Ginhigugma Gid Niya ang Iya Natun-an

KASAN-O lang may nakita nga isa ka sulat nga ginsulat sang isa ka babayi antes sia mapatay sa kanser sang Mayo 2004. Wala niya matapos ang sulat, ayhan bangod sang hinali nga paglala sang iya panglawas. Apang, ang mga nakabasa sang ulihi sadtong wala mahulog nga sulat naghibi gid kag napalig-on ang ila pagtuo sa Dios.

Sa sulat, ginsiling sang nagsulat nga si Susan, nga tin-edyer pa sia sang ginteleponohan niya ang isa ka Cristianong gulang sang mga Saksi ni Jehova sa Connecticut, E.U.A. Ginpaathag niya sa sulat ang kahimtangan nga gin-atubang niya sang tin-edyer pa sia. Sang Nobiembre 2005 lamang nabaton sang iloy ni Susan ining makatalandog nga sulat kag ginpadala niya ang kopya sini sa ulong talatapan sang mga Saksi ni Jehova sa New York.

Nagsulat si Susan nga sang 1973 nasapwan niya ang numero sang telepono sang gulang sa Connecticut sa directory. “Sina nga tuig 14 anyos ako,” paathag niya, “kag sang nakabasa ako sing mga kopya sang Ang Lalantawan kag Magmata! naghinakop ako nga amo gid ini ang kamatuoran. Bangod wala pa ako nakapakigsugilanon sa mga Saksi ni Jehova, nangita ako sa directory sing numero sang telepono sang mga Saksi kag nagpili sang numero nga pareho sa amon ang area code. Sang ginsabat ni Utod Genrich ang telepono, nakibot sia sang mahibaluan niya nga wala pa gid ako sing nasugilanon nga Saksi.” *

Isa ka Daku nga Problema

Ginpaathag ni Susan sa iya sulat nga sang dies anyos sia, ginpaistar sia sa iya tiya sa Connecticut. Temporaryo lang ini kuntani, apang wala magdugay ginsilingan ni Susan ang iya iloy, nga isahanon nga nagaistar sa Florida, nga luyag na niya magtener sa iya tiya. Si Susan nagsulat nga ang iya sitwasyon kaangay sa “ginatawag nga Stockholm syndrome, diin ang isa ka tawo nagsuod sa mga nagapigos sa iya.” * Sobra gid ang pagmaltratar sa iya.

“Tuman gid ang pagmaltratar sa akon sang akon tiya kag sang iya kaupod nga lalaki,” sulat ni Susan. “Dugang pa, halos wala gid sing iban nga makasulod sa balay. Sang ginpaeskwela nila ako, wala ako sing balon ukon sing maayoayo nga bayo, bisan pa nga bastante ang kuarta nga ginapadala ni Nanay para sa akon. Isa lang ang akon underwear, samtang halos tanan yara sa akon duha ka pakaisa nga mas manghod sangsa akon.” Ginsaysay niya ini agod mahangpan kon ngaa nahibaluan niya nga daku gid nga problema kon matukiban sang iya tiya ang iya interes nga magtuon sing dugang pa tuhoy sa Biblia.

Kon Paano Nagtubo ang Interes ni Susan sa Ihibalo sang Biblia

“Ginpakilala ako ni Utod Genrich kay Laura, isa ka hamtong nga Cristianong utod nga babayi,” sulat ni Susan, “kag masami nga sa laundromat  kami nagakitaay kag malawig nga tion ang ginhinguyang niya agod masabat ang madamo ko nga mga pamangkot sa Biblia.” Ginpaathag ni Susan nga wala pa gid sia makahimo sing iya kaugalingon nga desisyon tubtob sadto apang pagkatapos sini nga mga paghambalanay kag sang mabasa niya ang pasad sa Biblia nga literatura subong sang Ang Kamatuoran nga Nagadul-ong sa Kabuhi nga Dayon, nagdesisyon sia.

“Biernes yadto nga gab-i,” padayon ni Susan, “sang ginsilingan ko ang akon tiya nga nakigsugilanon ako sa mga Saksi. Wala niya ako gintugutan nga magtulog sadto nga gab-i, nga nagatindog lang sa tunga sang kusina. Pagkatapos sini nangin determinado pa gid ako nga mangin Saksi.”

Sugod sadto, pirme ginahatagan ni Utod Genrich si Susan sing mga literatura sa Biblia agod buligan si Susan nga mahangpan ang Biblia. “Pirme ko gid madumduman ang 1974 Yearbook of Jehovah’s Witnesses,” sulat ni Susan, “bangod nagasugid ini kon paano nagbatas sing paghingabot ang mga Saksi sa Nazi nga Alemanya antes kag sa tion sang Bug-os Kalibutan nga Inaway II. . . . Amo man yadto ang tion nga ginpangabay ko ang gulang nga irekord ang mga ambahanon sa Ginharian agod nga masaulo ko ini. Sa sulod sang isa ka tuig maamba ko sing pasunod ang mga 119 ka ambahanon sa 1966 nga songbook, nga ‘Singing and Accompanying Yourselves With Music in Your Hearts.’”

“Sa amo man nga tion, ginbilinan ako ni Utod Genrich sang mga rekord sang mga pamulongpulong sa Biblia, mga drama, kag mga programa sa asambleya. Ginabilin niya ini sa Route 10 malapit sa isa ka poste sang telepono, kag ginakuha ko lang ini didto. . . . Ginapung-awan ako sa akon kahimtangan kay daku na ang akon pag-uswag bisan pa nga wala pa gid ako makatambong sa miting. Sa banta ko daw indi na ako makapadayon.”

Suno kay Susan ang masunod nga duha ka tuig tuman gid kabudlay. Wala na sia makig-angot sa duha ka Saksi nga kilala niya. Apang nagsiling sia nga “ang pagtuon sang tanan nga ambahanon nangin ‘sumpa.’” Ngaa? “Bangod madumduman ko ang mga tinaga sa ambahanon, subong sang ‘Mga soldado wala gapatawhay.’ Nahibaluan ko nga ining mga tinaga ginsulat sang isa ka Saksi samtang yara sa isa ka kampo konsentrasyon sa Alemanya sa tion sang Bug-os Kalibutan nga Inaway II kag nagdugang pa gid ini sa akon kalisod. Pamatyag ko talawan ako kag abi ko ginbiyaan na ako ni Jehova.” *

Nahilway Gid Man

“Nagbag-o ang tanan sang ika-disiotso ko nga kaadlawan. Tinuig na nga wala sing Saksi nga nagakadto sa balay kay yara kami sa listahan sang mga ‘indi magpaduaw.’ Apang sina nga adlaw may isa nga gikan sa iban nga kongregasyon nga nagduaw sa balay, kag nasugilanon ko sia kay ako lang ang tawo sa balay. Sa madumduman ko, amo lang yadto ang Sabado nga ako lang ang tawo sa balay. Ginkabig ko ini nga pamatuod nga wala ako ginbiyaan ni Jehova. Gani ginteleponohan ko si Utod Genrich, ang una ko nga gintawgan anay, ginsugiran sia nga handa na ako nga maghalin sa akon ginapuy-an, kag ginpamangkot sia kon ano ang iya mapanugyan. Nakasaylo gid man ako sang ulihi.”

Nagsaylo si Susan sa lain nga lugar sang Abril 1977. Ang iya sulat nagapadayon: “Sang masunod nga tuig, natambungan ko gid man ang tanan nga miting kag mga asambleya, kag nakigbahin na ako sa ministeryo. Nakapakig-angot ako liwat sa akon iloy. Wala gid sia sing ideya nga tuman ang pagmaltratar sa akon sa sulod sining mga tinuig kag gani nahanusbo gid sia. Gilayon sia nga nagpasilabot kag ginpat-od niya nga matigayon ko ang tanan ko nga kinahanglanon. Pila ka tuig antes sini nagsaylo si Nanay sa Alaska. Bangod interesado gid sia sa mga kamatuoran sa Biblia, nagsaylo man ako sa Alaska sang 1978 agod mag-updanay kami. Nangin Saksi sia sang ulihi kag nagpabilin nga matutom tubtob karon.

“Sang nagtambong na ako sa mga miting, nag-organisar si Utod Genrich sing isa ka grupo agod mag-tour sa ulong talatapan sang mga Saksi ni Jehova sa Brooklyn, New York, kag ginhagad niya ako nga mag-upod. Amo yadto ang isa sa indi ko gid malipatan nga regalo nga nahatag sa akon, kay sugod sadto labi ko pa gid nga ginpabaloran kag  gin-apresyar ang organisasyon ni Jehova. Ti, asta na lang diri. Malip-ot lang ini kay luyag ko nga matapos ini dayon.”

Ang matuod, ang ginsambit sa ibabaw diutay lamang nga bahin sang anom ka pahina kag tunga nga sulat nga single-spaced. Sa hingapusan sang sulat ni Susan, nagsiling sia: “Sang yara ako sa ospital sang nagligad nga bulan, grabe gid ang pag-atake sang akon balatian, kag sa banta ko malapit na ako mapatay . . . Nangamuyo ako kay Jehova nga kon hatagan pa niya ako sing maayo nga panglawas bisan sing duha ka semana na lang, may pila pa ka butang nga luyag ko himuon. . . . Nahibaluan ko nga indi na ako magdugay, apang masiling ko nga ining mga tinuig sa kamatuoran tuman gid kaayo, amo ini ang labing maayo nga kabuhi nga sarang mapaabot sang isa.”

Ini nga sulat wala sing nagatakop nga pagpaalam ukon sing pirma, kag wala man mahulog ini nga sulat. Ang mga nakakita sini wala makahibalo kon kay sin-o ini dapat ipadala. Apang, subong sang ginsambit sa umpisa, ini nga sulat ginpadala sang ulihi sa iloy ni Susan.

Dugang Pa nga Impormasyon Tuhoy kay Susan

Sa tapos nga mabawtismuhan si Susan sang Abril 14, 1979, ang iya iloy nagbalik sa Florida. Si Susan nagpabilin sa Alaska, kay nagsuod na sia sa mga kauturan sa Kongregasyon sang North Pole. Wala madugay nagpayunir sia. Sang ulihi, nagbalik sia sa Florida kag sang 1991, ginpamana niya ang isa ka Cristianong gulang nga isa man ka payunir nga ministro. Wala madugay nga napatay si Susan, napatay man ang iya bana.

Si Susan kag ang iya bana ginahigugma gid nga mag-asawa nga magkaupod nga nakigbahin sa bug-os tion nga ministeryo tubtob nga indi na sila makasarang magpadayon bangod sang balatian ni Susan. Sa kabilugan, malipayon sia nga nakaalagad sing kapin sa 20 ka tuig sa bug-os tion nga ministeryo. Ang diskurso sa iya lubong sa Florida nabatian man sang Kongregasyon sa North Pole paagi sa telepono.

Mabuligan kita sang sulat ni Susan nga apresyahon sing labi pa ang espirituwal nga mga pagpakamaayo nga natigayon sang mga nagaalagad kay Jehova kag may makalilipay nga paglaum sang pagkabanhaw. (Binuhatan 24:15) Maathag nga ginapakita man sini nga eksperiensia nga ang Dios malapit sa tanan nga nagapakigsuod sa iya!—Santiago 4:7, 8.

[Mga nota]

[Blurb sa pahina 23]

“Ining mga tinuig sa kamatuoran tuman gid kaayo, amo ini ang labing maayo nga kabuhi nga sarang mapaabot sang isa”

[Retrato sa pahina 21]

Sang dies anyos si Susan

[Retrato sa pahina 23]

Si Susan upod ang iya bana nga si James Seymour