1 Timoteo 2:1-15
2 Una sa tanan, ginapalig-on ko kamo nga mag-ampo, mangamuyo, mangabay, kag magpasalamat para sa tanan nga sahi sang tawo,
2 para sa mga hari kag sa tanan nga may mataas nga posisyon,+ agod magkabuhi kita sing matawhay kag malinong nga may bug-os nga diosnon nga debosyon kag pagkaserioso.+
3 Maayo ini kag kalahamut-an sa itululok sang aton Manluluwas, ang Dios,+
4 nga ang kabubut-on amo nga ang tanan nga sahi sang tawo maluwas+ kag makadangat sa sibu nga ihibalo tuhoy sa kamatuoran.
5 Kay may isa ka Dios,+ kag isa ka manugpatunga+ sa Dios kag sa mga tawo,+ ang tawo nga si Cristo Jesus,+
6 nga naghatag sang iya kaugalingon subong katumbas nga gawad para sa tanan*+—pat-od nga ipanaksi ini sa nagakaigo nga tion sini.
7 Tungod sini nga pagpanaksi+ gintangdo ako nga manugbantala kag apostol+—nagasugid ako sang kamatuoran, wala ako nagabutig—isa ka manunudlo sang mga pungsod+ nga magatudlo sa ila tuhoy sa pagtuo kag kamatuoran.
8 Gani luyag ko nga sa tanan nga lugar ang mga lalaki padayon nga mangin balaan kag nagabayaw sang ila mga kamot sa pangamuyo,+ nga wala sing kaakig+ kag binais.+
9 Ang mga babayi dapat man magpamayo sing nagakaigo,* nga may kaugdang kag maligdong nga hunahuna,* indi paagi sa mga estilo sang pagsalapid sing buhok kag pagsuksok sang mga bulawan ukon perlas ukon malahalon gid nga bayo,+
10 kundi sa paagi nga nagakaigo sa mga babayi nga nagapangangkon nga nagasimba sa Dios,+ paagi sa maayong mga buhat.
11 Ang babayi dapat maghipos* samtang ginatudluan kag magpasakop sing bug-os.+
12 Wala ko ginatugutan ang babayi nga magpanudlo ukon magdumala sa lalaki, kundi magpabilin sia nga nagahipos.*+
13 Kay si Adan ang una nga gintuga, dayon si Eva.+
14 Isa pa, si Adan wala madaya, kundi ang babayi amo ang nadaya+ kag nangin malinapason.
15 Apang ang babayi pagaamligan paagi sa pagpanganak,+ kon magpadayon sia* sa pagtuo, gugma, kag pagkabalaan upod ang maligdong nga panghunahuna.*+
Footnote
^ Ukon “sa tanan nga sahi sang tawo.”
^ Ukon “talahuron.”
^ Ukon “maayo nga hunahuna; pagkamahinantupon.”
^ Ukon “indi maghambal; kalmado.”
^ Ukon “kalmado; wala nagahambal.”
^ Sa literal, “sila.”
^ Ukon “maayo nga hunahuna; pagkamahinantupon.”
