Si Noe, ang iya pamilya, kag ang mga sapat nagsulod sa arka. Ginsira ni Jehova ang puertahan, kag dayon nag-ulan. Grabe gid ang ulan amo nga amat-amat nga naglutaw ang arka. Sang ulihi, nalapawan sang tubig ang bilog nga duta. Sa gua sang arka, nalumos ang tanan nga malain nga tawo. Pero naluwas si Noe kag ang iya pamilya sa sulod sang arka. Maimadyin mo bala ang ila kalipay bangod nagtuman sila kay Jehova?

Nagbaskog ang ulan sing 40 ka adlaw kag 40 ka gab-i kag dayon nag-untat ini. Amat-amat nga nagnabaw ang tubig. Sang ulihi, nagtungtong ang arka sa mga bukid. Pero madamo pa sing tubig sa palibot, gani indi pa makagua si Noe kag ang iya pamilya sa arka.

Amat-amat nga nagmala ang duta. Sobra isa ka tuig si Noe kag ang iya pamilya sa sulod sang arka. Dayon ginsilingan sila ni Jehova nga puede na sila makagua sa arka. Nagapasalamat gid sila nga ginluwas sila ni Jehova, kag ginpakita nila ang ila pagpasalamat paagi sa paghalad sa iya.

Nalipay si Jehova sa ila ginhalad. Nagpromisa sia nga indi na niya paglaglagon ang tanan nga butang sa duta paagi sa baha. Bilang tanda sina nga promisa, ginpakita niya sa langit ang una nga balangaw. Nakakita ka na bala sing balangaw?

Ginsilingan dayon ni Jehova si Noe kag ang iya pamilya nga magbata kag pun-on ang duta.