “chhipa.”
^ matlab “betel ka parmeshvar.”
^ matlab “rone ka baanj.”
^ matlab “mere maatam ka beta.”
^ matlab “daayen haath ka beta,” yaani mera chaheta beta.
^ shaa., “boodha aur poori umra ka hokar.”
^ shaa., “woh apne logon mein jaa mila.”
