Sa nagligad nga mga pahina, madamo kita sang nabasa parte sa mga pamatan-on nga ‘nagdumdom sang ila Daku nga Manunuga sa mga adlaw sang ila pagkapamatan-on.’ (Man. 12:1) Ang matuod, mga 30 porsiento sang 3,197 ka payunir sa Georgia ang 25 anyos ukon mas bata pa. Ngaa madamo sa sini nga pamatan-on ang nagauswag sa espirituwal?

Madamo ang rason. Una, ang mga pamilya sa Georgia masami nga may suod nga kaangtanan. Si Konstantine nga nagpadaku sang iya lima ka kabataan sa kamatuoran, nagpaathag: “Naganyat ako sa kamatuoran bangod nabatyagan ko nga si Jehova isa ka mahigugmaon nga Amay. Sang nangin amay ako, luyag ko man nga mangin suod sa akon ang akon kabataan.”

Gintinguhaan gid ni Malkhazi kag sang iya asawa nga mangin suod sa ila tatlo ka kabataan. Nagsiling sia: “Sa tion kag tion, ginahambalan namon ang amon kabataan nga pamensaron kon ano ang nanamian nila sa amon kag sa ila mga utod. Dayon, ginapalig-on namon sila nga ipabutyag  ini sa tion sang pangpamilya nga pagsimba. Subong resulta, natun-an nila nga makita kon ano ang maayo sa iban kag apresyahon sila.”

Agod mabuligan ang mga ginikanan sa paghanas sa ila kabataan, ginalakip sang mga gulang ang mga pamatan-on sa mga hilikuton sa kongregasyon samtang bata pa sila. Si Nestori nga nabawtismuhan sa edad nga 11, nagsiling: “Halin sang bata pa ako, ginhatagan ako sang mga gulang sang sari-sari nga magagmay nga asaynment. Nakabulig ini agod mabatyagan ko nga bahin gid ako sang kongregasyon.”

Nakabulig man ang maayo nga halimbawa kag bulig sang mga gulang. Si Koba nga magulang nga lalaki ni Nestori, nagsaysay: “Indi pareho sa akon mga utod, magamo ang akon pagkatin-edyer. Isa ka maayo nga halimbawa sa akon ang isa ka bataon nga gulang. Pirme niya ako ginaintiende kag wala gid niya ako ginahukman. Gani, daku ang iya nabulig agod makabalik ako kay Jehova.”

 Sanday Nestori, Koba kag ang magulang nila nga babayi nga si Mari, updanay subong sa pag-alagad sa malayo nga teritoryo. Nagsiling si Koba, “Makaalayaw na ang akon kabuhi karon!”

Ginatinguhaan sang sanga talatapan nga mabuligan ang mga ginikanan sa paghanas sa ila kabataan paagi sa paglakip sa pamatan-on nga mga Cristiano sa teokratiko nga mga proyekto. Nagsiling ang isa ka katapo sang Komite sang Sanga: “Ginapabaloran gid namon ang mga pamatan-on, gani ginabuligan namon sila samtang ginalab-ot nila ang ila tulumuron sa pag-alagad.”

Indi gid malipatan sang mga pamatan-on ang pagtrabaho upod sa mga hamtong nga kauturan kag ang pagpakig-upod sa ila. Si Mamuka nga nakaupod ang mga international servant sa pagtukod sang Assembly Hall sa Tbilisi, nagsiling: “Madamo gid ako sing natun-an sa iban sa sining internasyonal nga mga proyekto. Indi lang nga nakahibalo ako mag-obra, kundi madamo man ako sing natun-an sa espirituwal.”

Ang suod nga kaangtanan sa sulod sang pamilya, pagpalig-on sang mga gulang, kag maayo nga mga halimbawa, nakabulig gid sa madamo nga pamatan-on sa Georgia. Pareho gid ang ginabatyag sang ila ginikanan kay apostol Juan, nga nagsulat: “Wala na sang makapahalipay sa akon sangsa sini: Ang mabatian ko nga ang akon mga anak nagalakat sa kamatuoran.”—3 Juan 4.

Sang 2013, gin-agda sang Nagadumala nga Hubon ang tanan nga sanga nga hibaluon kon may mga lenguahe pa sa ila teritoryo nga nagakinahanglan sang publikasyon.  Katuyuan sini nga mabantalaan ang mas madamo nga tawo sang maayong balita.

Gani, nagdesisyon ang sanga sa Georgia nga i-translate ang pila ka publikasyon sa Svan kag Mingrelian, mga lenguahe nga lapitlapit sa Georgian nga ginakabig sang iban nga mga dialekto.

Ang makugi nga mga payunir sa rehiyon sang Svaneti nagsulat: “Interesado gid sa Dios ang mga Svan kag tudok nga ginatahod nila ang Biblia. Bisan ang mga daw indi magbaton sang una, napahulag nga magbaton sang aton mga publikasyon nga na-translate sa ila namat-an nga lenguahe.”

Ang tanan nga manugbantala nga nagahambal sang Mingrelian natandog gid sang ginhiwat ang ila mga miting sa ila namat-an nga lenguahe. Ang isa ka bataon nga  payunir nga si Giga nagsiling: “Subong, makakomento na ako sa akon kaugalingon nga mga tinaga sa miting. Indi ko na kinahanglan nga mag-translate anay sa akon hunahuna antes magkomento.”

Si Zuri nga isa ka gulang sa Mingrelian nga kongregasyon sa Tkaia nagpabutyag: “Madamo ako sing makalilipay kag makapasubo nga naagyan sa akon kabuhi, pero wala gid ako mapahibi sini. Pero sang una nga ginkanta sa miting ang Mingrelian nga mga ambahanon sang Ginharian, naghibi ang tanan, pati na ako.”

Sang Sabado, Abril 6, 2013, may talalupangdon gid nga hitabo sa kasaysayan sang mga Saksi sa Georgia. Gindedikar ang ginkay-o kag ginpasangkad nga pasilidad sang  sanga, Assembly Hall, kag bag-o nga pasilidad para sa teokratiko nga mga eskwelahan. Si David Splane sang Nagadumala nga Hubon ang nagpamulongpulong sa dedikasyon. Gin-amuma sang madamo nga Saksi sa Georgia ang 338 ka delegado halin sa 24 ka pungsod.

Pagkasunod nga adlaw, 15,200 ang nakabenepisyo sa pinasahi nga pamulongpulong ni Brother Splane paagi sa audio/video hook-up sa mga ginahiwatan sang mga miting sang kongregasyon sa bug-os nga Georgia. Amo ini ang pinakadaku nga internasyonal nga pagtilipon sang mga Saksi nga ginhiwat sa sini nga pungsod. Makatalandog gid makita ang pagpalig-unay kag kalipay sang kauturan. Ang isa ka pamatan-on nga brother nagsiling, “Nahibaluan ko na kon ano ang akon batyagon sa bag-o nga kalibutan.”

Ang Bible School for Christian Couples nga ginatawag na subong nga School for Kingdom Evangelizers nangin daku nga pagpakamaayo sa katawhan ni Jehova sa Georgia. Sugod sang 2013, sobra na 200 ka estudyante ang nakagradweyt. Bangod nagapasalamat sila sa paghanas nga ila nabaton, handa sila nga mag-alagad sing makugi bisan diin sila ipadala.

Bangod sa panikasog kag kaisog sang nahauna nga mga manugbantala sang Ginharian, naglapnag ang maayong balita sa bug-os nga Georgia. Ang ila gugma sa Dios kag sa isigkatawo, subong man ang ila pagtuo, kaisog, kag pagkamapasibusibuon ginpakamaayo gid ni Jehova.

Ang sobra 18,000 ka kauturan sa Georgia nalipay nga padayunon ang hilikuton sang mga nahauna sa ila kag buligan ang iban nga maeksperiensiahan ang gahom sang Pulong sang Dios.—Fil. 3:13; 4:13.