Pagbantay sa Kalibutan

Suno sa isa ka surbe, mga 10.3 porsiento sang mga lalaki nga taga-Brazil nga pirme naga-sex,  kag nagaedad sing 15 asta 64 ang naka-sex sa isa ka tawo ukon sobra pa nga nakilala lang nila sa internet sang nagligad nga 12 ka bulan.—BRAZILIAN MINISTRY OF HEALTH.

Ang Arctic Ocean madugay na nga natabunan sang yelo nga nagadamol asta 80 metros. Sining karon lang, ining ‘madamol nga yelo halos nagkalatunaw na. Gani, mahapos na nga himuan sing ruta sang barko ang North kag South Pole.’—REUTERS NEWS SERVICE, CANADA.

Ginpahibalo sang Moscow kag Vatican nga may ara na sila sing diplomatiko nga relasyon.—RIA NOVOSTI, RUSSIA.

“Sang tungatunga sang 2000 kag 2007, natunaw ang 26 porsiento sang yelo” sa Kilimanjaro, ang pinakamataas nga bukid sa Aprika.—DAILY NATION, KENYA.

Pagkamaiyaiyahon kag Depresyon

Suno sa mga researcher, ang mga taga-Britanya “amo ang pinakamaiyaiyahon nga mga tawo sa bilog nga kalibutan. Nagabatyag sila nga mas importante sangsa iban,” report sang Daily Telegraph sang London. Suno sa isa pa ka pagtuon, ang mga taga-Britanya amo man ang may pinakamadamo nga kaso sang depresyon kag kabalaka. Nagapati ang pila ka eksperto nga naangot ini sa ila pagkamaiyaiyahon. Sa mga pagtuon, ginkomparar ang mga tawo nga taga-China kag Taiwan sa mga tawo nga nagaistar sa Nakatundan. Halos nalikawan sang mga tawo nga indi maiyaiyahon, pareho sang mga taga-China kag Taiwan, ang problema sa panghunahuna. Sa Katundan naman, ‘ang mga tawo nagakadepres bangod sa pagkamaiyaiyahon,’ siling sang Telegraph.

Pagkasal sa mga Agi kag mga Tomboy sa Church of Sweden

Sang Oktubre 2009, gin-aprobahan sang Lutheran Church sang Sweden ang pagkasal sa mga agi kag mga tomboy. Ginbase nila ini sa bag-o lang gin-aprobahan nga layi sang Sweden nga puede na kaslon ang mga tawo nga pareho sing sekso. “Buot silingon ang Church of Sweden ang isa sa pinakauna sa dalagku nga mga simbahan sa kalibutan nga wala nagsunod sa kinaandan nga pagkasal sa lalaki kag babayi,” siling sang pamantalaan nga Dagens Nyheter.

Ano ang Lenguahe sang mga Lapsag Kon Maghibi?

Sa ikaduha pa lang nga adlaw pagkabun-ag sang mga lapsag, ang tono sang ila hibi pareho na sa ila lenguahe, suno sa mga researcher halin sa Würzburg University, sa Germany. Ginrekord nila ang hibi sang 30 ka French kag 30 ka German nga lapsag. Gintun-an nila ang frequency, tono, kag kataason ukon katagsingon sang tingog sang mga lapsag. Ang hibi sang French nga mga lapsag nagasugod sa manubo nga tono kag nagapataas. Ang mga German naman, nagasugod sa mataas nga tono kag nagapanubo. Ginapakita sining pagtuon nga ginasunod sang mga lapsag ang tono sang lenguahe sang ila ginikanan. Gani, ginapatihan nga naga-develop ang lenguahe sang mga lapsag samtang ara pa lang sila sa tiyan kag ang ila lenguahe nagasugod sa una nila nga paghibi.