Masanag nga Palaabuton?

Ang mga tawo interesado gid kon palaabuton ang hambalan. Sin-o sa aton ang indi luyag nga makahibalo kon ano ang matabo sa aton sa masunod nga bulan, sa masunod nga tuig, ukon sa masunod nga dekada pa gani? Sa pagpasangkad pa, ano ang mangin kahimtangan sang kalibutan sa masunod nga 10, 20, ukon 30 ka tuig?

POSITIBO bala ang imo pagtamod sa palaabuton? Minilyon ang may positibo nga pagtamod, kag mahimo nga natunga sila sa duha ka grupo: yadtong mga nagasiling nga may basehan sila sa pagpati nga magaayo pa ang kahimtangan kag yadtong nagapabilin nga malaumon gihapon bisan pa madulom ang palaabuton.

Siempre pa, para sa iban, indi na masanag ang palaabuton. Nalakip sa ila ang mga manugpakot sang kalaglagan nga daw nanamian magpahibalo sang malaglagon nga katapusan sang planeta nga Duta. Suno sa ila pagtamod sa palaabuton, diutay lamang, kon may yara gid man, ang makalampuwas.

Paano mo ginapanan-aw ang palaabuton? Ginapaabot mo bala ang kapahamakan kag kalaglagan ukon ang paghidait kag kalig-unan? Kon paghidait kag kalig-unan ang imo ginapaabot, sa ano napasad ang imo paglaum​—⁠sa luyag mo bala patihan ukon sa masaligan nga ebidensia?

Indi kaangay sa mga manugpakot sang kalaglagan, ang mga manugbalhag sang Magmata! wala nagapati nga ang katawhan mapapas. Sa baylo, ang Biblia nagahatag sing malig-on nga rason sa pagpati nga ang pinakamaayo nga tion magaabot pa.

[Credit Line sang retrato sa pahina 5]

U.⁠S. Department of Energy photograph