2 Cronica 20:1-37
20 Sang ulihi, naglakat ang mga Moabnon+ kag ang mga Ammonhon,+ upod ang iban nga mga Ammonim,* agod magpakig-away kay Jehosapat.
2 Gani may nagpahibalo kay Jehosapat: “Daku nga kadam-an ang magasalakay sa imo. Halin sila sa Edom,+ sa rehiyon malapit sa dagat;* kag yara na sila sa Hazazon-tamar, nga amo ang En-gedi.”+
3 Hinadlukan si Jehosapat kag namat-od sia* nga pangitaon si Jehova.+ Gani nagsugo sia nga magpuasa ang bug-os nga Juda.
4 Dayon nagtipon ang mga taga-Juda agod magpangayo sing bulig kay Jehova.+ Halin sila sa tanan nga siudad sang Juda agod magpangayo sing panuytoy ni Jehova.
5 Dayon nagtindog si Jehosapat sa atubangan sang katilingban sang Juda kag sang Jerusalem nga nagtipon sa bag-o nga luwang sang balay ni Jehova.
6 Nagsiling sia:
“O Jehova nga Dios sang amon mga katigulangan, indi bala nga ikaw ang Dios sa langit;+ kag ikaw ang nagagahom sa tanan nga ginharian sang mga pungsod?+ Gamhanan gid ikaw, kag wala sing makabato sa imo.+
7 O Dios namon, indi bala nga gintabog mo ang mga pumuluyo sini nga duta palayo sa imo katawhan nga Israel kag ginhatag mo ini agod panag-iyahan tubtob san-o sang kaliwat* ni Abraham nga imo abyan?+
8 Nag-istar sila sa sini, kag nagpatindog sila sing santuaryo para sa kadungganan sang imo ngalan,+ kag nagsiling sila:
9 ‘Kon may kahalitan nga mag-abot sa amon, paagi man ini sa espada, paghukom, peste, ukon tiggulutom, magatindog kami sa atubangan sini nga balay kag sa atubangan mo (kay ginpili mo ini nga balay para sa kadungganan sang imo ngalan)+ agod mangayo kami sa imo sing bulig bangod sang amon kabudlayan, kag kabay pa nga pamatian mo kami kag luwason.’+
10 Tan-awa ang ginahimo sang katawhan sang Ammon, sang Moab, kag sang kabukiran sang Seir.+ Wala mo gintugutan ang Israel nga salakayon sila sang naggua ang Israel sa duta sang Egipto. Ginlikawan nila sila kag wala ginlaglag.+
11 Kag karon amo ini ang ginabalos nila sa amon. Ginatabog nila kami sa imo duta nga ginhatag mo sa amon nga palanublion namon.+
12 O Dios namon, indi mo bala sila pagsilutan?+ Kay wala kami sing kusog sa pagbato sa sining daku nga kadam-an nga magasalakay sa amon; kag indi kami makahibalo kon ano ang himuon namon,+ apang nagasalig kami sa imo.”+
13 Nagatindog sadto sa atubangan ni Jehova ang tanan nga taga-Juda, upod ang ila magagmay nga kabataan, ang ila mga asawa, kag ang ila mga anak.*
14 Dayon ang espiritu ni Jehova nag-abot kay Jahaziel nga anak ni Zacarias nga anak ni Benaias nga anak ni Jeiel nga anak ni Matanias nga Levinhon halin sa mga anak ni Asaf, samtang yara sia sa tunga sang katilingban.
15 Nagsiling sia: “Pamatii ninyo ako, kamo tanan nga taga-Juda kag kamo nga mga pumuluyo sang Jerusalem kag ikaw Hari Jehosapat! Amo ini ang ginasiling sa inyo ni Jehova, ‘Indi kamo mahadlok bangod sining daku nga kadam-an, kay indi kamo ang magapakig-away, kundi ang Dios.+
16 Salakayon ninyo sila buas. Magaagi sila sa taklaron sang Ziz, kag makita ninyo sila sa punta sang nalupyakan* malapit sa kamingawan sang Jeruel.
17 Indi kamo kinahanglan magpakig-away sa sini nga inaway. Magtindog kamo sa inyo mga puesto, kag magpahimunong lang,+ kag tan-awa ninyo ang pagluwas sa inyo ni Jehova.+ Kamo nga mga taga-Juda kag taga-Jerusalem, indi kamo mahadlok.+ Salakayon ninyo sila buas, kag magaupod sa inyo si Jehova.’ ”+
18 Nagluhod dayon kag nagduko si Jehosapat, kag nagluhod man ang tanan nga taga-Juda kag ang mga pumuluyo sang Jerusalem sa atubangan ni Jehova agod simbahon si Jehova.
19 Dayon nagtindog ang mga Levinhon nga mga kaliwat sang mga Kohatnon+ kag sang mga Koranhon agod dayawon si Jehova nga Dios sang Israel sa mabaskog gid nga tingog.+
20 Pagkaaga, temprano pa sila nga nagbangon kag nagkadto sa kamingawan sang Tekoa.+ Samtang nagalakat sila, nagtindog si Jehosapat sa ila atubangan kag nagsiling sia: “Pamatii ninyo ako, kamo nga mga taga-Juda kag kamo nga mga pumuluyo sang Jerusalem! Magtuo kamo kay Jehova nga inyo Dios agod makatindog kamo sing malig-on.* Magtuo kamo sa iya mga manalagna,+ kag magamadinalag-on kamo.”
21 Sa tapos sia makighambal sa mga tawo, nagpili sia sing mga lalaki nga magaamba+ sing pagdayaw kay Jehova. Magasuksok sila sing balaan nga mga bayo kag magauna sila sa mga soldado kag magaamba sila: “Magpasalamat kamo kay Jehova, kay ang iya mainunungon nga gugma wala sing katapusan.”+
22 Sang magsugod na sila sa pag-amba sing mga pagdayaw sing malipayon, ginpahanabo ni Jehova ang hinali nga pagsalakay batok sa mga lalaki sang Ammon, sang Moab, kag sang kabukiran sang Seir nga nagasalakay sa Juda, kag sila ang nagpinatyanay.+
23 Ginsalakay sang mga Ammonhon kag sang mga Moabnon ang mga pumuluyo sang kabukiran sang Seir+ kag ginpamatay sila. Sang maubos nila pamatay ang mga pumuluyo sang Seir, sila naman ang nagpinatyanay.+
24 Pag-abot sang mga taga-Juda sa lalantawan sa kamingawan+ agod tan-awon ang kadam-an, nakita nila nga nagalinapta ang mga bangkay sa duta;+ wala gid sing bisan isa nga buhi.
25 Gani ginkadtuan ini ni Jehosapat kag sang iya mga tinawo agod kuhaon ang mga pagkabutang sang mga bangkay. Nakita nila nga kadamo gid sang ila mga pagkabutang, mga bayo, kag matahom nga mga gamit. Ginpanguha nila ini tubtob indi na nila ini masarangan dalhon.+ Tatlo ka adlaw nga ginpanguha nila ang mga inagaw kay kadamo gid sini.
26 Sang ikap-at nga adlaw, nagtipon sila sa Nalupyakan* sang Beraca, kag gindayaw* nila didto si Jehova. Amo kon ngaa ginatawag nila ini nga lugar nga Nalupyakan sang Beraca*+ tubtob subong.
27 Dayon nagbalik sa Jerusalem nga nagakasadya ang tanan nga lalaki sang Juda kag sang Jerusalem, kag si Jehosapat ang nagapanguna sa ila. Nagkasadya sila bangod ginpadaug sila ni Jehova sa ila mga kaaway.+
28 Nag-abot sila sa balay ni Jehova+ sa Jerusalem nga may dala nga de-kuerdas nga mga instrumento, mga arpa,+ kag mga trumpeta.+
29 Hinadlukan ang tanan nga ginharian sa kadutaan tungod sa Dios sang mabatian nila nga nagpakig-away si Jehova sa mga kaaway sang Israel.+
30 Gani wala sing inaway sa ginharian ni Jehosapat, kag padayon sia nga ginhatagan sang iya Dios sing kalinong sa tanan nila nga kaaway sa palibot.+
31 Padayon nga naghari si Jehosapat sa Juda. Nagaedad sia sing 35 ka tuig sang nangin hari sia, kag naggahom sia sa Jerusalem sing 25 ka tuig. Ang iya iloy amo si Azuba nga anak ni Silhi.+
32 Ginsunod niya ang dalanon sang iya amay nga si Asa.+ Wala sia magsipak sa sini, kag ginhimo niya ang matarong sa panulok ni Jehova.+
33 Apang wala ginkuha ang sagrado nga mataas nga mga duog,+ kag indi pa handa ang tagipusuon sang katawhan para sa Dios sang ila mga katigulangan.+
34 Tuhoy sa iban pa nga natabo sa kabuhi ni Jehosapat, halin sa umpisa tubtob sa katapusan, nasulat ini sa mga sinulatan ni Jehu+ nga anak ni Hanani,+ nga nalakip sa Libro sang mga Hari sang Israel.
35 Sang ulihi, nakig-alyansa si Hari Jehosapat sang Juda kay Hari Ahazias sang Israel, nga naghimo sing malain.+
36 Ginhimo niya sia nga kasosyo sa paghimo sing mga barko nga magapanakayon sa Tarsis,+ kag ginpahimo nila ang mga barko sa Ezion-geber.+
37 Apang, nagtagna batok kay Jehosapat si Eliezer nga anak ni Dodavahu nga taga-Maresha, kag nagsiling sia: “Bangod nakig-alyansa ka kay Ahazias, gub-on ni Jehova ang imo mga ginpahimo.”+ Gani naguba ang mga barko,+ kag wala na ini makapanakayon sa Tarsis.
Footnote
^ Ukon mahimo, “Meunimhon.”
^ Mahimo gid nga ang Patay nga Dagat.
^ Sa literal, “ginpahamtang niya ang iya nawong.”
^ Sa literal, “binhi.”
^ Sa literal, “mga anak nga lalaki.”
^ Ukon “agod makabatas kamo.”
^ Ukon “Manubo nga Patag.”
^ Sa literal, “ginpakamaayo.”
^ Buot silingon, “Pagpakamaayo.”
