AMO man bala sini ang imo kahimtangan? Nahadlok ka bala nga basi indi mo matun-an kon paano mangin matuod nga lalaki? Kon amo, may makabulig sa imo.

Binagbinaga kon paano mo maatubang ang duha ka kabudlayan.

Ang ginasiling sang iban:

• Ang matuod nga lalaki wala nagahibi.
• Ang matuod nga lalaki wala nagapadikta sa iban.
• Ang lalaki mas maayo sangsa babayi.

Binagbinaga ini: Ang matuod nga pagkalalaki indi kabaliskaran sang pagkababayi, kundi pamatuod nga ang isa indi na bata. Mangin matuod ka nga lalaki kon dulaon mo ang imo pagkabatabata. Ang Cristiano nga si apostol Pablo nagsulat: “Sang bata pa ako, nagahambal ako subong sang bata, nagahunahuna subong sang bata, nagapangatarungan subong sang bata; apang karon nga hamtong na ako nga tawo, gindula ko na ang mga batasan sang bata.” (1 Corinto 13:11) Buot silingon, kon dulaon mo ang binatabata nga panghunahuna, panghambal,  kag paggawi kag islan ini sang mas hamtong nga panghunahuna, panghambal, kag paggawi, mangin matuod ka nga lalaki. *

Tilawi ini: Isulat sa papel ang imo sabat sa masunod nga mga pamangkot:

1. Ano na nga “mga batasan sang bata” ang nadula ko?
2. Ano pa ang puede ko nga himuon?

Ginapanugda nga basahon: Lucas 7:36-50. Tan-awa kon paano ginpamatud-an ni Jesus nga matuod sia nga lalaki paagi sa (1) pagpanindugan sa kon ano ang husto kag (2) pagrespeto sa iban—lakip sa mga babayi.

“Nagadayaw gid ako sa akon amigo nga si Ken. Mabakod sia nga lalaki, sa pisikal, emosyonal, kag espirituwal, kag kaayo gid sa iya. Natun-an ko sa iya halimbawa nga ang matuod nga lalaki wala nagapakanubo sa iban para pataason ang iya kaugalingon.”—Jonathan.

Ang ginasiling sang iban:

• Kon wala ka sing amay, indi mo gid matun-an kon paano mangin matuod nga lalaki.
• Kon indi maayo ang halimbawa sang imo amay, mangin pareho ka man sa iya.

Binagbinaga ini: Bisan pa daw indi maayo ang imo gindak-an, mahimo ka magmadinalag-on! Mabag-o mo ang imo kahimtangan. (Ezequiel 18:14) Puede mo sundon ang laygay ni Hari David sa iya bata nga si Solomon: “Magpakabakud ka, kag magpakalalaki ka.”—1 Hari 2:2.

Matuod, mabudlay magdaku nga ginapabay-an ka lang sang imo amay, ukon kon wala ka sing amay. “Disbentaha gid kon wala mo makilala  ang imo amay,” siling ni Alex nga ginsambit kaina. “Beinte-singko na ako, pero pamatyag ko amo ko pa lang ginatun-an ang mga butang nga dapat natun-an ko sang tin-edyer pa ako.” Kon amo man sini ang imo nabatyagan, ano ang puede mo himuon?

Tilawi ini: Magpangita sing isa ka lalaki nga maayo nga halimbawa. * Pamangkuta sia kon ano nga mga kinaiya ang sa banta niya importante para mangin matuod nga lalaki. Dayon pamangkuta sia kon paano mo ini mahimo.—Hulubaton 1:5.

Ginapanugda nga basahon: Hulubaton kapitulo 1-9. Talupangda ang laygay sang amay nga makabulig sa iya bata nga lalaki nga magdaku nga maalamon, kag espirituwal nga tawo.

“Proud gid ko kon ano ako nga klase sang lalaki subong. Bisan pa mas maayo gid tani kon ara si Tatay, positibo gihapon ako. Nagapati ako nga magamadinalag-on ako.”—Jonathan.