1 Corinto 16:1-24
16 Tuhoy sa pagpangolekta para sa mga balaan,+ mahimo ninyo himuon ang ginpahimo ko sa mga kongregasyon sa Galacia.
2 Kada nahauna nga adlaw sang semana, dapat magpain ang kada isa sa inyo suno sa inyo masarangan, agod pag-abot ko indi na kamo magpangolekta.
3 Kag pag-abot ko dira, ipadala ko ang masaligan nga mga lalaki nga ginsambit ninyo sa inyo sulat+ agod dal-on ang inyo maayo nga dulot sa Jerusalem.
4 Apang, kon kinahanglan gid nga magkadto man ako didto, magaupod na lang sila sa akon.
5 Makadto ako sa inyo paghalin ko sa Macedonia, kay maagi ako didto.+
6 Basi magadugay ako dira sa inyo, ukon dira pa ako mapaligad sing tigtulugnaw, agod maupdan ninyo ako bisan sa malip-ot lang nga distansia pakadto sa akon kaladtuan.
7 Kay indi ko luyag nga mag-agi lang sa inyo sing makadali, kundi luyag ko nga magtener sa inyo sing madugaydugay+ kon itugot ni Jehova.*
8 Apang matener anay ako sa Efeso+ tubtob sa Kapiestahan sang Pentecostes,
9 bangod nabuksan sa akon ang daku nga puertahan sang kahigayunan para sa madamo nga hilikuton,+ apang madamo ang nagapamatok.
10 Kon mag-abot si Timoteo,+ pat-ura ninyo nga wala sia sing kabalak-an samtang kaupod ninyo sia, kay kaangay ko ginahimo man niya ang hilikuton ni Jehova.*+
11 Gani, wala sing bisan sin-o nga magtamay sa iya. Palakta ninyo sia nga may paghidait, agod makakadto sia sa akon, kay ako kag ang mga kauturan nagahulat sa iya.
12 Tuhoy sa aton utod nga si Apolos,+ ginpangabay ko gid sia nga updan niya ang mga kauturan kon magduaw sila sa inyo. Wala pa sia sing plano nga magkadto sa karon, apang magakadto sia ugaling kon may kahigayunan na sia.
13 Magpabilin kamo nga nagamata,+ magtindog kamo sing malig-on sa inyo pagtuo,+ magpakaisog kamo,+ magpakabakod kamo.+
14 Himua ninyo nga may paghigugma ang tanan ninyo nga hilikuton.+
15 Mga kauturan, nahibaluan ninyo nga ang panimalay ni Estefanas amo ang una nga mga disipulo sa Acaya kag ginhugod nila ang ila kaugalingon sa pag-alagad sa mga balaan. Gani, ginalaygayan ko kamo:
16 Kabay nga padayon man kamo nga magpasakop sa mga tawo nga kaangay sa ila kag sa tanan nga nagabulig kag nagapangabudlay upod sa amon.+
17 Apang bisan wala kamo diri nalipay ako nga yari diri sanday Estefanas+ kag Fortunato kag Acaico, kay ginpun-an nila ang mga butang nga indi ninyo mahimo.
18 Nagahatag sila sing kalipay sa akon kag sa inyo man. Gani pasalamati ninyo ang mga tawo kaangay sa ila.
19 Ang mga kongregasyon sa Asia* nagapangamusta sa inyo. Sanday Aquila kag Prisca kag ang kongregasyon nga nagatipon sa ila balay+ mainit man nga nagapangamusta sa inyo subong mga sumulunod sang Ginuo.
20 Ang tanan nga mga kauturan nagapangamusta sa inyo. Magkamustahanay kamo paagi sa utudnon nga halok.
21 Ako mismo si Pablo ang nagsulat sini nga pangamusta.
22 Kon ang bisan sin-o wala sing gugma sa Ginuo, pakamalauton sia. O Ginuo namon, magkari ka!
23 Kabay nga mabaton ninyo ang wala tupong nga kaayo ni Ginuong Jesus.
24 Ang akon gugma yara sa inyo tanan nga mga disipulo ni Cristo Jesus.
