ANG PAMILYA amo ang nakilal-an nga pinakadumaan nga tawhanon nga institusyon, apang sa karon yari ini sa katalagman. Ang makahaladlok nga paglapnag sang pag-abuso sa droga kag imoralidad sang mga tin-edyer, ang moderno nga kalalat-an bangod sang diborsio kag kasingki sa pamilya, ang talalupangdon nga pagdamo sang mga pamilya nga may nagasolo nga ginikanan, kag ang iban pa daku nga mga problema nga nagapalibog sa iban kon bala makalampuwas pa ang kabuhi sa pamilya.

Mahatag pa ayhan sang pamilya ang isa ka malig-on, mainulikdon nga palibot para sa mga katapo sini? Huo, kon nahibaluan sang mga katapo sang pamilya ang matuod nga sekreto sang kalipay sa pamilya. Ini nga sekreto wala ginatago. Natilawan na ini kag napamatud-an sa sulod sang madamo nga siglo. Ano ini? Ini nga libro, Ang Sekreto sang Kalipay sa Pamilya, nagahatag sing sabat. Nagahatag man ini sing praktikal nga mga halimbawa kon paano ini nga “sekreto” makabulig sa paglubad sa madamo makahalangkat nga kahimtangan sa pamilya. May isa pa bala karon nga wala nagakinahanglan sini nga sahi sang impormasyon?