Ang pinakauna nga ‘Ibantala ang Maayong Balita!’ nga Espesyal nga Kombension hiwaton sa Vélodrome Amédée Détraux sa Baie-Mahault, Guadeloupe, sugod sa Hunyo 7 asta 9, 2024. Sa kabilugan, may 15 ka espesyal nga kombension nga hiwaton sa bulan sang Hunyo asta Oktubre 2024. a Amo ini ang una nga tion nga magahiwat sang espesyal nga kombension halin sang COVID-19 nga pandemic nga ginbangdan sang pag-cancel sang mga espesyal nga kombension sang 2020.

Ang mga kauturan halin sa sarisari nga mga pungsod gin-agda nga mangin delegate sa sining espesyal nga mga kombension. Madamo nga programa ang i-translate sa madamo nga lenguahe, gani mabatyagan gid ang paghiusa sang mga tawo halin sa sarisari nga mga pungsod. Halimbawa sa Guadeloupe, ang programa sa kombension dungan nga i-translate sa English, French, Guadeloupean Creole, kag Spanish.

Madamo man sang dapat ihanda para sa mga delegate halin sa sarisari nga mga pungsod. Halimbawa sa Guadeloupe, sobra katunga sa 8,546 ka kauturan nga nagaalagad didto ang nag-volunteer sa paghanda para sa 1,500 ka kauturan halin sa 11 ka pungsod. Ang isa ka sister, nga nag-volunteer upod sa iya bana, nagsiling: “Amo ini ang pinakanami nga tuig sang akon kabuhi! Indi ko gid ini malipatan asta san-o. Nag-enjoy gid ako sa pag-obra upod sa akon mga kauturan kag nakabulig ini para mabal-an ko kon ano ang mangin kabuhi sa bag-ong kalibutan. Proud gid ako nga bahin ako sang organisasyon ni Jehova!”

Upod sa aton mga kauturan sa bilog nga kalibutan, nagasalig kita nga ining 2024 ‘Ibantala ang Maayong Balita!’ nga Espesyal nga Kombension magapahiusa pa gid sa katawhan sang Dios kag magahatag sang dungog kag magadayaw sa aton Amay sa langit, nga si Jehova.—Filipos 1:27.