Ngaa Madamo ang Nagaselebrar sang Krismas?

LAPIT na lang ang Krismas. Excited ka na bala ukon daw ginatagaliog ka? Madamo ang nagapamangkot: ‘Sin-o ang akon regaluhan? Ano ang iregalo ko sa ila? Masarangan ko ayhan ini? Kon mangutang ‘ko, asta san-o ko ini bayaran?’

Bisan may amo sini nga ginakabalak-an, madamo gihapon ang nagaselebrar sang Krismas pati na ang mga pungsod nga indi Cristiano. Sa Japan, ang kalabanan nga pamilya nagaselebrar na sang Krismas kay masadya ini nga okasyon, indi bangod nagapati sila kay Cristo. Sa China, ‘ang piktyur ni Santa Claus ginadispley sa mga balaligyaan sa dalagku nga mga siudad,’ siling sang The Wall Street Journal. Nagsiling pa ini: “Ang Krismas ginaselebrar sang mga may sarang nga Intsik nga ara sa siudad para magpamalaklon, magkinaon, kag mag-party.”

Daku ang nabulig sang Krismas sa madamo nga pungsod para magtin-ad ang ila ekonomiya. Halimbawa sa China, “grabe gid [subong] ang pag-eksport sang mga christmas tree, tinsel, christmas light, kag iban pa nga dekorasyon,” siling sang Journal.

Ang mga lugar nga halos tanan Muslim may mga selebrasyon naman pareho sang Krismas pero wala lang ginatuon sa Disiembre 25. Sa Ankara, Turkey kag Beirut, Lebanon, makakita ka pirme sang mga balaligyaan nga ginadekorahan sang mga christmas tree nga may tinsel kag mga regalo. Sa Indonesia naman, may mga hotel kag mga mall nga nagaisponsor sang mga party, kag ang mga kabataan puede makakaon kag makapapiktyur upod kay Santa Claus.

Sa madamo nga pungsod, ang Krismas nahimo na nga negosyo kag madamo sa mga pasayod ang “gindesinyo gid para sa kabataan,” siling sang Royal Bank Letter sang Canada. May nagasimba pa gid man kon Krismas, pero mas nagadugok ang mga tawo sa mga mall diin mabatian ang mga christmas carol. Ngaa amo sini ang nagakatabo? Indi ayhan bangod sa ginhalinan sang Krismas? Diin gid bala ini naghalin?

Antes naton binagbinagon ini nga mga pamangkot, maayo nga basahon anay naton ang mga hitabo sa Biblia diin ginbase kuno ang Krismas.

 [Kahon/Retrato sa pahina 4]

ANG GINASILING SANG MGA MANUNULAT SANG EBANGHELYO

Apostol Mateo: “Sang nabun-ag si Jesus sa Betlehem sang Judea sang mga adlaw ni Herodes nga hari, . . . ang mga astrologo gikan sa sidlangan nag-abot sa Jerusalem, nga nagasiling: ‘Diin ang isa nga natawo nga hari sang mga Judiyo? Kay nakita namon ang iya bituon sang didto kami sa sidlangan, kag nagkari kami agod magyaub sa iya.’ Sang mabatian ini natublag gid si Hari Herodes.” Gani ginpamangkot ni Hari Herodes ang “puno nga mga saserdote . . . kon diin matawo ang Cristo.” Sang mabal-an niya nga “sa Betlehem,” ginsilingan niya ang mga astrologo: “Lakat kamo kag pangitaa gid sing maayo ang bata, kag kon makita ninyo sia, balitaan ninyo ako.”

“Naglakat sila; kag, . . . ang bituon nga ila nakita sang didto sila sa sidlangan nag-una sa ila, tubtob nga nagdulog ini sa ibabaw sang duog nga nahamtangan sang bata. . . . Sang nagsulod sila sa balay nakita nila ang bata upod sa iya iloy nga si Maria.” Pagkatapos nga mahatagan si Jesus sang mga regalo, “ginpaandaman sila sang Dios paagi sa damgo nga indi magbalik kay Herodes, [gani] nagpauli sila sa ila duog paagi sa lain nga dalan.”

“Sang makalakat na sila, . . . ang anghel ni Jehova nagpakita kay Jose sa damgo, nga nagasiling: ‘Bangon ka, dalha ang bata kag ang iya iloy kag magpalagyo pakadto sa Egipto . . . ’ Gani sa sina nga gab-i nagbangon sia kag gindala ang bata kag ang iya iloy . . . Sang makita ni Herodes nga ginlansi sia sang mga astrologo, naakig gid sia, kag nagsugo sia sang mga tawo kag ginpapatay ang tanan nga bata nga lalaki sa Betlehem kag sa tanan nga distrito sini, halin sa duha ka tuig ang edad paubos.”—Mateo 2:1-16.

Disipulo Lucas: Si Jose “nagtaklad . . . sa Galilea, sa siudad sang Nazaret, pakadto sa Judea, sa siudad ni David, nga ginatawag Betlehem, . . . agod magparehistro upod ni Maria, . . . Samtang didto sila, . . . ginbun-ag niya ang iya anak nga lalaki, ang panganay, kag ginputos niya sia sing mga lampin kag ginpahigda sa pasungan, bangod wala sing lugar para sa ila sa hulot-dalayunan.”

“Sa amo nga duog may yara man mga manugbantay sang karnero nga nagapuyo sa latagon kag nagabantay sang ila mga panong sa bug-os nga gab-i. Kag hinali lang nga nagtindog malapit sa ila ang anghel ni Jehova, . . . kag hinadlukan gid sila. Apang ang anghel nagsiling sa ila: ‘Indi kamo magkahadlok, kay, . . . ginapahayag ko sa inyo ang maayong balita tuhoy sa daku nga kalipay nga maagom sang tanan nga tawo, bangod natawo sa inyo karon ang isa ka Manluluwas, nga amo ang Cristo nga Ginuo, sa siudad ni David.’” Kag ang mga manugbantay “dalidali . . . nga nagkadto kag nakita nila si Maria kag si Jose, kag ang lapsag nga nagahigda sa pasungan.”—Lucas 2:4-16.