Sa siudad sang Asiria nga Ninive, malain gid ang mga tawo. Ginpakadto ni Jehova ang iya manalagna nga si Jonas para hambalon ang mga tawo nga dapat na sila magbag-o. Pero nalagyo si Jonas sa pihak nga direksion. Nagsakay sia sa barko pakadto sa Tarsis kag nagpalayo.

Sang ang barko ara na sa tunga sang dagat, may nag-abot nga mabaskog nga bagyo, kag hinadlukan gid ang mga marinero. Nangamuyo sila sa ila mga dios nga nagapamangkot: ‘Ngaa nagakatabo ini?’ Sang ulihi, si Jonas nagsiling sa ila: ‘Ako ang balasulon. Ginpalagyuhan ko ang ginapahimo ni Jehova sa akon. Ihaboy ninyo ako sa dagat para mag-untat ang bagyo.’ Indi gusto sang mga marinero nga ihaboy si Jonas sa dagat, pero ginpilit niya sila. Sang ginhaboy nila sia sa dagat, nag-untat ang bagyo.

Abi ni Jonas mapatay na sia. Sang nagalugdang sia sa dagat, nangamuyo sia kay Jehova. Dayon may ginpadala si Jehova nga daku katama nga isda. Gintulon sini si Jonas, pero wala sia napatay. Sang ara si Jonas sa tiyan sang isda, nangamuyo sia: ‘Ginapromisa ko nga pirme ko ikaw tumanon.’ Ginproteksionan ni Jehova si Jonas sa tiyan sang isda sing tatlo ka adlaw, dayon ginsugo niya ang isda nga iluad si Jonas sa duta.

Bangod ginluwas ni Jehova si Jonas, buot bala silingon nga indi na niya kinahanglan magkadto sa Ninive? Indi. Ginsilingan liwat ni Jehova si Jonas nga magkadto didto. Sa sini nga tion, nagtuman na  si Jonas. Nagkadto sia didto kag ginsilingan ang malain nga mga tawo: “Kuarenta ka adlaw na lang kag laglagon na ang Ninive.” Dayon may natabo nga wala ginapaabot—namati ang mga taga-Ninive kag nagbag-o sang ila kabuhi. Ang hari sang Ninive nagsiling sa iya katawhan: ‘Magpanawag kamo sa Dios, kag maghinulsol. Basi pa lang indi niya kita paglaglagon.’ Sang nakita ni Jehova nga naghinulsol ang katawhan, wala niya ginlaglag ang Ninive.

Naakig si Jonas kay wala ginlaglag ang siudad. Pamensari ini: Nagpailob kag naluoy si Jehova kay Jonas, pero si Jonas wala naluoy sa mga tawo sa Ninive. Kundi nagpungko sia sa gua sang siudad, nagpasilong sa landong sang tanom nga kalubay, kag nagkumod. Dayon sang napatay ang tanom, naakig si Jonas. Gani si Jehova nagsiling sa iya: ‘Mas naluoy pa ikaw sa sini nga tanom sangsa mga taga-Ninive. Ginpakitaan ko sila sing kaluoy amo nga wala ko sila ginlaglag.’ Ano ang ginatudlo sini kay Jonas? Mas importante ang mga tawo sa Ninive sangsa bisan ano nga tanom.