shiksha dene ka matlab hai kisi ko sikhana ya sahi raah dikhana. bachchon ko shiksha dene mein yah baat bhi shaamil hai ki galti karne par hum unhein sudhaarein. unhein naitik usoolon ke baare mein batana bhi zaroori hai, taaki woh galti karke seekhne ke bajay pehle hi sahi kaam karein.

beete kuch saalon se maata-pitaon ne bachchon ko sudhaarna ya galti karne par unhein saza dena kareeb-kareeb chhod diya hai. unhein dar hai ki kahin bachche yah na samajhne lagein ki woh kisi laayak nahin. lekin samajhdar maata-pita apne bachchon ke liye kuch kaayde-kaanoon banate hain aur unke hisab se chalna bhi sikhate hain.

“bachchon ke liye kuch hadein thehrana zaroori hai, tabhi woh bade hokar achhe insan baneinge. agar maata-pita unhein khuli chhoot de dein, to woh bin patvar ki naav ki tarah honge, jo raaste se bhatak jaayegi ya shaayad doob jaayegi.”​—pamela.

apni baat par atal rahiye. agar aapka bachcha aapke banaye niyamon par nahin chalta, to use saza deejiye. jab woh aapke niyamon ko maane, to use shaabashi deejiye.

“main aksar apne bachchon ki taareef karti hoon ki woh meri baat maante hain. aajkal aise bachche milte kahaan hain! isliye jab bhi woh galti karte hain aur main unhein sudhaarti hoon, to woh meri sunte hain.”​—christine.

pavitra shastra ki salah: “insan jo bota hai, vahi kaatega bhi.”​—galatiyon 6:7.

haalaat ke hisab se sudhaariye. apne bachche ko sudharte samay uski umra, kaabileeyat aur uski galti kitni badi hai, is baat ko dhyan mein rakhiye. galti ke hisab se use saza deejiye, taaki woh khud mein sudhaar kar sake. jaise, agar woh phone ke istemal ke baare mein aapka niyam tod de, to aap use yah saza de sakte hain ki woh kuch samay ke liye phone ko haath na lagaye. par saath hi dhyan rakhein ki bachche ki chhoti-chhoti galtiyon par baval na khada karein.

“jab bhi mera bachcha koi galti karta hai, to main yah jaanne ki koshish karta hoon ki usne woh galti anjane mein ki ya jaanboojhkar. agar woh baar-baar vahi galti karta hai, to use sudhaarna zaroori hota hai, lekin agar usne anjane mein koi galti ki hai, to use bas galti ka ehsas dilana kaafi hota hai.”​—wendell.

pavitra shastra ki salah: “apne bachchon ko gussa mat dilao, kahin aisa na ho ki woh nirash ho jaayen.”​—kulussiyon 3:21; footnote.

pyar se sikhaiye. jab bachchon ko ehsas hota hai ki mammi-paapa unse pyar karne ki vajah se unhein sudhaar rahe hain, to woh aasani se unki baat maante hain.

“jab hamara beta galti karta tha, to hum use yakeen dilate the ki usne jo bhi achhe kaam kiye hain, uske liye hamein us par naaz hai. fir hum use batate the ki us galti ki vajah se woh bura nahin ban gaya aur galti sudhaarne mein hum uski madad kareinge.”​—daniel.

pavitra shastra ki salah: “pyar sabra rakhta hai aur kripa karta hai.”​—1 kurinthiyon 13:4.