NABATIAN ko ang parte sa mga Saksi sang nagaeskwela ako sa kolehiyo sa siudad sang Kutaisi. Ginsilingan ako sang akon kaingod nga ang mga Saksi wala nagagamit sing imahen sa ila pagsimba kag wala nagapati nga si Jesus Labing Gamhanan nga Dios. Nagasumpakil gid ini sa akon ginapatihan subong Cristiano nga Orthodox.

Sang tig-ilinit sang 1992 nagpauli ako sa amon lugar sa Tsageri, kag nakita ko nga aktibo man didto ang mga Saksi. Madamo sang nabatian nga maayo parte sa mga Saksi ang akon iloy. Pero bangod indi gihapon maayo ang akon pagtamod sa ila, ginsilingan niya ako, “Hibalua bala kon ano ang ginatudlo nila.”

Sanday Pavle kag Paata nga mga brother nga payunir, regular nga nagabisita sa isa ka pamilya sa amon lugar. Ginahingalitan ini sang amon mga kaingod para magpamati kag  magpamangkot sa ila. Gani nagkadto man ako. Kada may pamangkot ako, ginapangita nila ang sabat sa Biblia kag dayon ginapabasa ini sa akon. Daku gid ang epekto sini sa akon kay nabasa ko mismo ang ginasiling sang Biblia!

Sang ulihi, nag-upod ako sa grupo sang nagatuon sa Biblia nga ginadumalahan sang mga utod. Sang masunod nga tig-ilinit, napulo sa amon ang nabawtismuhan. Wala madugay, nangin Saksi ni Jehova man ang akon iloy.

Nagapasalamat gid ako kon madumduman ko nga ginsabat sang mga utod ang tanan ko nga pamangkot paagi sa pagpabasa sa akon sang mga sabat sa Biblia. Nakabulig ini sa akon nga matadlong ang akon sala nga mga pagpati sang una. Bangod sini, ginapabasa ko man ang mga sabat sa Biblia para mabuligan ang iban nga apresyahon ang kamatuoran!