Sang Mayo 12, 2023, ginreport sa “Balita” nga seksion sang jw.org ang pag-ilinaway sang duha ka grupo sa Khartoum, ang kapital sang Sudan. Nagresulta ini sa kamatayon ukon pagkasamad sang linibo ka tawo. Ang pila sa aton kauturan nga nagaistar sa Khartoum ukon malapit sa sini nagdesisyon nga magpalagyo. Samtang nagapalagyo sila, napabakod sila kag napalig-on sang base sa Biblia nga mga publikasyon kag mga miting nga ginahiwat sang organisasyon ni Jehova.

Halimbawa, pila ka adlaw sang nag-umpisa ang inaway, si Ajuja, nga isa ka 23 anyos nga sister kag payunir nga taga-Khartoum, nag-attend sa miting paagi sa videoconference. Ginbinagbinag ang artikulo sang Lalantawan nga may titulo nga “Hupti ang Inyo Ikasarang sa Paghunahuna sing Maayo, Mangin Mabinantayon!” Siling niya: “Ang pagrebyu sini nga artikulo nagpadumdom sa akon nga ang mga nagakatabo sa palibot subong katumanan sang tagna sa Biblia. Amo ato ang pagpalig-on nga kinahanglan ko sina nga tion.” Samtang nagalala ang sitwasyon sa ila siudad, nagdesisyon si Ajuja nga magbakwit. Nagsiling sia: “Samtang nagabiyahe, napalig-on pa gid ako sa pagpamati sa aton orihinal nga mga kanta kag sang iban pa nga audio recording. Nagapangamuyo ako kay Jehova nga makaabot lang kami nga safe.” Nakaabot si Ajuja nga wala maano kag gin-abiabi sia sang mga kauturan sa Kassala.

Si Eli, nga isa ka 24 anyos nga gulang kag payunir nga taga-El Haj Yousif, nga malapit sa kinagamo sa Khartoum, nagpalagyo pakadto sa siudad sang Kosti nga mga 330 ka kilometro ang kalayuon. Gin-abiabi sia sang iya mga kauturan nga naghatag sa iya sing pagkaon kag ilistaran. Sang ulihi, narealisar ni Eli nga ang nagpalig-on sa iya sang nagbakwit sia amo ang ginbasa niya nga mga teksto kada adlaw sina nga semana. Halimbawa, ang Salmo 91:2 nagpadumdom kay Eli nga dapat sia magdangop kay Jehova kag himuon Sia nga kuta. Nagsiling si Eli: “Wala gid sing matuod nga kalinong sa sining magamo nga kalibutan, kag wala gid sing solusyon nga mahatag ang gobierno ukon ang mga lider sang militar. Ang aton matuod nga paglaum amo ang Ginharian sang Dios, nga magasolbar sang tanan naton nga mga problema.”

Si Tia kag ang iya asawa nga si Julia mga payunir sa Omdurman kag malapit ini sa Khartoum. Samtang nagalala ang kinagamo, nadumduman nila ang isa ka artikulo sa Lalantawan nga nagapalig-on sa mga Cristiano nga himuon dayon ang mga desisyon nga ila ginhimo. Nakita ni Tia kag Julia nga nagalala ang kahimtangan sa ila siudad, gani nagdesisyon sila nga mas maayo kon maghulag sila dayon kag maghalin sa siudad. Nakaabot sila nga wala maano sa lain nga lugar kag gin-abiabi sila sang mga kauturan didto. Nagapasalamat gid sila sa impormasyon nga natun-an nila sa Ang Lalantawan. Si Julia nagsiling: “Proud gid kami nga bahin kami sining mapinalanggaon nga organisasyon. Matuod gid nga ang kamot ni Jehova indi malip-ot nga indi makaluwas.”

Ang tanan nga mga kauturan nga ginsambit sa sini nga artikulo nagpadayon sa ila rutina sa pagsimba kay Jehova sa ila bag-o nga mga ilistaran. Lakip sa sini ang aktibo nga pagpakigbahin sa mga miting, pagministeryo, kag pagsugod sang mga Bible study. Ining tanan nga espirituwal nga mga hilikuton, lakip na ang pagpakig-suod sa mga kauturan sa ila bag-o nga mga kongregasyon, naghatag sa ila sing kalig-on kag kalipay.

Makapalig-on gid nga makita ang aton mga kauturan sa Sudan nga padayon nga nagasalig kay Jehova kag sa Kasulatan para sa paumpaw kag paglaum.—Roma 15:4, 5.